* ಪದ್ಮಾ ಶಿವಮೊಗ್ಗ
ಬಾಳ ಸಂಗಾತಿಗಳಾಗಿ ಹೊಸ ಜೀವನಕ್ಕೆ ಕಾಲಿಡಲಿರುವ ಯಶ್ ಮತ್ತು ರಾಧಿಕಾ ಪಂಡಿತ್ ತೆರೆಯ ಮೇಲೂ ಜೋಡಿಯಾಗಿ ಕಾಣಿಸಿಕೊಂಡಿರುವ ಚಿತ್ರ ಸಂತು ಸ್ಟ್ರೈಟ್ ಫಾರ್ವರ್ಡ್. ಮಹೇಶ್ ರಾವ್ ನಿರ್ದೇಶನದ ಈ ಚಿತ್ರ ಯಶ್ ಅಭಿಮಾನಿಗಳಿಗಾಗಿಯೇ ಮಾಡಿದಂತಿದೆ. ಅವರ ಹಿಂದಿನ ಚಿತ್ರಗಳಂತೆಯೇ ಬಿಲ್ಡಪ್‌ಗಳೇ ಹೆಚ್ಚು. ಕತೆಗಿಂತ ಹೀರೊಯಿಸಂಗೆ ಹೆಚ್ಚು ಪ್ರಾಮುಖ್ಯತೆ ನೀಡಲಾಗಿದೆ.
ಸಂತು (ಯಶ್) ಬಿರುಗಾಳಿ, ಗೂಳಿ, ಹುಲಿ. ತನ್ನ ಮನೆಯವರು, ಸ್ನೇಹಿತರ ತಂಟೆಗೆ ಬಂದವರನ್ನು ಕ್ಷಣ ಮಾತ್ರದಲ್ಲಿ ನೆಲಕಚ್ಚಿಸುತ್ತಾನೆ. ಒಮ್ಮೆ ಆತನ ಅವತಾರ ನೋಡಿದವರು ಮತ್ತೆ ಉಸಿರೆತ್ತುವುದಿಲ್ಲ. ಒಮ್ಮೆ ಅನನ್ಯ(ರಾಧಿಕಾ ಪಂಡಿತ್) ಳನ್ನು ನೋಡುತ್ತಾನೆ. ಮರುಳಾಗುತ್ತಾನೆ. ಸಂತುವನ್ನು ರೇಪಿಸ್ಟ್ ಅಂತ ಆಕೆ, ಆಕೆಯನ್ನು ಚೈನ್ ಕಳ್ಳಿ ಎಂದು ಆತ ಕನ್‌ಫ್ಯೂಸ್ ಮಾಡಿಕೊಳ್ಳುತ್ತಾರೆ. ಇದು ಬಗೆಹರಿಯುವ ಹೊತ್ತಿಗೆ ಸ್ನೇಹಿತರಾಗುತ್ತಾರೆ. ಕೈ ಹಿಡಿದರೆ ಬಿಡೋನಲ್ಲ ಸಂತು. ಆದರೆ, ಕೈ ಕೊಡಲು ಸಿದ್ಧಳಿಲ್ಲ ಅನನ್ಯ. ಇಬ್ಬರೂ ಆಕರ್ಷಿತರಾಗುವ ಹೊತ್ತಿಗೆ ಅನನ್ಯ ಮದುವೆ ಅವಳ ಮಾವ ದೇವ್ (ಶಾಮ್)ನೊಂದಿಗೆ ಫಿಕ್ಸ್ ಆಗಿರೋದು ಗೊತ್ತಾಗುತ್ತದೆ. ಈತ ರೌಡಿ ಗ್ಯಾಂಗ್ ಇಟ್ಟುಕೊಂಡಿರುವ ದೊಡ್ಡ ಡಾನ್. ಮದುವೆ ದಿನವೂ ಫಿಕ್ಸ್. ಶಾಮ್‌ಗೂ ಯಶ್‌ಗೂ ನಡುವೆ ಪೈಪೋಟಿ. ಯಾರು ಅನನ್ಯಳನ್ನು ಮದುವೆಯಾಗುತ್ತಾರೆ ಎನ್ನುವುದೇ ಕ್ಲೈಮಾಕ್ಸ್. ಅನನ್ಯ ಸಂತುವನ್ನು ಪ್ರೀತಿಸುತ್ತಾಳಾ? ಯಶ್ ಅವಳನ್ನು ಪಡೆದುಕೊಳ್ಳಲು ಏನು ಪ್ಲಾನ್ ಮಾಡುತ್ತಾನೆ ಎನ್ನುವುದನ್ನು ಚಿತ್ರದಲ್ಲೇ ನೋಡಿ.
