ಹೊಸ ವರ್ಷ: ಸೆನ್ಸೆಕ್ಸ್ ಸಕಾರಾತ್ಮಕ ಆರಂಭ

ಮುಂಬಯಿ: ಮುಂಬಯಿ ಷೇರು ಮಾರುಕಟ್ಟೆ ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್ ಹೊಸ ವರ್ಷ 2016ರ ಮೊದಲ ದಿನವಾದ ಶುಕ್ರವಾರ 43 ಅಂಕಗಳ ಏರಿಕೆಯೊಂದಿಗೆ ಸಕಾರಾತ್ಮಕ ಆರಂಭವನ್ನು ಕಂಡಿತು. ಕಳೆದ ಒಂದು ತಿಂಗಳಿನಲ್ಲಿ ಇದು ಗರಿಷ್ಠ ಮಟ್ಟವಾಗಿದೆ. ಆಟೊಮೊಬೈಲ್, ಸರಕು ಮತ್ತು ರಿಯಾಲ್ಟಿ ವಲಯದ ಷೇರುಗಳು ಲಾಭ ಗಳಿಸಿತು.

ಸೆನ್ಸೆಕ್ಸ್ 26,160.90ಕ್ಕೆ ದಿನದಾಟ ಮುಕ್ತಾಯಗೊಳಿಸಿತು. ಡಿಸೆಂಬರ್ 1ರ ನಂತರ ಮುಕ್ತಾಯದ ವೇಳೆಯ ಗರಿಷ್ಠ ಅಂಕ ಇದಾಗಿದೆ. ನಿಫ್ಟಿ 16 ಅಂಕ ಗಳಿಸಿ 7,963ಕ್ಕೆ ಸ್ಥಿರವಾಯಿತು. ಬಹುತೇಕ ಅಂತಾರಾಷ್ಟ್ರೀಯ ಮಾರುಕಟ್ಟೆಗಳು ಹೊಸ ವರ್ಷ ಪ್ರಯುಕ್ತ ಮುಚ್ಚಿದ್ದವು. ಟಾಟಾ ಮೋಟಾರ್ಸ್‌ ಷೇರ ದರ ಶೆ.2.66ರಷ್ಟು ಏರಿತು. ಈ ನಡುವೆ ಗುರುವಾರ ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು 1,123 ಕೋಟಿ ರೂ. ಮೌಲ್ಯದ ಷೇರುಗಳನ್ನು ಖರೀದಿಸಿದ್ದರು.

ಒಟ್ಟು 2,951 ಷೇರುಗಳು ಲಾಭ ಗಳಿಸಿದರೆ, 834 ಷೇರುಗಳು ನಷ್ಟಕ್ಕೀಡಾಯಿತು. ಒಟ್ಟು ವಹಿವಾಙಟು 2,745 ಕೋಟಿ ರೂ.ಗಳಿಂದ 2,984 ಕೋಟಿ ರೂ.ಗೆ ಏರಿತು.