* 2018ರೊಳಗೆ ಎಲ್ಲರಿಗೂ ಎಲ್ಪಿಜಿ
* 2016-17ರಲ್ಲಿ ಪಾರದರ್ಶಕ ಎಲ್ಪಿಜಿ ಸಿಲಿಂಡರ್
ಹೊಸದಿಲ್ಲಿ: ಸರಕಾರ ಅಡುಗೆ ಅನಿಲ ಬಳಕೆದಾರರ ಅನುಕೂಲಕ್ಕಾಗಿ ಎಲ್ಪಿಜಿಯ ಸಹಾಯವಾಣಿಯನ್ನು ಶುಕ್ರವಾರ ಆರಂಭಿಸಿದೆ. ಅಡುಗೆ ಅನಿಲ ಸೋರಿಕೆ ಮುಂತಾದ ತುರ್ತು ಪರಿಸ್ಥಿತಿ ಉಂಟಾದಾಗ ಗ್ರಾಹಕರು 1906 ಸಂಖ್ಯೆಗೆ ಕರೆ ಮಾಡಿ ನೆರವು ಪಡೆಯಬಹುದು.
ಪೆಟ್ರೋಲಿಯಂ ಸಚಿವ ಧರ್ಮೇಂದ್ರ ಪ್ರಧಾನ್ ಅವರು ಶುಕ್ರವಾರ ಈ ಸಹಾಯವಾಣಿಗೆ ಚಾಲನೆ ನೀಡಿದರು. ನಂತರ ಮಾತನಾಡಿದ ಅವರು, 2016ರ ವರ್ಷವನ್ನು ಎಲ್ಪಿಜಿ ಗ್ರಾಹಕರ ವರ್ಷ ಎಂದು ಸರಕಾರ ಘೋಷಿಸಿದೆ. 2018ರ ಮುಕ್ತಾಯದೊಳಗೆ ದೇಶದ ಎಲ್ಲ ಕುಟುಂಬಗಳಿಗೆ ಅಡುಗೆ ಅನಿಲ ಪೂರೈಕೆ ಮಾಡುವ ಗುರಿಯನ್ನು ಹೊಂದಲಾಗಿದೆ ಎಂದರು.
''ದೇಶದ ಎಲ್ಲೆಡೆಗಳಲ್ಲಿಯೂ ಅಡುಗೆ ಅನಿಲದ ಲಭ್ಯತೆಯನ್ನು ಹೆಚ್ಚಿಸಲು 2016, 2017 ಮತ್ತು 2018ರಲ್ಲಿ ಹಲವು ಕ್ರಮಗಳನ್ನು ತೆಗೆದುಕೊಳ್ಳಲಾಗುವುದು. ಇಡೀ ಜನತೆಗೆ ಅಡುಗೆ ಅನಿಲ ಪೂರೈಸುವುದು ನಮ್ಮ ಗುರಿಯಾಗಿದೆ'' ಎಂದರು.
ಆನ್‌ಲೈನ್ ಮೂಲಕ ಎಲ್ಪಿಜಿ ಬಿಲ್ ನೀಡಲು ಪ್ರಾಯೋಗಿಕ ಯತ್ನ ನಡೆಯುತ್ತಿದೆ. 2016ರಲ್ಲಿ ಇದು ಸಾಧ್ಯವಾಗಲಿದೆ. 2016-17ರಲ್ಲಿ ಪಾರದರ್ಶಕ ಅಡುಗೆ ಅನಿಲ ಸಿಲಿಂಡರ್ ಕೂಡ ಬರಲಿದೆ ಎಂದರು. ಪಾರದರ್ಶಕ ಸಿಲಿಂಡರ್ ಬಂದರೆ, ಎಲ್ಪಿಜಿ ಡೀಲರ್‌ಗಳು ನಿಗದಿತ ಅನಿಲ ಪೂರೈಕೆಯಲ್ಲಿ ಗ್ರಾಹಕರನ್ನು ವಂಚಿಸಲು ಸಾಧ್ಯವಾಗದು ಎನ್ನಲಾಗುತ್ತಿದೆ.
* ಅಡುಗೆ ಅನಿಲ ಸೋರಿಕೆ ಸಂದರ್ಭ ನೆರವಿಗೆ ಹೆಲ್ಪ್‌ಲೈನ್ ಸಂಖ್ಯೆ 1906ಕ್ಕೆ ಕರೆ ಮಾಡಿ