ಸ್ಕ್ರಿಪ್ಟ್‌ ರೈಟರ್‌ ಪ್ರಿಯಾಂಕಾ ಪ್ರಿಯಾಂಕಾ ಉಪೇಂದ್ರ ನಟನೆಯ 'ಮಮ್ಮಿ ಸೇವ್‌ ಮಿ' ಚಿತ್ರ ಈ ವಾರ ರಾಜ್ಯಾದ್ಯಂತ ರಿಲೀಸ್‌ ಆಗಲಿದೆ. ಹಾರರ್‌ ಆ್ಯಂಡ್‌ ಥ್ರಿಲ್ಲರ್‌ ಇರುವ ಈ ಚಿತ್ರದ ಶೂಟಿಂಗ್‌ ಅನುಭವ ಹಾಗೂ ಮತ್ತಿತರ ವಿಷಯಗಳನ್ನು ಅವರಿಲ್ಲಿ ಹಂಚಿಕೊಂಡಿದ್ದಾರೆ. - ಪದ್ಮಾ ಶಿವಮೊಗ್ಗ * ಮಮ್ಮಿ ಚಿತ್ರಕ್ಕೆ ಎ ಸರ್ಟಿಫಿಕೇಟ್‌ ಕೊಟ್ಟಿದ್ದಾರೆ. ಏನನ್ನಿಸ್ತಿದೆ? - ಒಂದು ರೀತಿಯಲ್ಲಿ ಒಳ್ಳೆಯದೇ ಅನ್ನಿಸಿತು. ಏಕೆಂದರೆ ಚಿತ್ರ ಬಹಳ ಸ್ಕೇರಿ ಆಗಿದೆ. ಸೆನ್ಸಾರ್‌ ಮಂಡಳಿಯವರಿಗೇ ನೋಡೋಕೆ ಭಯ ಆಯ್ತಂತೆ. ಮಕ್ಕಳು ಹಾರರ್‌ ಸಿನಿಮಾ ನೋಡಲೇಬಾರದು. ದೊಡ್ಡವರಲ್ಲಿ ಥ್ರಿಲ್‌ ಬೇಕು ಅನ್ನೋರು, ಹಾರರ್‌ ಸಿನಿಮಾ ಇಷ್ಟಪಡೋರಿಗೆ ಡಿಫರೆಂಟ್‌ ಅನುಭವ ನೀಡುತ್ತೆ, ತುಂಬಾ ಇಷ್ಟವಾಗುತ್ತೆ. * ಇಪ್ಪತ್ತರ ಹರೆಯದ ಲೋಹಿತ್‌ ನಿರ್ದೇಶನದಲ್ಲಿ ನಟಿಸಲು ನೀವು ಒಪ್ಪಿದ್ದು ಹೇಗೆ? - ನಿರ್ದೇಶಕ ಚಿಕ್ಕ ವಯಸ್ಸಿನವರು ಅಂತ ಅನ್ನಿಸಿದ್ದು ನಿಜ. ಆದರೆ, ಅವರು ಮಾಡಿಕೊಂಡು ಬಂದಿದ್ದ ಟೀಸರ್‌ ನೋಡಿ ದಂಗಾದೆ. ಇವರಲ್ಲಿ ಪ್ರತಿಭೆ ಇದೆ ಅನ್ನಿಸಿತು. ಹಾಗಾಗಿ ಒಪ್ಪಿಕೊಂಡೆ. ದೃಶ್ಯಗಳು ಹೀಗೇ ಬರಬೇಕು ಅಂತ ಲೋಹಿತ್‌ ಪಟ್ಟು ಹಿಡಿದು ಮಾಡಿಸುತ್ತಿದ್ದರು. ಶೂಟಿಂಗ್‌ ಮುಗಿಸುವಷ್ಟರಲ್ಲಿ ಇಡೀ ಮನೆ ದೆವ್ವದ ಮನೆಯಂತೆಯೇ ಅನ್ನಿಸತೊಡಗಿತ್ತು. ಈ ಚಿತ್ರದಲ್ಲಿ ಹೀರೋ, ಹಿರೋಯಿನ್‌ ಛಾಯಾಗ್ರಾಹಕ ವೇಣು ಮತ್ತು ಸೌಂಡ್‌ ಎಫೆಕ್ಟ್ ನೀಡಿರುವ.... ಹಾಲಿವುಡ್‌ ಸಿನಿಮಾಗಳಲ್ಲಿರುವಂತೆ ಅಟ್‌ಮಾಸ್‌ ಸೌಂಡ್‌ ಎಫೆಕ್ಟ್ ಇದೆ. * ಮೊದಲ ಬಾರಿ ಹಾರರ್‌ ಸಿನಿಮಾದಲ್ಲಿ ನಟಿಸಿದ್ದೀರಿ. ಹೇಗನ್ನಿಸಿತು? - ಚಾಲೆಂಜಿಂಗ್‌ ಆಗಿತ್ತು. ಏಕೆಂದರೆ, ಲಾಂಗ್‌ ಶಾಟ್‌ಗಳಲ್ಲಿ ಎಮೋಷನ್‌ ಹಿಡಿದಿಡಬೇಕಿತ್ತು. ಬೇರೆ ಪಾತ್ರಗಳು ಕಡಿಮೆ. ಎಕ್ಸ್‌ಪ್ರೆಷನ್‌ನಲ್ಲೇ ಹೆಚ್ಚು ಕೆಲಸ ಇತ್ತು. ಮಗಳ ಜತೆ ಅಮ್ಮನ ಫೀಲಿಂಗ್ಸ್‌, ಮಗಳನ್ನು ಕಾಪಾಡಿಕೊಳ್ಳಲು ಅವಳು ಪಡುವ ಕಷ್ಟವೆಲ್ಲ ಎಮೋಷನಲ್‌ ಆಗಿವೆ. ಕನ್ನಡದಲ್ಲಿ ಕಾಮಿಡಿ ಹಾರರ್‌ ಸಿನಿಮಾ ನೋಡಿದ್ದೇವೆ. ಸೀರಿಯಸ್‌ ಹಾರರ್‌ ಚಿತ್ರಗಳು ಕಡಿಮೆ. ಮಮ್ಮಿ, ಎಮೋಷನ್‌ ಜತೆ ಹಾರರ್‌ ಜಾನರ್‌ ಚಿತ್ರ. ನಾನು ಗರ್ಭಿಣಿಯಾಗಿ ಕಾಣಿಸೋಕೆ ಹಾಕಿದ್ದ ಪ್ಯಾಡಿಂಗ್‌ ಬಹಳ ಅನ್‌ಕಂಫರ್ಟ ಆಗಿತ್ತು. ಹೊಟ್ಟೆಗೆ ರಬ್ಬರ್‌ ಟ್ಯೂಬ್‌ನಂತದ್ದನ್ನು ಕಟ್ಟಿಕೊಳ್ಳುತ್ತಿದ್ದೆ. ಕುಳಿತುಕೊಂಡಾಗ ಅದು ನನ್ನ ಎದೆಗೇ ಒತ್ತುತ್ತಿತ್ತು. ತುಂಬಾ ಹೊತ್ತು ಕೂರಲು ಸಾಧ್ಯವಾಗುತ್ತಿರಲಿಲ್ಲ. ಇಡೀ ರಾತ್ರಿ ಹೀಗಿರಬೇಕಿತ್ತು. ಸಹಜವಾಗಿರಲಿ ಅಂತ ಮೇಕಪ್‌ ಇಲ್ಲದೆ ನಟಿಸಿದ್ದೇನೆ. * ಟ್ರೇಲರ್‌ಗೆ ಸಿಕ್ಕ ಪ್ರತಿಕ್ರಿಯೆ ಹೇಗಿದೆ? - ಇಂಡಸ್ಟ್ರಿಯಿಂದ ಅನೇಕರು ಕಾಲ್‌ ಮಾಡಿ, ಟ್ರೇಲರ್‌ ಇಷ್ಟವಾಗಿದೆ ಅಂತ ಹೇಳುತ್ತಿದ್ದಾರೆ. ಮೇಕಿಂಗ್‌ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಅಮೂಲ್ಯ, ಧನಂಜಯ್‌, ಪುನೀತ್‌ ಫೋನ್‌ ಮಾಡಿದ್ದಾರೆ. ಉಪ್ಪಿಗೂ ಬಹಳ ಹಿಡಿಸಿದೆ. ಮಮ್ಮಿ ಸ್ಪೆಷಲ್‌ ಸಿನಿಮಾ ಅನ್ನಬಹುದು. * ಶೂಟಿಂಗ್‌ನಲ್ಲಿ ಭಯ ಪಟ್ಟಿದ್ದು ಇದೆಯಾ? - ಇಲ್ಲ. ಆದರೆ ಕಾಕತಾಳೀಯ ಎನ್ನುವಂತೆ ಒಂದಿಷ್ಟು ಘಟನೆಗಳು ನಡೆದವು. ರೆಸಾರ್ಟ್‌ನಲ್ಲಿ ಮನೆ ಸೆಟ್‌ ಹಾಕಿ ಶೂಟ್‌ ಮಾಡಿದ ಸಂದರ್ಭವದು. ಮಗಳಾಗಿ ನಟಿಸಿರೋ ಯುವಿನಾ ರಾತ್ರಿ ಹೊತ್ತು ಸೈಕಲ್‌ನಲ್ಲಿ ಹೋಗುತ್ತಿರುವಾಗ ಕೆಳಗೆ ಬೀಳುವ ದೃಶ್ಯ ಶೂಟ್‌ ಮಾಡಿದ್ದೆವು. ಅದಾದ ನಂತರ ಒಂದು ದಿನ ಮಧ್ಯರಾತ್ರಿ 2 ಗಂಟೆ ಆಗಿದೆ. ಯುವಿನಾ ಅಮ್ಮ ಫ್ರೆಶ್‌ ರೂಮ್‌ಗೆ ಎದ್ದು ಹೋಗಿ ಬಂದು ನೋಡಿದ್ರೆ ಯುವಿನಾ ಇರಲಿಲ್ಲ. ಸುತ್ತ ದಟ್ಟ ಕತ್ತಲು. ಭಯ ಹುಟ್ಟಿಸುವಂತೆ ಮರಗಳು ಇವೆ. ಹುಡುಕಿದಾಗ ಅವಳು ರಾತ್ರಿ ಕತ್ತಲಲ್ಲಿ ಸೈಕಲ್‌ ಹೊಡೆದುಕೊಂಡು ಹೋಗಿ ಬಿದ್ದು ಬಿಟ್ಟಿದ್ದಳು. ಅಷ್ಟು ಧೈರ್ಯ ಹೇಗೆ ಅವಳಿಗೆ ಬಂತು ಗೊತ್ತಿಲ್ಲ. ಇನ್ನೊಂದು ದಿನ ತಮಾಷೆ ನಡೀತು. ಶೂಟಿಂಗ್‌ಗೆ ಬಳಸಿದ್ದ ದೆವ್ವದ ಗೊಂಬೆಯನ್ನು ರೂಮಿನಲ್ಲಿ ಇಟ್ಟಿದ್ದಾಗ ಅಕಸ್ಮಾತ್‌ ಅದನ್ನು ನೋಡಿ ನನ್ನ ತಂಗಿ ಪಾತ್ರ ಮಾಡಿದಾಕೆ ಕಿರುಚಿಕೊಂಡು ಬಿದ್ದು ಬಿಟ್ಟಿದ್ದರು. ಆಗ ಹುಡುಗರೂ ಹೆದರಿದ್ದು ಇದೆ. * ನಿಮಗೆ ದೆವ್ವದಲ್ಲಿ ನಂಬಿಕೆ ಇದೆಯಾ? - ಇಲ್ಲ. ಆದರೆ, ಪಾಸಿಟಿವ್‌ ಮತ್ತು ನೆಗೆಟಿವ್‌ ಎನರ್ಜಿ ಇರೋದನ್ನು ನಂಬುತ್ತೇನೆ. ಇದರ ಅನುಭವ ನನಗಾಗಿದೆ. ನಾನು ದೇವರನ್ನು ನಂಬುತ್ತೇನೆ. ದೆವ್ವ ನಿಜಕ್ಕೂ ಇದೆಯಾ? ಅದು ಹೇಗಿದೆ ಗೊತ್ತಿಲ್ಲ. * ಮುಂದೆ ಯಾವ ಸಿನಿಮಾದ ಪ್ಲಾನ್‌ ಮಾಡಿದ್ದೀರಿ? - ಸದ್ಯ ಈ ಮಮ್ಮಿ ಚಿತ್ರ ರಿಲೀಸ್‌ಗೆ ಕಾದಿದ್ದೇನೆ. ಇನ್ನು ಉಪೇಂದ್ರ ಅವರ ಹೊಸ ಸಿನಿಮಾಕ್ಕೆ ಸ್ಕ್ರಿಪ್ಟ್‌ ಬರೆಯುತ್ತಿದ್ದೇನೆ. ನನಗೆಂದೇ ಇನ್ನೊಂದು ಸ್ಕ್ರಿಪ್ಟ್‌ ಅನ್ನೂ ಕೂಡ ರೆಡಿ ಮಾಡುತ್ತಿದ್ದೇನೆ. ನನಗೆ ಥ್ರಿಲ್ಲರ್‌ ಸಿನಿಮಾಗಳು ಇಷ್ಟ. ಸ್ವಲ್ಪ ಆ ಥರದ್ದೇ ಕತೆ ಮಾಡುತ್ತಿದ್ದೇನೆ. * ಸಂಸಾರ ಮತ್ತು ನಟನೆ ಇವೆರಡನ್ನೂ ಹೇಗೆ ನಿಭಾಯಿಸುತ್ತಿದ್ದೀರಿ? - ತುಂಬಾ ಕಷ್ಟವಾಗುತ್ತೆ. ಮನೆಯಲ್ಲಿ ಅಡುಗೆ ಮಾಡೋಕೆ ಕೆಲಸದವರನ್ನು ಇಟ್ಟುಕೊಂಡಿಲ್ಲ. ನಾನೇ ಮಾಡ್ತೀನಿ. ಮಕ್ಕಳ ಸ್ಕೂಲ್‌ ಹೋಮ್‌ವರ್ಕ್‌ ಮಾಡಿಸೋದು, ಮನೆ ಕೆಲಸದ ಒತ್ತಡದಲ್ಲಿ ಸ್ಕ್ರಿಪ್ಟ್‌ ಬರೆಯೋದು ಕಷ್ಟ ಆಗ್ತಿದೆ. ಎಲ್ಲರೂ ಮಲಗಿದ ಮೇಲೆ ಕಂಪ್ಯೂಟರ್‌ ಮುಂದೆ ಕೂರುತ್ತೇನೆ. ನಿರ್ದೇಶನ ಮಾಡುವ ಆಸೆ ಇದ್ದರೂ ಸದ್ಯಕ್ಕೆ ಅದು ಬೇಡ ಅಂದುಕೊಂಡಿದ್ದೇನೆ. ಮಕ್ಕಳು ದೊಡ್ಡವರಾದ ಮೇಲೆ ನೋಡೋಣ. .... ತೆಲುಗಿನಲ್ಲಿ ಚಿನ್ನಾರಿ ಹೆಸರಿನಲ್ಲಿ ಮಮ್ಮಿ ಚಿತ್ರ ತೆರೆ ಕಾಣ್ತಿದೆ. ಅಲ್ಲೂ ಟ್ರೇಲರ್‌ ಸುದ್ದಿ ಮಾಡಿದೆ. ಈಗ ನಾನು ಹೊಸ ಚಿತ್ರಕ್ಕೆ ಸ್ಕ್ರಿಪ್ಟ್‌ ವರ್ಕ್‌ ಕೂಡಾ ಮಾಡ್ತಿದ್ದೇನೆ. - ಪ್ರಿಯಾಂಕಾ ಉಪೇಂದ್ರ, ನಟಿ
↧
ಸ್ಕ್ರಿಪ್ಟ್‌ ರೈಟರ್‌ ಪ್ರಿಯಾಂಕಾ
↧