ಸ್ಫಟಿಕ ಮಣಿಗಳು ಬೆಣಚು ಕಲ್ಲಿನ ಶಿಲೆಗೆ ಸೇರಿದ್ದು, ಸಿಲಿಕಾನ್ ಡೈ ಆಕ್ಸೈಡ್‌ನಿಂದ ರಚನೆಗೊಂಡಿರುತ್ತದೆ. ಇದು ಸಾಮಾನ್ಯವಾಗಿ ಹಿಮಾಲಯದ ತಪ್ಪಲಿನಲ್ಲಿ ಹೇರಳವಾಗಿ ದೊರೆಯುತ್ತದೆ. ಸ್ಫಟಿಕವು ದೇಹದ ಉಷ್ಣತೆಯನ್ನು ಕಡಿಮೆ ಮಾಡುತ್ತದೆ. ಇದನ್ನು ಧರಿಸಿದಲ್ಲಿ ಮನುಷ್ಯನ ಮನಸು ಶಾಂತವಾಗಿರುತ್ತದೆ. ಜತೆಗೆ ಈ ಸ್ಫಟಿಕ ಮಣಿಯನ್ನು ಹಿಡಿದುಕೊಂಡು ಮಂತ್ರ ಜಪ ಮಾಡುವಾಗ ಮಂತ್ರಗಳಿಂದ ಆಗುವ ಕಂಪನ ತರಂಗಗಳು ಈ ಮಣಿಗಳಿಗೆ ವರ್ಗಾವಣೆಯಾಗಿ ಅವುಗಳಲ್ಲಿ ಶಕ್ತಿ ಹೆಚ್ಚುತ್ತದೆ. ಜತೆಗೆ ಇಂಥ ಮಣಿಗಳನ್ನು ಸ್ಪರ್ಶಿಸುವುದರಿಂದ ಕಿನ್ನತೆಗೊಳಗಾದವರು ಪರಿಹಾರವನ್ನು ಹೊಂದುತ್ತಾರೆ.
ಸ್ಫಟಿಕಗಳು ಪಾರದರ್ಶಕವಾಗಿ ಬಿಳಿಯ ಬಣ್ಣದಾಗಿರುತ್ತದೆ. ಇವುಗಳು ಬೇರೆ ಬೇರೆ ದೇಶಗಳಲ್ಲಿ ಅನೇಕ ಬಣ್ಣಗಳಲ್ಲಿ ದೊರೆಯುತ್ತವೆ. ಬಿಳಿ, ಹಳದಿ, ಗುಲಾಬಿ, ಕಂದು, ನೇರಳೆ ಬಣ್ಣಗಳು ಹೆಚ್ಚು ಬಳಕೆಯಲ್ಲಿವೆ.
ಸ್ಫಟಿಕದ ಉಪಯೋಗಗಳು:
*ಯಾರಿಗೆ ಕಂಕಣ ಭಾಗ್ಯ ತಡವಾಗಿದೆಯೋ ಅಂಥವರು ಹಳದಿ ಮಿಶ್ರಿತ ಸ್ಫಟಿಕ ಮಣಿಯನ್ನು ಧರಿಸುವುದರಿಂದ ಶೀಘ್ರದಲ್ಲಿಯೇ ಇವರಿಗೆ ಮದುವೆಯಾಗುವ ಯೋಗ ಕೂಡಿ ಬರುತ್ತದೆ.
*ದಂಪತಿಗಳಲ್ಲಿ ಒಳ ಜಗಳ ಇದ್ದರೆ ಅಂಥವರು ಗುಲಾಬಿ ಬಣ್ಣದ ಸ್ಫಟಿಕ ಮಣಿಯನ್ನು ಧರಿಸುವುದರಿಂದ ಅವರ ಮನಸು ಶಾಂತವಾಗುವುದಲ್ಲದೆ ಅಧ್ಯಾತ್ಮಿಕ ಸಾಧನೆಗಳ ಕಡೆ ಅವರ ಒಲವನ್ನು ತೋರಿಸುತ್ತದೆ.
