ಸಿಹೋರ್ (ಮಧ್ಯಪ್ರದೇಶ): ರೈತರಿಗೆ ತಮ್ಮ ಕೃಷಿ ಉತ್ಪನ್ನಗಳನ್ನು ಉತ್ತಮ ಬೆಲೆಗೆ ಮಾರಾಟ ಮಾಡಲು ಆನ್‌ಲೈನ್ ವ್ಯವಸ್ಥೆಯನ್ನು ಮುಂಬರುವ ಏಪ್ರಿಲ್ 14ರಂದು ಜಾರಿಗೊಳಿಸಲಾಗುವುದು ಎಂದು ಪ್ರಧಾನಿ ನರೇಂದ್ರ ಮೋದಿ ಗುರುವಾರ ಘೋಷಿಸಿದ್ದಾರೆ.
ಪ್ರಧಾನ ಮಂತ್ರಿಯವರ ಬೆಳೆ ವಿಮೆ ಯೋಜನೆಯ ಮಾರ್ಗದರ್ಶಿಯನ್ನು ಬಿಡುಗಡೆಗೊಳಿಸಿದ ನಂತರ ಮಾತನಾಡಿದ ಪ್ರಧಾನಿ, ಆನ್‌ಲೈನ್ ವ್ಯವಸ್ಥೆಯಿಂದ ರೈತರ ಆದಾಯ 2022ರ ವೇಳೆಗೆ ಇಮ್ಮಡಿಯಾಗಲಿದೆ ಎಂದು ಹೇಳಿದರು.
ರೈತರು ಕಠಿಣ ಪರಿಶ್ರಮಪಟ್ಟರೂ, ಅವರ ಉತ್ಪನ್ನಗಳಿಗೆ ಸೂಕ್ತ ಬೆಲೆ ಸಿಗುತ್ತಿಲ್ಲ. ಗತ್ಯಂತರವಿಲ್ಲದೆ ಸಮೀಪದ ಮಂಡಿಗಳಲ್ಲಿ ಮಾರಾಟ ಮಾಡಬೇಕಾದ ಸನ್ನಿವೇಶ ಇದೆ. ಆದರೆ ಡಿಜಿಟಲ್ ವೇದಿಕೆಯ ಮೂಲಕ ಈ ಸಮಸ್ಯೆಯನ್ನು ಬಗೆಹರಿಸಲು ಸರಕಾರ ಯತ್ನಿಸಲಿದೆ ಎಂದರು.
ಏನಿದು ಆನ್‌ಲೈನ್ ವ್ಯವಸ್ಥೆ?
ಈ ವ್ಯವಸ್ಥೆಯಲ್ಲಿ ರೈತರು ತಮ್ಮ ಮೊಬೈಲ್ ಫೋನ್ ಮೂಲಕ ತಮ್ಮ ಉತ್ಪನ್ನಗಳಿಗೆ ಉತ್ತಮ ದರ ಸಿಗುವ, ದೇಶದ ಯಾವುದೇ ಭಾಗದಲ್ಲಿರುವ ಮಂಡಿಗಳಿಗೆ ಮಾರಾಟ ಮಾಡಬಹುದು. ಏಪ್ರಿಲ್ 14ರಂದು ಬಿ.ಆರ್ ಅಂಬೇಡ್ಕರ್ ಅವರ ಜನ್ಮ ದಿನಾಚರಣೆಯಂದು ರಾಷ್ಟ್ರೀಯ ಕೃಷಿ ಮಾರುಕಟ್ಟೆ ಹಾಗೂ ಡಿಜಿಟಲ್ ಪ್ಲ್ಯಾಟ್‌ಫೋರ್ಮ್ ಅಸ್ತಿತ್ವಕ್ಕೆ ಬರಲಿದೆ. ಮುಂದಿನ ವರ್ಷಗಳಲ್ಲಿ ದೇಶದ ಎಲ್ಲ 585 ಸಗಟು ಮಂಡಿಗಳನ್ನು ಸಂಯೋಜಿಸಲಾಗುವುದು. ಈ ಪ್ರಕ್ರಿಯೆ 2018ಕ್ಕೆ ಮುಕ್ತಾಯವಾಗಲಿದ್ದು, 200 ಕೋಟಿ ರೂ.ಗಳನ್ನು ಇದಕ್ಕಾಗಿ ಮೀಸಲಿಡಲಾಗಿದೆ ಎಂದು ಸರಕಾರ ತಿಳಿಸಿದೆ.
ಏ.14ರಿಂದ ಜಾರಿ