ಸೆನ್ಸೆಕ್ಸ್ ಮತ್ತಷ್ಟು ಕುಸಿತ

ಮುಂಬಯಿ: ಮುಂಬಯಿ ಷೇರು ಮಾರುಕಟ್ಟೆಯಲ್ಲಿ ಕರಡಿಯ ಕುಣಿತ ಮುಂದುವರಿದಿದ್ದು, ಗುರುವಾರ 24,000 ಅಂಕಗಳಿಗಿಂತ ಕೆಳ ಮಟ್ಟಕ್ಕೆ ಸೂಚ್ಯಂಕ ಕುಸಿಯಿತು. ಕಳೆದ 20 ತಿಂಗಳಿನಲ್ಲಿ ಮೊದಲ ಬಾರಿಗೆ 23,862 ಅಂಕಗಳಿಗೆ ಇಳಿದು ವಹಿವಾಟು ಮುಕ್ತಾಯಗೊಳಿಸಿತು. ನಿಫ್ಟಿ 32 ಅಂಕ ಕಳೆದುಕೊಂಡು 7,276ಕ್ಕೆ ಸ್ಥಿರವಾಯಿತು.

ರಿಲಯನ್ಸ್ ಇಂಡಸ್ಟ್ರೀಸ್, ಹಿಂದುಸ್ತಾನ್ ಯುನಿಲಿವರ್ ಮುಂತಾದ ದಿಗ್ಗಜ ಕಂಪನಿಗಳ ಷೇರು ದರಗಳು ಇಳಿಯಿತು. ಅಮೆರಿಕದ ಕಚ್ಚಾ ತೈಲ ದರಗಳು ಬ್ಯಾರಲ್‌ಗೆ 27 ಡಾಲರ್‌ಗೆ ಕುಸಿದಿರುವುದು ಹಾಗೂ ಚೀನಾದ ಆರ್ಥಿಕ ಬೆಳವಣಿಗೆಯ ಮಂದಗತಿ ಹೂಡಿಕೆದಾರರನ್ನು ಕಂಗಾಲಾಗಿಸಿತು.

ಸೆನ್ಸೆಕ್ಸ್ 24,194.75ರ ಎತ್ತರದೊಂದಿಗೆ ವಹಿವಾಟು ಆರಂಭಿಸಿದರೂ, ನಂತರ 99 ಅಂಕ ಕಳೆದುಕೊಂಡಿತು. ಸೂಚ್ಯಂಕ ಬುಧವಾರ 417 ಅಂಕ ನಷ್ಟಕ್ಕೀಡಾಗಿತ್ತು. ಹೀಗಿದ್ದರೂ ಡಿಸೆಂಬರ್ ತ್ರೈಮಾಸಿಕದಲ್ಲಿ ಉತ್ತಮ ಫಲಿತಾಂಶ ಕಂಡಿರುವ ಎಕ್ಸಿಸ್ ಬ್ಯಾಂಕ್‌ನ ಷೇರು ದರ 5.21 ಪರ್ಸೆಂಟ್ ಏರಿತು.

ಚೀನಾದಲ್ಲಿ ಶಾಂಘೈ ಷೇರು ಸೂಚ್ಯಂಕ ಶೇ.3.23 ಕುಸಿಯಿತು. ಜಪಾನ್‌ನಲ್ಲಿ ನಿಕ್ಕಿ ಶೇ.2.43 ತಗ್ಗಿತು.