ನ್ಯೂಯಾರ್ಕ್ : ಫೇಸ್‌ಬುಕ್ ಸಿಇಒ ಜುಕರ್‌ಬರ್ಗ್ ಮತ್ತು ಅವರ ಪತ್ನಿಯು ತಮ್ಮ ಶೇ.99ರಷ್ಟು ಷೇರುಗಳನ್ನು ದೇಣಿಗೆ ನೀಡುವುದಾಗಿ ಕಳೆದ ಡಿಸೆಂಬರ್‌ನಲ್ಲಿ ಘೋಷಿಸಿದ್ದರು. ಈಗ ಕಂಪನಿಯ ಸಿಒಒ ಶೆರಿಲ್ ಸ್ಯಾಂಡ್‌ಬರ್ಗ್ ಅವರೂ ಇದೇ ಹಾದಿಯನ್ನು ಮುಂದುವರಿಸಿದ್ದಾರೆ.
3.1 ಕೋಟಿ ಡಾಲರ್ ಮೌಲ್ಯದ ಫೇಸ್‌ಬುಕ್‌ನ 2,90,000 ಷೇರುಗಳನ್ನು ನಾನಾ ಸಂಸ್ಥೆಗಳಿಗೆ ದಾನವಾಗಿ ನೀಡಲು 46 ವರ್ಷದ ಸ್ಯಾಂಡ್‌ಬರ್ಗ್ ನಿರ್ಧರಿಸಿದ್ದಾರೆ ಎಂದು ಸೆಕ್ಯೂರಿಟೀಸ್ ಅ್ಯಂಡ್ ಎಕ್ಸ್‌ಚೇಂಚ್ ಕಮಿಷನ್ ಹೇಳಿದೆ.
ಸ್ಯಾಂಡ್‌ಬರ್ಗ್ ದೇಣಿಗೆ ನಿಧಿಯಲ್ಲಿ ಲಕ್ಷಾಂತರ ಷೇರುಗಳಿದ್ದು, ಅವುಗಳನ್ನು ಸಮಾಜಮುಖಿ ಕಾರ್ಯಕ್ಕಾಗಿ ಬಳಸಲಾಗುತ್ತಿದೆ. ಅವರು ಈಗಾಗಲೇ ಲೀನ್ ಇನ್‌ನಂಥ ಮಹಿಳಾ ಸಬಲೀಕರಣದ ಸಂಸ್ಥೆಗಳಿಗೆ ಆರ್ಥಿಕ ನೆರವು ನೀಡಿದ್ದಾರೆ ಎಂದು ಸಿಲಿಕಾನ್‌ವ್ಯಾಲಿ.ಕಾಮ್ ವರದಿ ಮಾಡಿದೆ.
ಶಿಕ್ಷಣ ಸಂಸ್ಥೆಗಳು ಮತ್ತು ಬಡವರಿಗೆ ನೆರವಾಗುವಂಥ ಕೆಲಸಗಳಿಗೆ ದೇಣಿಗೆ ನೀಡಲು ಸ್ಯಾಂಡ್‌ಬರ್ಗ್ ಚಿಂತನೆ ನಡೆಸಿದ್ದಾರೆ. ಜುಕರ್‌ಬರ್ಗ್ ಅವರು ಚೊಚ್ಚಲ ಪುತ್ರಿಯ ಜನನದ ಸಂದರ್ಭದಲ್ಲಿ ತಮ್ಮ ಮತ್ತು ಪತ್ನಿಯ ಹೆಸರಲ್ಲಿ ಫೇಸ್‌ಬುಕ್‌ನಲ್ಲಿರುವ ಶೇ.99ರಷ್ಟು ಷೇರುಗಳನ್ನು(45 ಶತಕೋಟಿ ಡಾಲರ್) ಜನಪರ ಕಾರ್ಯಕ್ಕೆ ದಾನ ನೀಡುವುದಾಗಿ ಪ್ರಕಟಿಸಿದ್ದರು.
3.1 ಕೋಟಿ ಡಾಲರ್ ದೇಣಿಗೆ ಫೇಸ್‌ಬುಕ್ ಸಿಒಒ ಶೆರಿಲ್ ಸ್ಯಾಂಡ್‌ಬರ್ಗ್‌ರಿಂದ