ಹೊಸದಿಲ್ಲಿ :ಜನ ಸಾಮಾನ್ಯರು ಬಳಸುವ ಸಬ್ಸಿಡಿಯೇತರ ಅಡುಗೆ ಅನಿಲ ದರ ಪ್ರತಿ ಸಿಲಿಂಡರ್‌ಗೆ 49.5 ರೂ. ಹೆಚ್ಚಳವಾಗಿದೆ. ಆದರೆ, ಉಳ್ಳವರು ಬಳಸುವ ವಿಮಾನ ಇಂಧನದ ಬೆಲೆಯನ್ನು ಶೇ 10ರಷ್ಟು ಇಳಿಕೆ ಮಾಡಲಾಗಿದೆ.
ಸಮಾಧಾನದ ಅಂಶವೆಂದರೆ ಬಡವರ ಇಂಧನ ಸೀಮೆಎಣ್ಣೆ ಬೆಲೆ ಪ್ರತಿ ಲೀಟರ್‌ಗೆ 1.05 ರೂ. ಇಳಿಕೆಯಾಗಿದೆ. ಇದು ಸಹಾಯಧನೇತರ ಸೀಮೆಎಣ್ಣೆಗೆ ಮಾತ್ರ ಅನ್ವಯವಾಗುತ್ತದೆ. ಬೆಲೆ ಇಳಿಕೆಯಿಂದ 43.19 ರೂ. ಇದ್ದ ಸೀಮೆ ಎಣ್ಣೆ ಬೆಲೆ ಈಗ 42.14 ರೂ.ಗೆ ಇಳಿದಿದೆ. 14.2 ಕೆ.ಜಿ ತೂಕದ ಸಹಾಯಧನ ಇಲ್ಲದ ಎಲ್‌ಪಿಜಿ ಗ್ಯಾಸ್ ಸಿಲಿಂಡರ್ ಬೆಲೆಯನ್ನು 49.5 ರೂ ಹೆಚ್ಚಿಸಲಾಗಿದೆ. ವಾರ್ಷಿಕ 12 ಸಿಲಿಂಡರ್‌ಗಳ ಕೋಟ ಮುಗಿದ ಬಳಿಕ ಗ್ಯಾಸ್ ಕೊಳ್ಳುವವರಿಗೆ ಈ ಪರಿಷ್ಕೃತ ದರ ಅನ್ವಯವಾಗುತ್ತದೆ.
ಏವಿಯೇಷನ್ ಟರ್ಬೈನ್ ಫ್ಯೂಯೆಲ್ (ಎಟಿಎಫ್) ಬೆಲೆಯನ್ನು ಪ್ರತಿ ಲೀಟರ್‌ಗೆ 4, 428 ರೂ. ಇಳಿಕೆ ಮಾಡಿರುವುದು ವಿಮಾನಯಾನ ಸಂಸ್ಥೆಗಳಿಗೆ ವರದಾನವಾಗಲಿದೆ. ಇದರಿಂದ ವಿಮಾನ ಟಿಕೆಟ್ ದರಗಳು ಕಡಿಮೆಯಾಗುವ ಸಾಧ್ಯತೆ ಇದೆ. ಜತೆಗೆ, ನಷ್ಟದಲ್ಲಿ ನಡೆಯುತ್ತಿರುವ ವಿಮಾನಯಾನ ಸಂಸ್ಥೆಗಳು ಆರ್ಥಿಕವಾಗಿ ಚೇತರಿಸಿಕೊಳ್ಳಲೂ ಸಹಾಯಕವಾಗಲಿದೆ.
ಮೂರು ವರ್ಷಗಳಲ್ಲಿ ಎಲ್ಲರಿಗೂ ಎಲ್‌ಪಿಜಿ
ಹೊಸದಿಲ್ಲಿ: ಮುಂದಿನ ಮೂರು ವರ್ಷಗಳಲ್ಲಿ ದೇಶದಲ್ಲಿರುವ ಎಲ್ಲರಿಗೂ ಎಲ್‌ಪಿಪಿ ಸೌಲಭ್ಯ ಕಲ್ಪಿಸಿಯೇ ತೀರುತ್ತೇವೆ ಎಂದು ಶುಕ್ರವಾರ ಕೇಂದ್ರ ಸರಕಾರ ಘೋಷಿಸಿದೆ. ''2016 ಎಲ್‌ಪಿಜಿ ಗ್ರಾಹಕರಿಗೆ ಮಹತ್ವದ ವರ್ಷವಾಗಲಿದೆ. ಮುಂದಿನ ಮೂರು ವರ್ಷಗಳಲ್ಲಿ ಅಂದರೆ 2016, 2017 ಮತ್ತು 2018ರೊಳಗೆ ದೇಶದ ಸಮಸ್ತ ಜನತೆಗೂ ಅಡುಗೆ ಅನಿಲ ಒದಗಿಸುವುದು ನಮ್ಮ ಗುರಿ,'' ಎಂದು ಕೇಂದ್ರ ಇಂಧನ ಸಚಿವ ಧರ್ಮೇಂದ್ರ ಪ್ರಧಾನ್ ಹೇಳಿದರು.
ಸಹಾಯಧನರಹಿತ ಎಲ್‌ಪಿಜಿ ಬೆಲೆ ಏರಿಕೆ/ ವಿಮಾನ ಇಂಧನ ದರ ಇಳಿಕೆ