ಅರುಣಾಚಲದಲ್ಲಿ ನೂತನ ಸರಕಾರದ ಹಾದಿ ಸುಗಮ

ಹೊಸದಿಲ್ಲಿ: ಅರುಣಾಚಲ ಪ್ರದೇಶದಲ್ಲಿ ನೂತನ ಸರಕಾರ ರಚನೆಗೆ ಇದ್ದ ಅಡ್ಡಿಯನ್ನು ಸುಪ್ರೀಂಕೋರ್ಟ್ ಗುರುವಾರ ನಿವಾರಿಸಿದ್ದು, ಸರಕಾರ ರಚನೆಗೆ ನೀಡಿದ್ದ ತಡೆಯನ್ನು ತೆರವುಗೊಳಿಸಿದೆ.

ಆದರೆ ಅದೇ ವೇಳೆ ಕಾಂಗ್ರೆಸ್ ಪಕ್ಷದಿಂದ ಬಂಡೆದಿದ್ದ 14 ಮಂದಿ ಶಾಸಕರ ಅನರ್ಹತೆ ಸಂಬಂಧ ಗುವಾಹಟಿ ಹೈಕೋರ್ಟ್‌ ನೀಡಿರುವ ಮಧ್ಯಂತರ ತಡೆ ಆದೇಶದ ವಿಚಾರದಲ್ಲಿ ಮಧ್ಯಪ್ರವೇಶಿಸಲು ಸುಪ್ರೀಂಕೋರ್ಟ್‌ ನಿರಾಕರಿಸಿದೆ.

ನೋಟಿಸ್‌ ನೀಡಿಲ್ಲ:

ಅಲ್ಲದೆ ಈ ಶಾಸಕರ ಅನರ್ಹತೆ ಸಂಬಂಧ ನೀಡಿರುವ ತಡೆಯಾಜ್ಞೆಗೂ ಮುನ್ನ ಯಾವುದೇ ನೋಟಿಸ್‌ ಕೂಡ ನೀಡದಿರುವುದನ್ನು ಸುಪ್ರೀಂ ಪೀಠ ಗಮನಿಸಿತು. ಜತೆಗೆ ಎರಡು ವಾರಗಳಿಗೂ ಮುನ್ನ ಈ ವಿಚಾರದಲ್ಲಿ ಅಂತಿಮ ಆದೇಶವನ್ನು ಜಾರಿ ಮಾಡುವಂತೆ ಗುವಾಹಟಿ ಹೈಕೋರ್ಟ್‌ಗೆ ಸೂಚಿಸಿತು.

ಕೇಂದ್ರ ಸಂಪುಟ ಅರುಣಾಚಲದಲ್ಲಿ ರಾಷ್ಟ್ರಪತಿ ಆಳ್ವಿಕೆ ವಾಪಸ್‌ಗೆ ಶಿಫಾರಸು ಮಾಡಲು ನಿರ್ಧರಿಸಿದ ಕೆಲವೇ ಗಂಟೆಗಳ ಅಂತರದಲ್ಲಿ, ಅಲ್ಲಿ ಯಥಾಸ್ಥಿತಿ ಕಾಯ್ದುಕೊಳ್ಳಬೇಕು ಎಂದು ಸುಪ್ರೀಂಕೋರ್ಟ್‌ ಬುಧವಾರ ಮಧ್ಯಂತರ ಆದೇಶ ನೀಡಿತ್ತು. ಅಲ್ಲದೆ ಸ್ಪೀಕರ್‌ ನಬಾಂ ರೆಬಿಯಾ ಅವರು ಕಾಂಗ್ರೆಸ್‌ನ 14 ಬಂಡಾಯ ಶಾಸಕರನ್ನು ಅನರ್ಹಗೊಳಿಸಿದ ಪ್ರಕರಣದಲ್ಲಿ ಯಥಾಸ್ಥಿತಿ ಕಾಯ್ದುಕೊಳ್ಳುವುದು ಸುಪ್ರೀಂ ಸೂಚನೆಯಾಗಿತ್ತು.

