ಈ ಪ್ರಸ್ತಾಪವನ್ನು ಹಣಕಾಸು ಸಚಿವಾಲಯ ಅಧಿಸೂಚನೆಗೊಳಿಸುವ ಮುನ್ನ ಇಪಿಎಫ್‌ಒ ಟ್ರಸ್ಟಿಗಳ ಮಂಡಳಿಯಲ್ಲಿ ಅನುಮೋದನೆ ಪಡೆಯಬೇಕಾಗುತ್ತದೆ. ಒಂದು ವೇಳೆ ಒಪ್ಪಿಗೆ ಸಿಕ್ಕಿದರೆ 2010-11ರ ನಂತರ ಪಿಎಫ್‌ಗೆ ಸಿಗುವ ಗರಿಷ್ಠ ಬಡ್ಡಿ ದರವಾಗಲಿದೆ. 2010-11ರಲ್ಲಿ ಶೇ.9.5ರ ಬಡ್ಡಿ ಇತ್ತು.
ಇಪಿಎಫ್‌ಒಗೆ 2016-17ರಲ್ಲಿ ಆದಾಯದ ಅಂದಾಜನ್ನು 34,844.42 ಕೋಟಿ ರೂ.ಗಳಿಂದ ಉನ್ನತ ಮಟ್ಟಕ್ಕೆ ಪರಿಷ್ಕೃತಗೊಳಿಸುವ ಸಾಧ್ಯತೆ ಇದೆ. ಇದರಿಂದ 2015-16ರ ಸಾಲಿಗೆ ಶೇ.9ರ ಬಡ್ಡಿ ದರವನ್ನೂ ಕೊಡಲು ಸಾಧ್ಯವಾಗಲಿದೆ ಎಂದು ಇಪಿಎಫ್‌ಒ ಟ್ರಸ್ಟಿ ಮತ್ತು ಭಾರತೀಯ ಮಜ್ದೂರ್ ಸಂಘದ ಕಾರ್ಯದರ್ಶಿ ಪಿ.ಜೆ ಬಾನ್ಸೂರ್ ತಿಳಿಸಿದ್ದಾರೆ.
ಸರಕಾರ ಮತ್ತು ಆರ್‌ಬಿಐ ಠೇವಣಿಗಳು ಮತ್ತು ಸಣ್ಣ ಉಳಿತಾಯ ಯೋಜನೆಗಳ ಬಡ್ಡಿ ದರಗಳನ್ನು ಕಡಿತಗೊಳಿಸಲು ಪರಿಶೀಲಿಸುತ್ತಿರುವ ಸಂದರ್ಭದಲ್ಲಿ ಪಿಎಫ್ ಬಡ್ಡಿಯನ್ನು ಹೆಚ್ಚಿಸಲು ಶಿಫಾರಸು ಮಾಡಲಾಗಿದೆ. ಈ ಹಿಂದೆ ಇಪಿಎಫ್‌ಒ ಸಮಿತಿಯ ಶಿಫಾರಸುಗಳಿಗೆ ಹಣಕಾಸು ಸಚಿವಾಲಯ ಆಕ್ಷೇಪಿಸಿದ್ದರೂ, ಅನುಮೋದಿಸಿರುವ ನಿರ್ದಶನಗಳೇ ಹೆಚ್ಚು.
ಹೊಸದಿಲ್ಲಿ: ನಿಮ್ಮ ಭವಿಷ್ಯನಿಧಿ ಹಣದ (ಪಿಎಫ್) ಮೇಲೆ 2015-16ರ ಸಾಲಿಗೆ ಬಡ್ಡಿ ದರ ಶೇ.8.75ರಿಂದ ಶೇ.8.95ಕ್ಕೆ ಏರಿಕೆಯಾಗುವ ಸಾಧ್ಯತೆ ಇದೆ. ಉದ್ಯೋಗಿಗಳ ಭವಿಷ್ಯನಿಧಿ ಸಂಘಟನೆಯ (ಇಪಿಎಫ್‌ಒ) ಹಣಕಾಸು ಸಮಿತಿಯು ಬಡ್ಡಿ ದರವನ್ನು ಶೇ.8.95ಕ್ಕೆ ಹೆಚ್ಚಿಸಲು ಶಿಫಾರಸು ಮಾಡಿದೆ.