* 24 ಗಂಟೆ ಗಂಟೆಯೊಳಗೆ ಸಮಸ್ಯೆ ಬಗೆಹರಿಸುವ ಭರವಸೆ
ಹೊಸದಿಲ್ಲಿ: ವಿಶ್ವದ ಅತಿ ಅಗ್ಗದ ಸ್ಮಾರ್ಟ್‌ಫೋನ್ ಎಂಬುದಾಗಿ ಭಾರಿ ಪ್ರಚಾರ ಗಿಟ್ಟಿಸಿಕೊಂಡಿದ್ದ ರಿಂಗ್ ಬೆಲ್ಸ್ ಕಂಪನಿಯ '' ಫ್ರೀಡಮ್ 251'' ಸ್ಮಾರ್ಟ್‌ಫೋನ್ ಅನ್ನು ಖರೀದಿಸಲು ಮುಗಿ ಬಿದ್ದವರಿಗೆ ಗುರುವಾರ ಭಾರಿ ನಿರಾಸೆ ಕಾದಿತ್ತು. ಓವರ್‌ಲೋಡ್ ಆಗಿರುವ ಪರಿಣಾಮ ಆರ್ಡರ್‌ಗಳನ್ನು ತೆಗೆದುಕೊಳ್ಳಲು ಸಾಧ್ಯವಾಗುತ್ತಿಲ್ಲ ಎಂದು ಕಂಪನಿ ತನ್ನ ವೆಬ್‌ಸೈಟಿನಲ್ಲಿ ಹೇಳಿಕೊಂಡಿದೆ.
ನೋಯ್ಡಾ ಮೂಲದ ರಿಂಗಿಂಗ್ ಬೆಲ್ಸ್, ಮುಂದಿನ 24 ಗಂಟೆಯೊಳಗೆ ತಾಂತ್ರಿಕ ಅಡಚಣೆಯನ್ನು ಬಗೆಹರಿಸಿಕೊಂಡು ಮತ್ತೆ ಆರ್ಡರ್‌ಗಳನ್ನು ಸ್ವೀಕರಿಸುವುದಾಗಿ ತಿಳಿಸಿದೆ. '' ಪ್ರತಿ ಸೆಕೆಂಡ್‌ಗೆ 6 ಲಕ್ಷ ಹಿಟ್‌ಗಳನ್ನು ವೆಬ್‌ಸೈಟ್ ಸ್ವೀಕರಿಸುತ್ತಿದ್ದು, ಸರ್ವರ್ ಓವರ್‌ಲೋಡ್ ಆಗಿದೆ'' ಎಂದು ರಿಂಗಿಂಗ್ ಬೆಲ್ಸ್ ತನ್ನ ವೆಬ್ ತಾಣದಲ್ಲಿ ತಿಳಿಸಿದೆ.
ರಿಂಗಿಂಗ್ ಬೆಲ್ಸ್‌ನ ಅಗ್ಗದ ಸ್ಮಾರ್ಟ್‌ಫೋನ್ ಅನ್ನು ಬಿಜೆಪಿಯ ಹಿರಿಯ ನಾಯಕ ಮುರಳಿ ಮನೋಹರ ಜೋಷಿ ಬುಧವಾರ ರಾತ್ರಿ ಬಿಡುಗಡೆಗೊಳಿಸಿದ್ದರು. ಈ ಕಂಪನಿಯನ್ನು ಐದು ತಿಂಗಳಿನ ಹಿಂದೆ ಆಮ್ಟಿ ವಿ.ವಿಯ ಪದವೀಧರ ಮೋಹಿತ್ ಕುಮಾರ್ ಗೋಯೆಲ್ ಸ್ಥಾಪಿಸಿದ್ದರು. '' ಫ್ರೀಡಮ್ 251 ಸ್ಮಾರ್ಟ್‌ಫೋನ್‌ನ ಉತ್ಪಾದನಾ ವೆಚ್ಚ 2,500 ರೂ.ಗಳಾಗುತ್ತದೆ. ಆದರೆ ಬೃಹತ್ ಪ್ರಮಾಣದ ಉತ್ಪಾದನೆಯಿಂದ ಉಂಟಾಗುವ ಉಳಿತಾಯ, ನವೀನ ಮಾರುಕಟ್ಟೆ ತಂತ್ರ, ಸುಂಕದಲ್ಲಿ ಇಳಿಕೆ, ಇ-ಕಾಮರ್ಸ್ ಮುಂತಾದ ವಿಧಾನಗಳ ಮೂಲಕ ಕಡಿಮೆ ಬೆಲೆಗೆ ನೀಡಲಾಗುವುದು '' ಎಂದು ರಿಂಗಿಂಗ್ ಬೆಲ್ಸ್ ಅಧ್ಯಕ್ಷ ಅಶೋಕ್ ಛಡ್ಡಾ ತಿಳಿಸಿದ್ದಾರೆ.
''ಭಾರತದಲ್ಲಿ ಉತ್ಪಾದಿಸಿದ ಬಿಡಿ ಭಾಗಗಳನ್ನು ಬಳಸುವುದರಿಂದ ಸುಂಕದಲ್ಲಿ 13.8 ಪರ್ಸೆಂಟ್ ಉಳಿತಾಯ ಸಾಧ್ಯ. ಮೊದಲು ಆನ್‌ಲೈನ್‌ನಲ್ಲಿ ಮಾರಾಟ ಮಾಡುವುದರಿಂದ ವಿತರಣೆ ವೆಚ್ಚದಲ್ಲಿ ಕೂಡ ಗಣನೀಯ ಉಳಿತಾಯವಾಗುತ್ತದೆ. '' ನೋಯ್ಡಾ ಮತ್ತು ಉತ್ತರಾಂಚಲದಲ್ಲಿ ತಲಾ 250 ಕೋಟಿ ರೂ. ವೆಚ್ಚದಲ್ಲಿ ಎರಡು ಉತ್ಪಾದನಾ ಘಟಕಗಳನ್ನು ತೆರೆಯಲಾಗುವುದು. ಪ್ರತಿ ಘಟಕವೂ 5 ಲಕ್ಷ ಸ್ಮಾರ್ಟ್‌ಫೋನ್‌ಗಳನ್ನು ಉತ್ಪಾದಿಸಲಿದೆ. ಸಾಲ ಮತ್ತು ಈಕ್ವಿಟಿ ರೂಪದಲ್ಲಿ ಹಣ ದೊರೆಯಲಿದೆ'' ಎಂದು ಅಶೋಕ್ ಹೇಳಿದ್ದಾರೆ.
ರಿಂಗಿಂಗ್ ಬೆಲ್ಸ್ ಕಂಪನಿಯ ಅಗ್ಗದ ದರದ ಮೊಬೈಲ್ ಬಗ್ಗೆ ಕಳವಳ ವ್ಯಕ್ತಪಡಿಸಿರುವ ದೇಶದ ಇತರ ಮೊಬೈಲ್ ತಯಾರಕರು, ಈ ಸಂಬಂಧ ಟೆಲಿಕಾಂ ಸಚಿವ ರವಿಶಂಕರ್ ಪ್ರಸಾದ್ ಅವರಿಗೆ ಲಿಖಿತ ದೂರು ಸಲ್ಲಿಸಿದ್ದಾರೆ.
ಎಷ್ಟೇ ರಿಯಾಯಿತಿ ಕೊಟ್ಟರೂ 'ರಿಂಗಿಂಗ್ ಬೆಲ್ಸ್' ಸಂಸ್ಥೆಯು ಪ್ರಕಟಿಸಿರುವ ಮೊಬೈಲ್ ದರವನ್ನು 3,500 ರೂ.ಗಿಂತಲೂ ಕಡಿಮೆ ನಿಗದಿಪಡಿಸಲು ಸಾಧ್ಯವೇ ಇಲ್ಲ. ಆದರೆ, ಕೇವಲ 251 ರೂ.ಗೆ ಹ್ಯಾಂಡ್‌ಸೆಟ್ ನೀಡುವುದರ ಹಿಂದೆ ಉದ್ದೇಶವೇನೆಂದು ಅರ್ಥವಾಗುತ್ತಿಲ್ಲ. ಈ ವಿಷಯದಲ್ಲಿ ಸರಕಾರ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು 'ಇಂಡಿಯನ್ ಸೆಲ್ಯುಲಾರ್ ಅಸೋಸಿಯೇಷನ್' ಸಚಿವರಿಗೆ ಮನವಿ ಮಾಡಿದೆ. ಅಲ್ಲದೆ, ಮೊಬೈಲ್ ಬಿಡುಗಡೆ ಕಾರ್ಯಕ್ರಮದಲ್ಲಿ ರಾಜಕಾರಣಿಗಳ ಉಪಸ್ಥಿತಿ ಬಗ್ಗೆಯೂ ದೂರಿನಲ್ಲಿ ಆಕ್ಷೇಪ ವ್ಯಕ್ತಪಡಿಸಲಾಗಿದೆ.
* ವೆಬ್‌ಸೈಟ್‌ಗೆ ಗ್ರಾಹಕರ ಲಗ್ಗೆ, ಸರ್ವರ್ ಓವರ್‌ಲೋಡ್