ಬೆಂಗಳೂರು: ನಗರದಲ್ಲಿ ದರೋಡೆ ಕೃತ್ಯಗಳು ಮುಂದುವರಿದಿದ್ದು ಕೆಲಸ ಮುಗಿಸಿ ಮನೆಗೆ ತೆರಳುತ್ತಿದ್ದ ಟೆಕ್ಕಿಯೊಬ್ಬನನ್ನು ರಸ್ತೆಯಲ್ಲಿ ಅಡ್ಡಗಟ್ಟಿದ ದುಷ್ಕರ್ಮಿಗಳು ತಲೆಯ ಹಿಂಬಾಗಕ್ಕೆ ಚಾಕುವಿನಿಂದ ಇರಿದು ಮೊಬೈಲ್‌ ಮತ್ತು ಪರ್ಸ್‌ ಕಿತ್ತುಕೊಂಡು ಪರಾರಿಯಾಗಿದ್ದಾರೆ. ಹೆಣ್ಣೂರು ಪೊಲೀಸ್‌ ಠಾಣಾ ವ್ಯಾಪ್ತಿಯಲ್ಲಿ ಮಂಗಳವಾರ ರಾತ್ರಿ ಈ ಘಟನೆ ನಡೆದಿದೆ. ಎಚ್‌ಸಿಎಲ್‌ ಕಂಪನಿ ಉದ್ಯೋಗಿ ಸಂದೀಪ್‌ ಬರ್ಮನ್‌ (28) ದಾಳಿಗೊಳಗಾದವರು. ರಕ್ತಸ್ರಾವದ ನಡುವೆ ಅವರು ಮನೆಗೆ ತೆರಳಿದ್ದು, ಸಹೋದರಿ ನೆರವಿನಿಂದ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ರಾತ್ರಿ ಕೆಲಸ ಮುಗಿಸಿ ಕಂಪನಿಯ ಕ್ಯಾಬ್‌ನಲ್ಲಿ ಮರಳಿದ ಸಂದೀಪ್‌ ಕಲ್ಯಾಣನಗರದ ಕೆರೆ ಎದುರಿನ ಫುಡ್‌ಕೋರ್ಟ್‌ ಸಮೀಪ ಇಳಿದುಕೊಂಡು ಸಿಗರೇಟ್‌ ಸೇದುತ್ತಾ ಮನೆಗೆ ನಡೆದುಕೊಂಡು ಹೋಗುತ್ತಿದ್ದರು. ಈ ವೇಳೆ ಒಂದೇ ಬೈಕಿನಲ್ಲಿ ಬಂದ ಮೂವರಲ್ಲಿ ಇಬ್ಬರು ಸಂದೀಪ್‌ನನ್ನು ಅಡ್ಡಗಟ್ಟಿದ್ದು, ಮತ್ತೊಬ್ಬ ಕತ್ತಲೆಯಲ್ಲಿ ಬೈಕ್‌ ಸಮೇತ ನಿಂತಿದ್ದ. ಕನ್ನಡ-ತಮಿಳು ದರೋಡೆ ನಡೆಸಿದವರು ತನ್ನ ಜತೆಗೆ ಕನ್ನಡದಲ್ಲಿ ಮಾತನಾಡಿದ್ದಾರೆ. ಆದರೆ, ಪರಸ್ಪರ ತಮಿಳಿನಲ್ಲಿ ಮಾತನಾಡುತ್ತಿದ್ದರು. ಇಬ್ಬರ ಕೈಯಲ್ಲೂ ಮಾರಕಾಸ್ತ್ರಗಳಿದ್ದವು ಎಂದು ಸಂದೀಪ್‌ ಪೊಲೀಸರಿಗೆ ಮಾಹಿತಿ ನೀಡಿದ್ದಾನೆ.
ಅವರಿಬ್ಬರು ಸಂದೀಪನಿಗೆ ಜೇಬಿನಲ್ಲಿ ಇರುವುದನ್ನೆಲ್ಲ ಕೊಡು ಒತ್ತಾಯಿಸಿದ್ದು, 'ಕನ್ನಡ ಬರುವುದಿಲ್ಲ' ಎಂದು ಹೇಳಿದಾಗ ಜೇಬಿಗೆ ಕೈ ಹಾಕಿ ಎರಡೂ ಮೊಬೈಲ್‌ಗಳನ್ನು ಕಿತ್ತುಕೊಂಡು, ಪರ್ಸ್‌ ಕಿತ್ತುಕೊಳ್ಳಲು ಯತ್ನಿಸಿದ್ದಾರೆ. ಈ ವೇಳೆ ಪ್ರತಿರೋಧ ವ್ಯಕ್ತಪಡಿಸಿದ ಸಂದೀಪ್‌ನ ತಲೆ ಹಾಗೂ ಬೆನ್ನಿಗೆ ಚಾಕುವಿನಿಂದ ಇರಿದು ಅವರು ಪರಾರಿಯಾಗಿದ್ದಾರೆ.
↧
ಬೆಂಗಳೂರಿನಲ್ಲಿ ಮುಂದುವರೆದ ದರೋಡೆ ಕೃತ್ಯಗಳು
↧