ಮೊದಲರ್ಧ ವೇಗವಾಗಿ ಲವಲವಿಕೆಯಿಂದ ಸಾಗುತ್ತದೆ ಚಿತ್ರ. ಕಾಮಿಡಿ ಡೈಲಾಗ್‌ಗಳು ಪ್ರೇಕ್ಷಕರನ್ನು ರಂಜಿಸುತ್ತವೆ. ದ್ವಿತಿಯಾರ್ಧ ಇಬ್ಬರ ನಡುವಿನ ಟಕ್ಕರ್‌ನಿಂದಾಗಿ ಎಳೆದಾಡಲಾಗಿದೆ. ಅಪ್ಪ ಅಮ್ಮನ ಮುದ್ದಿನ ಮಗನಾಗಿ, ಪವರ್‌ಫುಲ್ ಹುಡುಗನಾಗಿ, ತಂಗಿಯನ್ನು ಗೋಳು ಹೊಯ್ದುಕೊಳ್ಳುವ ಅಣ್ಣನಾಗಿ ಯಶ್ ಹಿರಿಯರನ್ನು ಗೌರವಿಸುವ, ಕಿರಿಯರನ್ನು ಬೆಳೆಸುವ ಬಗ್ಗೆ ಉವಾಚಗಳನ್ನು ಮಾಡುತ್ತಾ, ಚುಡಾಯಿಸುವವರನ್ನು ಚಚ್ಚುತ್ತಾರೆ. ಚಿತ್ರದಲ್ಲಿ ಪ್ರೀತಿ ವ್ಯಕ್ತಪಡಿಸುವುದು ಎಷ್ಟು ಮುಖ್ಯ ಎನ್ನುವುದನ್ನು ಹೇಳಲು ಸಯ್ಯದ್ ಕುಟುಂಬದ ಕತೆಯನ್ನು ತರಲಾಗಿದೆ. ಚಿತ್ರದಲ್ಲಿ ವ್ಹಾವ್ ಎನ್ನುವಂಥ ಪಂಚಿಂಗ್ ಡೈಲಾಗ್‌ಗಳು ಇವೆ. ನಗಿಸಲು ಇದು ಸಹಾಯಕವಾಗಿದ್ದರೂ, ಚಿತ್ರದಲ್ಲಿ ಸಂಭಾಷಣೆಯದ್ದೇ ಮೇಲುಗೈ. ಪಕ್ಕಾ ಕಮರ್ಷಿಯಲ್ ಚಿತ್ರವಿದು. ಯಶ್ ತಮ್ಮ ಸ್ಟೈಲಿಶ್ ಆಕ್ಟಿಂಗ್‌ನಿಂದ, ಲುಕ್‌ನಿಂದ ಎಲ್ಲರನ್ನು ರಂಜಿಸುತ್ತಾರೆ. ರಾಧಿಕಾ ಪಂಡಿತ್ ಕೂಡಾ ಕಡಿಮೆ ಏನಿಲ್ಲ. ಉಳಿದ ನಟರೂ ತಮ್ಮ ಪಾತ್ರಕ್ಕೆ ನ್ಯಾಯ ಒದಗಿಸಿದ್ದಾರೆ.
ಚಿತ್ರದಲ್ಲಿ ಹೇಳಿಕೊಳ್ಳುವಂತ ಕತೆ ಇಲ್ಲ. ಪ್ರೇಕ್ಷಕ ಭಯಂಕರ ಸೀರಿಯಸ್ ಫೈಟ್ ಅಂದುಕೊಂಡು ನೋಡಿದ್ದನ್ನು ಯಶ್ ತಮ್ಮ ಒಂದು ಡೈಲಾಗ್‌ನಿಂದ ಅದನ್ನು ನಕಲಿ ಮಾಡುತ್ತಾರೆ. ವೆಜ್ ಕಬಾಬ್‌ನಂತೆ. ನೋಡಿದಾಗ ಅನ್ನಿಸಿದ್ದು ತಿಂದಾಗ ಸಿಗುವುದಿಲ್ಲ. ಬಿಲ್ಡಪ್ ಜಾಸ್ತಿ. ಸೂತ್ರಗಳ ಬಂಧದಲ್ಲಿ ರಂಜನೀಯವಾಗಿ ಹೆಣೆದ ಮಾಮೂಲಿ ಸಿನಿಮಾ ಆದರೂ, ಒಮ್ಮೆ ಹಾಗೆ ಸುಮ್ಮನೆ ನೋಡಿ ಎಂಜಾಯ್ ಮಾಡಲು ಅಡ್ಡಿ ಇಲ್ಲ.
ಕನ್ನಡ ಚಿತ್ರ