*ಬಿಳಿ ಬಣ್ಣದ ಪಾರದರ್ಶಕ ಸ್ಫಟಿಕವನ್ನು ಅಧ್ಯಾತ್ಮದ ಸಾಧನೆಗೆ ಮತ್ತು ತಲೆ ನೋವು ಇದ್ದಾಗ ಅರ್ಧ ಗಂಟೆಯಷ್ಟು ಸಮಯ ತಲೆಯ ಹತ್ತಿರ ಇಟ್ಟುಕೊಂಡಾಗ ನೋವು ಉಪಶಮನವಾಗುತ್ತದೆ.
*ಅರೆ ತಲೆನೋವಿನಿಂದ ಬಳಲುತ್ತಿರುವವರು ಕಡು ನೀಲಿ ಸ್ಫಟಿಕವನ್ನು ಹಣೆಯ ಮೇಲೆ ಹತ್ತು ನಿಮಿಷ ಇಟ್ಟುಕೊಂಡರೆ ನೋವಿನಿಂದ ಮುಕ್ತಿ ಪಡೆಯಬಹುದು.
*ನೀಲಿ ಬಣ್ಣದ ಸ್ಫಟಿಕವನ್ನು ಗಂಟಲಿನ ಭಾಗದಲ್ಲಿ 25 ನಿಮಿಷ ಇಟ್ಟಾಗ ಗಂಟಲು ನೋವು ಕಡಿಮೆಯಾಗುತ್ತದೆ.
*ಗ್ಯಾಸ್ಟ್ರಿಕ್‌ನಿಂದ ಬಳಲುತ್ತಿರುವವರು ಹಳದಿ ಬಣ್ಣದ ಸ್ಫಟಿಕವನ್ನು 10 ನಿಮಿಷ ಹೊಟ್ಟೆಯ ಮೇಲೆ ಇಟ್ಟುಕೊಂಡರೆ ಈ ಸಮಸ್ಯೆ ಗಣನೀಯವಾಗಿ ಕಡಿಮೆಯಾಗುತ್ತದೆ.
*ಹೃದಯ ಸಂಬಂಧಿ ಕಾಯಿಲೆ ಹಾಗೂ ರಕ್ತದೊತ್ತಡದಿಂದ ಬಳಲುತ್ತಿರುವವರು ಗುಲಾಬಿ ಬಣ್ಣದ ಸ್ಫಟಿಕ ಮಣಿಯನ್ನು ಸುಮಾರು ಅರ್ಧ ಗಂಟೆಯಷ್ಟು ಎದೆಯ ಭಾಗದಲ್ಲಿ ಇಟ್ಟುಕೊಂಡರೆ ಅವರ ಆರೋಗ್ಯ ಸುಧಾರಿಸುತ್ತದೆ.
ಸಾಮಾನ್ಯವಾಗಿ ಸ್ಫಟಿಕ ಮಣಿಯನ್ನು ಎಲ್ಲರೂ ಧರಿಸಬಹುದು. ಆದರೆ ವೃಷಭ, ಮಿಥುನ, ಕಟಕ, ಕನ್ಯಾ, ತುಲಾ, ಮಕರ ಹಾಗೂ ಕುಂಭ ರಾಶಿಯವರು ಧರಿಸಿದರೆ ಉತ್ತಮ ಪರಿಣಾಮ ಬೀರುತ್ತದೆ. ಭರಣಿ, ಆರಿದ್ರಾ, ಪುಷ್ಯ, ಆಶ್ಲೇಷ, ಪುಬ್ಬ, ಅನುರಾಧಾ, ಜ್ಯೇಷ್ಠ, ಪೂರ್ವಾಷಾಢ, ಶತಃಭಿಷ, ರೇವತಿ ಈ ನಕ್ಷತ್ರದವರು ಈ ಸ್ಫಟಿಕವನ್ನು ಧರಿಸುವುದರಿಂದ ಹೆಚ್ಚಿನ ಅನುಕೂಲ ಹೊಂದುತ್ತಾರೆ.
- ಪ್ರಕಾಶ ಬಾಬು