ಮಹಾಲಕ್ಷ್ಮೀ ಲೇಔಟ್‌ ನಿವಾಸಿಯಾಗಿರುವ ಹೆಸರು ಹೇಳಲಿಚ್ಛಿಸದ ಪ್ರಾಧ್ಯಾಪಕರು ಮಾ.8ರಂದು ಬೆಳಗ್ಗೆ 5.30ಕ್ಕೆ ಹಾಲು ತರಲು ಸ್ಕೂಟರ್‌ನಲ್ಲಿ ತೆರಳುತ್ತಿದ್ದರು. ಅವರ ಜತೆ ಎಂದಿಗೂ ಹಿಂಬಾಲಿಸಿಕೊಂಡು ಹೋಗದ ಸಾಕು ನಾಯಿ ಲಿಯೋ ಆ ದಿನ ಪ್ರಾಧ್ಯಾಪಕರನ್ನು ಹಿಂಬಾಲಿಸಿಕೊಂಡು ಹೋಗಿದೆ.
ನಂದಿನಿ ಚಿತ್ರ ಮಂದಿರದ ಬಳಿ ಹಾಲು ತೆಗೆದುಕೊಂಡ ಪ್ರಾಧ್ಯಾಪಕರು ಮನೆಗೆ ಮರಳುತ್ತಿದ್ದಾಗ 15ನೇ ಕ್ರಾಸ್‌ನಲ್ಲಿ ಏಕಾಏಕಿ ಕಾರೊಂದು ಅಡ್ಡಗಟ್ಟಿ ಸ್ಕೂಟರ್‌ನ್ನು ನಿಲ್ಲಿಸಿದೆ. ಕಾರಿಂದ ಇಳಿದ ಮೂವರು ದುಷ್ಕರ್ಮಿಗಳು ಡ್ರ್ಯಾಗರ್‌ ಹಾಗೂ ಚಾಕು ತೆಗೆದು ಪ್ರಾಧ್ಯಾಪಕರ ಕುತ್ತಿಗೆ ಬಳಿ ಇಟ್ಟು ಸರ ನೀಡುವಂತೆ ಬೆದರಿಸಿದ್ದಾರೆ. ಅದೇ ವೇಳೆಗೆ ಸ್ವಲ್ಪ ದೂರದಲ್ಲೇ ಸ್ಕೂಟರ್‌ನ್ನು ಹಿಂಬಾಲಿಸಿಕೊಂಡು ಬರುತ್ತಿದ್ದ ಲಿಯೋ ಸಿನಿಮೀಯ ಶೈಲಿಯಲ್ಲಿ ದುಷ್ಕರ್ಮಿಗಳ ಮೇಲೆ ಎರಗಿದೆ. ನಾಯಿ ಮೈ ಮೇಲೆ ಎರಗುತ್ತಿದ್ದಂತೆ ಗಲಿಬಿಲಿಗೊಂಡ ದುಷ್ಕರ್ಮಿಗಳು ಕಾರು ಹತ್ತಿ ಸ್ಥಳದಿಂದ ಪರಾರಿಯಾದರು.
ದುಷ್ಕರ್ಮಿಗಳು ಬಂದಿದ್ದ ಕಾರಿನ ನೋಂದಣಿ ಸಂಖ್ಯೆಯೊಂದಿಗೆ ಪ್ರಾಧ್ಯಾಪಕರು ಮಹಾಲಕ್ಷ್ಮೀ ಲೇಔಟ್‌ ಪೊಲೀಸ್‌ ಠಾಣೆಗೆ ದೂರು ನೀಡಿದ್ದಾರೆ. ಸಮೀಪದ ಪ್ರದೇಶದಲ್ಲಿರುವ ಸಿಸಿ ಕ್ಯಾಮೆರಾ ಆಧರಿಸಿ ಆರೋಪಿಗಳ ಪತ್ತೆಗೆ ಶೋಧ ಕಾರ್ಯ ಮುಂದುವರಿದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ .
ಬೆಂಗಳೂರು: ನಸುಕಿನಲ್ಲಿ ಹಾಲು ತರಲು ತೆರಳಿದ್ದ ಪ್ರಾಧ್ಯಾಪಕರೊಬ್ಬರನ್ನು ದರೋಡೆಕೋರರ ಕೈಯಿಂದ ಅವರದ್ದೇ ಸಾಕುನಾಯಿ ರಕ್ಷಿಸಿದ ಘಟನೆ ನಗರದಲ್ಲಿ ನಡೆದಿದೆ.