ಅರುಣಾಚಲ ಪ್ರದೇಶದಲ್ಲಿ ಹೊಸ ಸರಕಾರದ ಪದಗ್ರಹಣ ಸಮಾರಂಭಕ್ಕೆ ರಾಜ್ಯಪಾಲ ಜೆ.ಪಿ.ರಾಜ್ಖೋವಾ ಅವರು ಅವಕಾಶ ಮಾಡಿಕೊಡಲು ನಿರ್ಧರಿಸಿದ್ದನ್ನು ವಿರೋಧಿಸಿ, ಯಥಾಸ್ಥಿತಿ ಕಾಪಾಡಲು ಆಗ್ರಹಿಸಿ ಅರುಣಾಚಲ ಪ್ರದೇಶದ ಕಾಂಗ್ರೆಸ್‌ ನಾಯಕರ ಪರವಾಗಿ ಹಿರಿಯ ವಕೀಲರಾದ ಎಫ್‌.ಎಸ್‌.ನಾರಿಮನ್‌ ಹಾಗೂ ಕಪಿಲ್‌ ಸಿಬಲ್ ಸುಪ್ರೀಂಕೋರ್ಟ್‌ನಲ್ಲಿ ಗುರುವಾರ ವಾದ ಮಾಡಿದ್ದರು.

ಸುಪ್ರೀಂಕೋರ್ಟ್‌ನ ಗುರುವಾರದ ಆದೇಶದಿಂದಾಗಿ ಕಾಂಗ್ರೆಸ್ ಆಳ್ವಿಕೆಯ ಅರುಣಾಚಲದಲ್ಲಿ ರಾಷ್ಟ್ರಪತಿ ಆಳ್ವಿಕೆ ಹೇರಿದ್ದ ಕೇಂದ್ರ ಸರಕಾರ ರಾಷ್ಟ್ರಪತಿ ಆಳ್ವಿಕೆ ವಾಪಸ್ ಪಡೆಯುವಂತೆ ಪ್ರಣಬ್ ಮುಖರ್ಜಿ ಅವರಿಗೆ ಬುಧವಾರ ಶಿಫಾರಸು ಮಾಡಿದ್ದನ್ನು ತಡೆಯುವ ಕಾಂಗ್ರೆಸ್ ನಾಯಕರ ಯತ್ನ ವಿಫಲವಾಗಿದೆ. ಇದು ಕಾಂಗ್ರೆಸ್‌ಗೆ ಹಿನ್ನಡೆ ಎಂದೂ ಹೇಳಲಾಗುತ್ತಿದೆ.

ಕಾಂಗ್ರೆಸ್‌ಗೆ ಹಿನ್ನಡೆ:

ಅರುಣಾಚಲ ವಿಧಾನಸಭೆಯಲ್ಲಿ 60 ಸದಸ್ಯ ಬಲವಿದ್ದು, ಆ ಪೈಕಿ 47 ಶಾಸಕರು ಕಾಂಗ್ರೆಸಿಗರು. ಆದರೆ ತಿಂಗಳ ಹಿಂದೆ ಬಂಡಾಯವೆದ್ದ 21 ಕಾಂಗ್ರೆಸ್ ಶಾಸಕರು ಕಾಲಿಖೋ ಪುಲ್‌ ನೇತೃತ್ವದಲ್ಲಿ ಪಕ್ಷದಿಂದ ಹೊರನಡೆದಿದ್ದರು. ಜತೆಗೆ ಬಿಜೆಪಿಯ 11, ಇಬ್ಬರು ಪಕ್ಷೇತರ ಶಾಸಕರ ನೆರವಿನಿದಂ ಸರಕಾರ ರಚಿಸುವುದಾಗಿ ಘೋಷಿಸಿದ್ದರು. ಬಹುಮತಕ್ಕೆ 31 ಸ್ಥಾನಗಳು ಬೇಕಿರುವುದರಿಂದ ಈ ಬೆಳವಣಿಗೆ ಕಾಂಗ್ರೆಸ್‌ಗೆ ದೊಡ್ಡ ಹಿನ್ನಡೆಯಾಗಿತ್ತು. ಇದೀಗ ಸುಪ್ರೀಂಕೋರ್ಟ್‌ನಲ್ಲೂ ಹೊಸ ಸರಕಾರ ರಚನೆಗೆ ಅವಕಾಶ ನೀಡಿರುವುದು ಕಾಂಗ್ರೆಸ್‌ ನಾಯಕರಿಗೆ ಮುಜುಗರ ತಂದಿದೆ.