ಹೊಸದಿಲ್ಲಿ : ಕೇಂದ್ರ ಸರಕಾರದ ಸ್ವಚ್ಛ ಭಾರತ ಯೋಜನೆಗೆ ನಿಧಿ ಕ್ರೋಡೀಕರಣಕ್ಕಾಗಿ ಪೆಟ್ರೋಲ್ ಮತ್ತು ಡೀಸೆಲ್ ಮೇಲೆ ಇನ್ನಷ್ಟು ಸೆಸ್ ವಿಧಿಸಲು ಕೇಂದ್ರ ಸರಕಾರ ಉದ್ದೇಶಿಸಿದೆ. ಫೆಬ್ರವರಿ ಬಜೆಟ್‌ನಲ್ಲಿ ಈ ಕುರಿತಾದ ಪ್ರಕಟಣೆ ಹೊರಬೀಳುವ ನಿರೀಕ್ಷೆ ಇದೆ. ಇದು ಜಾರಿಯಾದರೆ, ಇಂಧನ ದರಗಳು ಒಂದಿಷ್ಟು ಹೆಚ್ಚಳವಾಗುತ್ತವೆ.
ಪೆಟ್ರೋಲ್, ಡೀಸೆಲ್, ದೂರ ಸಂಪರ್ಕ ಸೇವೆಗಳ ಮೇಲೆ ಶೇ.0.5ರಷ್ಟು ಸೆಸ್ ವಿಧಿಸಲು, ಸೇವಾ ತೆರಿಗೆಯನ್ನು ಶೇ.0.5ರಷ್ಟು ಹೆಚ್ಚಿಸಲು ಕೇಂದ್ರ ಚಿಂತನೆ ನಡೆಸಿದೆ ಎಂದು ಮೂಲಗಳು ತಿಳಿಸಿವೆ. ''ಈ ಪ್ರಸ್ತಾವನೆಯನ್ನು ನೀತಿ ಆಯೋಗವು ಸಿದ್ಧಪಡಿಸಿದೆ. ಸಾಧ್ಯವಿರುವ ಎಲ್ಲ ಆಯ್ಕೆಗಳನ್ನು ಬಳಸಿಕೊಂಡು ಹೆಚ್ಚಿನ ಹಣವನ್ನು ಕ್ರೋಡೀಕರಿಸಲು ಸರಕಾರ ಆಲೋಚಿಸುತ್ತಿದೆ,'' ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಕಳೆದ ವರ್ಷದ ಅ.2ರಂದು ಸ್ವಚ್ಛ ಭಾರತ ಯೋಜನೆಗೆ ಚಾಲನೆ ಸಿಕ್ಕಿದ್ದು, 2019ರ ಅಕ್ಟೋಬರ್ ಹೊತ್ತಿಗೆ 2.23 ಕೋಟಿ ರೂ. ನಿಧಿ ಕ್ರೋಡೀಕರಿಸುವ ಪ್ರಯತ್ನಗಳು ನಡೆದಿವೆ. ಈಗಾಗಲೇ ನವೆಂಬರ್ 15ರಿಂದ ಅನ್ವಯವಾಗುವಂತೆ ಸೇವೆಗಳಿಗೆ ಶೇ.0.5ರಷ್ಟು ಸೆಸ್ ಅನ್ನು ಸರಕಾರ ವಿಧಿಸುತ್ತಿದೆ. ಅಲ್ಲದೇ, ''ಸ್ವಚ್ಛ ಭಾರತದ ಯೋಜನೆಗಳಿಗಾಗಿ ಸುದೀರ್ಘ ಕಾಲದ ತೆರಿಗೆರಹಿತ ಬಾಂಡ್‌ಗಳನ್ನು ಬಿಡುಗಡೆ ಮಾಡುವ ಯೋಚನೆಯನ್ನೂ ಸರಕಾರ ಹೊಂದಿದೆ,'' ಎಂದು ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.
2.23 ಲಕ್ಷ ಕೋಟಿಯ ಯೋಜನೆ
* ಸ್ವಚ್ಛ ಭಾರತ ಯೋಜನೆಗಾಗಿ 2.23 ಲಕ್ಷ ಕೋಟಿ ರೂ.ಗಳ ನಿಧಿ ರೂಪಿಸುವುದು ಸರಕಾರದ ಉದ್ದೇಶ.
* ಸಮುದಾಯ ಮತ್ತು ಮನೆಗಳಿಗೆ ಶೌಚಾಲಯ, ವೈಜ್ಞಾನಿಕವಾಗಿ ತ್ಯಾಜ್ಯ ನಿರ್ವಹಣೆಗೆ ಆದ್ಯತೆ
* ನಗರ ಪ್ರದೇಶಗಳಲ್ಲಿ 62,010 ಕೋಟಿ, ಗ್ರಾಮೀಣ ಭಾಗಗಳಲ್ಲಿ 1.34 ಲಕ್ಷ ಕೋಟಿ ವೆಚ್ಚದಲ್ಲಿ ಸ್ವಚ್ಛ ಭಾರತ ಅಭಿಯಾನ
* ಶಾಲಾ ಶೌಚಾಲಯಕ್ಕೆ 2,528 ಕೋಟಿ, ಅಂಗನವಾಡಿ ಶೌಚಾಲಯಗಳಿಗೆ 738 ಕೋಟಿ, ಗ್ರಾಮೀಣ ಉದ್ಯೋಗ ಯೋಜನೆಯಡಿ ಸಾರ್ವಜನಿಕರಿಗೆ ಶೌಚಾಲಯ ನಿರ್ಮಾಣಕ್ಕೆ 24,000 ಕೋಟಿ ರೂ. ಬಳಸಲು ಯೋಜನೆ.
* 75:25 ಅನುಪಾತದಲ್ಲಿ ಕೇಂದ್ರ ರಾಜ್ಯಗಳು ಹಣ ಖರ್ಚು ಮಾಡಿ ಸ್ವಚ್ಛ ಭಾರತ ಯೋಜನೆ ಜಾರಿ. ಗುಡ್ಡಗಾಡು ರಾಜ್ಯಗಳಲ್ಲಿ 90:10ರ ಅನುಪಾತ.
ಹೊರೆಗೆ ವಿರೋಧ:
''ಸ್ವಚ್ಛ ಭಾರತ ಯೋಜನೆ ಸ್ವಾಗತಾರ್ಹ. ಆದರೆ, ಅದರ ಜಾರಿಗಾಗಿ ನಾಗರಿಕರ ಮೇಲೆ ಇನ್ನಷ್ಟು ಹೊರೆ ಹಾಕುವುದು ಸೂಕ್ತವಲ್ಲ. ಸಾರ್ವಜನಿಕ ಆರೋಗ್ಯ, ಸ್ವಚ್ಛತೆ ಕಾಪಾಡುವುದು ಸರಕಾರದ ಮೂಲ ಕರ್ತವ್ಯ,'' ಎನ್ನುವ ಅಭಿಪ್ರಾಯಗಳೂ ವ್ಯಕ್ತವಾಗಿವೆ.
ಸ್ವಚ್ಛ ಭಾರತಕ್ಕಾಗಿ ಶ್ರೀಸಾಮಾನ್ಯರ ಮೇಲೆ ಇನ್ನಷ್ಟು ಹೊರೆ