ಪ್ರಧಾನಿ ನರೇಂದ್ರ ಮೋದಿ ಕರೆ ನೀಡಿರುವ 'ಕ್ಯಾಶ್‌ಲೆಸ್‌ ಇಂಡಿಯಾ' ಕರೆಗೆ ಸಿನಿಮಾದವರು ತಮ್ಮದೇ ರೀತಿಯಲ್ಲಿ ಪ್ರತಿಕ್ರಿಯಿಸಿದ್ದಾರೆ. - ಹರೀಶ್‌ ಬಸವರಾಜ್‌ ಭಾರತವನ್ನು ಭ್ರಷ್ಟಾಚಾರ ಮುಕ್ತ ದೇಶ ಮಾಡಲು ಪ್ರಧಾನಿ ನರೇಂದ್ರ ಮೋದಿ, ನಗದು ರಹಿತ ವ್ಯವಹಾರಕ್ಕೆ ಕರೆ ನೀಡಿದ್ದಾರೆ. ಅನೇಕರು ನಾನಾ ರೀತಿಯಲ್ಲಿ ಇದಕ್ಕೆ ಪ್ರತಿಕ್ರಿಯಿಸಿದ್ದಾರೆ. ಸ್ಯಾಂಡಲ್‌ವುಡ್‌ನವರು ಇದಕ್ಕೆ ಏನಂತಾರೆ ಎಂಬುದಕ್ಕೆ ಇಲ್ಲಿದೆ ವಿವರ. ಕ್ರೈಮ್‌ ರೇಟ್‌ ಕಡಿಮೆ ಆಗುತ್ತೆ: ಕ್ಯಾಶ್‌ಲೆಸ್‌ ಇಂಡಿಯಾ ಮಾಡಲು ಹೊರಟಿರುವುದು ಒಳ್ಳೆಯ ಪ್ರಯತ್ನ ಎನ್ನುತ್ತಾರೆ ನೆನಪಿರಲಿ ಪ್ರೇಮ್‌. 'ಇದು ಮೊದಲೇ ಆಗಬೇಕಿತ್ತು. ಕ್ಯಾಶ್‌ಲೆಸ್‌ ಟ್ರಾನ್ಸ್ಯಾಕ್ಷನ್‌ನಿಂದ ಕ್ರೈಮ್‌ ರೇಟ್‌ ಕಡಿಮೆ ಆಗುತ್ತದೆ. ಈಗಾಗಲೇ ಅದರ ಎಫೆಕ್ಟ್ ಗೊತ್ತಾಗಿದೆ. 500 ಮತ್ತು 1000 ರೂ.ನೋಟ್‌ ರದ್ದು ಮಾಡಿದ ದಿನದಿಂದ ಲೆಕ್ಕ ಹಾಕಿದರೆ ಭಾರತದಲ್ಲಿ ಸಾಕಷ್ಟು ಕ್ರೈಮ್‌ಗಳು ಕಡಿಮೆ ಆಗಿವೆ. ನಾನೂ ಆನ್‌ಲೈನ್‌ ಬ್ಯಾಂಕಿಂಗ್‌ ಬಳಸುತ್ತೇನೆ. ಕ್ಯಾಶ್‌ ಕೊಡುವುದನ್ನು ಮತ್ತು ತೆಗೆದುಕೊಳ್ಳುವುದನ್ನು ಕಡಿಮೆ ಮಾಡಿದ್ದೇನೆ. ಮನೆಗೆ ರೇಷನ್‌ ತರುವುದು ಸೇರಿದಂತೆ ಏನೇ ಹಣಕಾಸಿನ ವ್ಯವಹಾರ ಇದ್ದರೂ ಆನ್‌ಲೈನ್‌ ಬ್ಯಾಂಕಿಂಗ್‌ ಮೂಲಕವೇ ಮಾಡುವುದು. ಇದರಿಂದ ಸಿನಿಮಾರಂಗಕ್ಕೆ ಹೊಡೆತ ಬೀಳುತ್ತದೆ ಎನ್ನುತ್ತಾರೆ, ಆದರೆ ಅದು ಸುಳ್ಳು. ಸಾಕಷ್ಟು ಮಲ್ಟಿಪ್ಲೆಕ್ಸ್‌ಗಳಲ್ಲಿ ಜನ ಈಗಾಗಲೇ ಕಾರ್ಡ್‌ ಬಳಸಲು ಆರಂಭಿಸಿದ್ದಾರೆ. ಈ ಕ್ಯಾಶ್‌ಲೆಸ್‌ ಮಾಡುವುದರಿಂದ ತೆರಿಗೆ ಕಳ್ಳರು ಮತ್ತು ಬ್ಲಾಕ್‌ ಮನಿ ಇರುವವರನ್ನು ಮಟ್ಟ ಹಾಕಬಹುದು' ಎನ್ನುವುದು ಇವರ ಅಭಿಪ್ರಾಯ. ಅಷ್ಟೊಂದು ಗೊತ್ತಿಲ್ಲ: ಆನ್‌ಲೈನ್‌ ಬ್ಯಾಂಕಿಂಗ್‌ ಬಗ್ಗೆ ಅಷ್ಟಾಗಿ ಗೊತ್ತಿಲ್ಲ ಎಂದು ಹೇಳಿದ್ದು ಸುದೀಪ್‌. 'ನನ್ನ ವ್ಯವಹಾರಗಳನ್ನು ನನ್ನ ತಾಯಿ ನೋಡಿಕೊಳ್ಳುತ್ತಾರೆ. ನನ್ನ ಬಳಿಯಾವುದೇ ಕ್ರೆಡಿಟ್‌ ಕಾರ್ಡ್‌ ಇಲ್ಲ. ನನಗೆ ಏನೇ ಬೇಕು ಎಂದರೆ ನಮ್ಮ ಹುಡುಗರು ನೋಡಿಕೊಳ್ಳುತ್ತಾರೆ. ಇನ್ನು ಈ ಪ್ರಕ್ರಿಯೆ ಒಳ್ಳೆಯದು. ಅಷ್ಟು ಬಿಟ್ಟರೆ ನಾನು ಯಾವುದನ್ನೂ ಬಳಸಿರದ ಕಾರಣ ಈ ವಿಷಯದ ಬಗ್ಗೆ ಮಾತನಾಡಲು ಇಷ್ಟಪಡುವುದಿಲ್ಲ' ಎನ್ನುತ್ತಾರೆ. ಇದು ವರ್ಕ್‌ ಆಗಲ್ಲ: ಈ ಕ್ಯಾಶ್‌ಲೆಸ್‌ ಟ್ರಾನ್ಸ್ಯಾಕ್ಷನ್‌ ಭಾರತದಲ್ಲಿ ವರ್ಕ್‌ ಆಗುತ್ತದೆ ಎಂದು ತಮಗೆ ಅನಿಸಲ್ಲ ಎಂದಿದ್ದು ಆ ದಿನಗಳು ಖ್ಯಾತಿಯ ಚೇತನ್‌. 'ನಮ್ಮ ದೇಶದಲ್ಲಿ ಶೇ. 2ರಷ್ಟು ಮಂದಿ ಮಾತ್ರ ಕಾರ್ಡ್‌ ಇಟ್ಟುಕೊಂಡಿದ್ದಾರೆ. ಉಳಿದ 98ರಷ್ಟು ಜನರಲ್ಲಿ ಯಾವುದೇ ಕಾರ್ಡ್‌ ಇಲ್ಲ, ಅವರಿಗೆ ತೊಂದರೆ ಆಗುತ್ತದೆ. ಆರ್ಥಿಕ ಸಮಾನತೆ, ಭ್ರಷ್ಟಾಚಾರ ನಿರ್ಮೂಲನೆ ಮಾಡಲು ಈ ರೀತಿ ಮಾಡುತ್ತಿದ್ದೇವೆ ಎಂದು ಹೇಳುತ್ತಾರೆ, ಆದರೆ ಅದಕ್ಕೆ ಸಾಕಷ್ಟು ಮಾರ್ಗಗಳಿವೆ. ಅದನ್ನು ಬಿಟ್ಟು ಸಾಮಾನ್ಯ ಜನರಿಗೆ ತೊಂದರೆ ಕೊಡುವಂತಹ ಕೆಲಸ ಮಾಡುತ್ತಿದ್ದಾರೆ ಎನಿಸುತ್ತಿದೆ. ಇನ್ನು ನನ್ನ ಬಳಿ ಯಾವುದೇ ಕಾರ್ಡ್‌ ಇಲ್ಲ, ಆನ್‌ಲೈನ್‌ ಬ್ಯಾಂಕಿಂಗ್‌ ಸಹ ಬಳಸಲ್ಲ. ಅಮೆರಿಕದಲ್ಲಿ ಓದುತ್ತಿದ್ದಾಗ ಸ್ವಲ್ಪ ಬಳಸುತ್ತಿದ್ದೆ. ಬೆಂಗಳೂರಿನಲ್ಲಿ ನಮ್ಮ ಮನೆಯ ಬಳಿ ಬ್ಯಾಂಕ್‌ ಇದೆ. ಅಲ್ಲಿಗೆ ಹೋಗಿ ಹಣ ಡ್ರಾ ಮಾಡಿಕೊಂಡು ಬಳಸುತ್ತೇನೆ. ಕ್ಯಾಶ್‌ಲೆಸ್‌ ಸೊಸೈಟಿ ಎಂಬುದು ಇವತ್ತಿಗೆ ಭಾರತಕ್ಕೆ ಒಳ್ಳೆಯ ಯೋಚನೆ ಅಲ್ಲ. ಒಳ್ಳೆಯ ಪ್ರಕ್ರಿಯೆ: ಈ ಕ್ಯಾಶ್‌ಲೆಸ್‌ ಸೊಸೈಟಿ ಮಾಡಲು ಹೊರಟಿರುವುದು ಬಹಳ ಒಳ್ಳೆಯದು ಎನ್ನುತ್ತಾರೆ ಮಯೂರಿ. 'ನಾನು ಜಾಸ್ತಿ ಕ್ಯಾಶ್‌ ಟ್ರಾನ್ಸ್ಯಾಕ್ಷನ್‌ ಮಾಡುವುದೇ ಇಲ್ಲ. ನನ್ನ ಮತ್ತು ನಮ್ಮ ತಾಯಿಯ ಮೊಬೈಲ್‌ ರೀಚಾರ್ಜ್‌ ಮತ್ತು ಇನ್ನಿತರ ಯಾವುದೇ ಕೆಲಸಗಳಿಗೆ ನಮ್ಮ ಬ್ಯಾಂಕಿನ ಮೊಬೈಲ್‌ ಆ್ಯಪ್‌ ಬಳಸುತ್ತೇನೆ. ಕಾರ್ಡ್‌ ಸ್ವೈಪ್‌ ಮಾಡಿದಾಗ ಕೆಲ ಬಾರಿ ಸಣ್ಣ ಪುಟ್ಟ ನ್ಯೂನ್ಯತೆಗಳು ಆಗಿವೆ. ಆದರೆ ಈ ಕ್ಯಾಶ್‌ಲೆಸ್‌ ಸೊಸೈಟಿ ಮಾಡುವುದರ ಮೂಲಕ ದೇಶದ ಪ್ರತಿಯೊಬ್ಬ ನಾಗರಿಕರನಿಗೂ ಬ್ಯಾಂಕಿಂಗ್‌ ಬಗ್ಗೆ ಮಾಹಿತಿ ಹೆಚ್ಚುತ್ತದೆ' ಎಂಬುದು ಈ ನಟಿಯ ವಿವರ. ಉಪ್ಪಿ ಡ್ರೀಮ್‌ ಕ್ಯಾಶ್‌ಲೆಸ್‌ ಸೊಸೈಟಿ ಎನ್ನುವುದು ಉಪೇಂದ್ರ ಅವರ ಕನಸಾಗಿತ್ತಂತೆ. ಈ ಬಗ್ಗೆ ಟ್ವೀಟ್‌ ಮಾಡಿರುವ ಈ ನಟ, ಪ್ರಧಾನಿ ನರೇಂದ್ರ ಮೋದಿಯವರಿಗೆ ಧನ್ಯವಾದ ಅರ್ಪಿಸಿದ್ದಾರೆ. ಉಪ್ಪಿ ಯೋಚನೆಗಳು ಸಾಕಷ್ಟು ಡಿಫರೆಂಟ್‌ ಆಗಿರುತ್ತವೆ. ಕ್ಯಾಶ್‌ಲೆಸ್‌ ಸೊಸೈಟಿಯ ಬಗ್ಗೆ ಇವರು ತಮ್ಮ ಸಿನಿಮಾಗಳಲ್ಲಿ ಮಾತನಾಡಿದ್ದಾರೆ. ನೋಟು ಬ್ಯಾನ್‌ ಆದ ದಿನದಿಂದ ಮೋದಿಯವರಿಗೆ ಬೆಂಬಲ ಸೂಚಿಸಿರುವ ಉಪ್ಪಿ ಈಗ ಕ್ಯಾಶ್‌ಲೆಸ್‌ ಸೊಸೈಟಿಗೂ ಬೆಂಬಲ ವ್ಯಕ್ತಪಡಿಸಿದ್ದಾರೆ.
↧
ಕ್ಯಾಶ್‌ಲೆಸ್‌ ಸೊಸೈಟಿ: ಕೊಂಚ ಅಡಚಣಿ ಹೆಚ್ಚಿದ ಬೆಂಬಲ ದನಿ
↧