ಮಕ್ಕಳ ಚಿತ್ರಗಳು ಸಾಮಾನ್ಯವಾಗಿ ಸಬ್ಸಿಡಿಗಾಗಿ ನಿರ್ಮಾಣ ಆಗುತ್ತವೆ ಅನ್ನುವ ಆರೋಪವಿದೆ. ಅದನ್ನು ಸುಳ್ಳಾಗಿಸಲಿದೆಯಂತೆ ಹೂ ಮನಸು ಚಿತ್ರ. ಮಕ್ಕಳ ಕನಸಿಗೆ ಬಣ್ಣ ತುಂಬುವಂತಹ ಪ್ರಯತ್ನ ಇಲ್ಲಾಗಿದೆಯಂತೆ. ಕನ್ನಡ ಸಿನಿಮಾ ರಂಗ ಮಕ್ಕಳ ಸಿನಿಮಾಗಳ ಕೊರತೆಯನ್ನು ಅನುಭವಿಸುತ್ತಿದೆ. ಕೆಲವರು ಸಬ್ಸಡಿಗಾಗಿಯೇ ಸಿನಿಮಾ ಮಾಡುವುದರಿಂದ, ಅವುಗಳು ಮಕ್ಕಳನ್ನು ತಲುಪುತ್ತಿಲ್ಲ ಎಂಬ ಆರೋಪ ಕೂಡ ಇದೆ. ಈ ಆರೋಪಗಳ ನಡುವೆಯೂ ಉತ್ತಮವಾದ ಮಕ್ಕಳ ಸಿನಿಮಾ ಮಾಡಿದ್ದಾರಂತೆ ನಿರ್ದೇಶಕ ಲಿಂಗರಾಜ್‌ ಬಳ್ಳಾರಿ. ಮಕ್ಕಳ ಕನಸಿಗೆ ಬಣ್ಣ ತುಂಬುವಂತಹ ಕತೆಯನ್ನು ಆಯ್ದುಕೊಂಡಿದ್ದು, ಹಾಗಾಗಿಯೇ ಚಿತ್ರಕ್ಕೆ ಹೂ ಮನಸು ಎಂದು ಹೆಸರಿಟ್ಟಿದ್ದಾರೆ. ಮಕ್ಕಳ ಮನಸು ಹೂವಿನಂಥದ್ದು. ಅದನ್ನು ತೀರಾ ಕಾಳಜಿಯಿಂದ ನೋಡಿಕೊಳ್ಳಬೇಕು. ಹಾಗೆ ನೋಡಿಕೊಳ್ಳದೇ ಇದ್ದರೆ, ಅವರ ಮೇಲೆ ಯಾವ ರೀತಿಯ ಪರಿಣಾಮ ಬೀರುತ್ತದೆ ಅನ್ನುವ ಅಂಶಗಳು ಕೂಡ ಸಿನಿಮಾದಲ್ಲಿವೆಯಂತೆ. ಹಾಗಾಗಿ ಟೈಟಲ್‌ನ ಅಡಿಬರಹದಲ್ಲಿ 'ಬೆಂಕಿಯಲ್ಲಿ ಅರಳಿದ ಹೂಗಳು' ಎಂದು ಬರೆಯಿಸಿದ್ದಾರೆ. ಈ ಸಿನಿಮಾದಲ್ಲಿ ಅನೇಕ ಹೊಸ ರೀತಿಯ ಸಂಗತಿಗಳು ಇವೆಯಂತೆ. ಶಿಕ್ಷ ಕನಾಗಿ ಸ್ವಯಂ ನಿವೃತ್ತಿ ಪಡೆದಿರುವ ನಾಯಕರಹಳ್ಳಿಯ ಬೋರೆಗೌಡರು ಈ ಸಿನಿಮಾವನ್ನು ನಿರ್ಮಾಣ ಮಾಡಿದ್ದಾರೆ. ತಮ್ಮ ವೃತ್ತಿ ಬದುಕಿಗೆ ಹೊಂದಾಣಿಕೆ ಆಗುವಂತಹ ಅನೇಕ ವಿಷಯಗಳು ಈ ಸಿನಿಮಾದಲ್ಲಿ ಇವೆಯಂತೆ. ಹಾಗಾಗಿ ಸಿನಿಮಾಗೆ ಹಣ ಹಾಕಿದ್ದಾರಂತೆ. ಕಿರುತೆರೆಯ ಖ್ಯಾತ ನಟಿ ವಾಣಿಶ್ರೀ ಇಲ್ಲಿ ವಿಭಿನ್ನ ಪಾತ್ರ ಪೋಷಿಸಿದ್ದಾರೆ. ಸಂಗೀತ ಶಿಕ್ಷಕಿಯಾಗಿ ಅವರಿಲ್ಲಿ ನಟಿಸಿದ್ದು, ಅನಾಥಮಕ್ಕಳನ್ನು ಸಾಕುವ ಪಾತ್ರ ಇದಾಗಿದೆಯಂತೆ. ತಾರಾಗಣದಲ್ಲಿ ಭರತ್‌, ಸೃಷ್ಟಿ, ರಮೇಶ್‌ ಭಟ್‌, ಚಿತ್ರಾಶಣೈ ಮುಂತಾದವರು ಇದ್ದಾರೆ. ಚಿತ್ರದಲ್ಲಿ ನಾಲ್ಕು ಹಾಡುಗಳಿದ್ದು, ವಿನಯ್‌ ರಂಗದೋಳ್‌ ಸಂಗೀತ ನಿರ್ದೇಶನದಲ್ಲಿ ಹಾಡುಗಳು ಮೂಡಿ ಬಂದಿವೆ.
↧
ಬೆಂಕಿಯಲ್ಲಿ ಅರಳಿದ ಹೂವು
↧