ಇಸ್ಲಾಮಾಬಾದ್‌: ಪಾಕಿಸ್ತಾನದ ಬಲೂಚಿಸ್ತಾನ್‌ ಪ್ರಾಂತ್ಯದಲ್ಲಿ ಇತ್ತೀಚೆಗಷ್ಟೇ ಕಾರ್ಯಾಚರಣೆ ಆರಂಭಿಸಿದ ಗ್ವಾದರ್‌ ರೇವು ಬಳಕೆಗೆ ಅವಕಾಶ ನೀಡಬೇಕೆಂಬ ರಷ್ಯಾ ಮನವಿಗೆ ಪಾಕಿಸ್ತಾನ ಸರಕಾರ ಸಮ್ಮತಿ ಸೂಚಿಸಿದೆ. ದಶಕಗಳ ಕಾಲದ ಶೀತಲ ಸಮರದಿಂದ ವಿಷಮಿಸಿದ್ದ ರಷ್ಯಾ ಮತ್ತು ಪಾಕಿಸ್ತಾನ ದ್ವಿಪಕ್ಷೀಯ ಸಂಬಂಧ ತಿಳಿಗೊಳ್ಳಲು ಗ್ವಾದರ್‌ ರೇವು ಸ್ನೇಹಸೇತುವಾಗಿ ಪರಿಣಮಿಸಿದೆ. ಇರಾನ್‌ ಮತ್ತು ಟರ್ಕ್‌ಮೆನಿಸ್ತಾನ್‌ ರಾಷ್ಟ್ರಗಳು ಗ್ವಾದರ್‌ ರೇವಿನ ಮೂಲಕರಫ್ತು ವಹಿವಾಟು ನಡೆಸಲು ಪಾಕಿಸ್ತಾನದ ಸ್ನೇಹ ಚಾಚಿದ ಬಳಿಕ ರಷ್ಯಾ, ಅದೇ ಮಾರ್ಗ ತುಳಿದಿದೆ. ಜತೆಗೆ, ಪಾಕಿಸ್ತಾನದ ಜತೆ ಕಾರ್ಯತಂತ್ರ ರಕ್ಷಣಾ ಒಪ್ಪಂದ ಮಾಡಿಕೊಳ್ಳುವ ಉದ್ದೇಶವನ್ನು ಸಹ ಅದು ಹೊಂದಿದೆ ಎಂದು ಜಿಯೊ ನ್ಯೂಸ್‌ ವರದಿ ಮಾಡಿದೆ. ಅಮೆರಿಕ ಜತೆಗಿನ ಸಂಬಂಧ ಹಳಸುತ್ತಿರುವುದರಿಂದ ಕಾರ್ಯತಂತ್ರ ಪಾಲುದಾರಿಕೆಯನ್ನು ಹೆಚ್ಚಿಸುವ ಇರಾದೆ ಹೊಂದಿರುವ ಪಾಕಿಸ್ತಾನ, ಇದೀಗ ಇತರೆ ರಾಷ್ಟ್ರಗಳ ಜತೆ ಸಂಬಂಧ ಬಲವರ್ಧನೆಗೆ ಹಾತೊರೆಯುತ್ತಿದೆ. ಚೀನಾ-ಪಾಕಿಸ್ತಾನದ ಕಾರಿಡಾರ್‌ ಯೋಜನೆಯಾಗಿರುವ ಗ್ವಾದರ್‌ ರೇವಿನಲ್ಲಿ ಪಾಲ್ಗೊಳ್ಳುವಿಕೆಗೆ ರಷ್ಯಾ ಉತ್ಸಾಹ ತೋರುತ್ತಿದೆ ಎಂದು ಮಾಧ್ಯಮ ವರದಿ ಮಾಡಿದೆ.
↧
ಗ್ವಾದರ್‌ ರೇವು ಬಳಕೆ: ರಷ್ಯಾ ಮನವಿಗೆ ಪಾಕ್‌ ಸಮ್ಮತಿ
↧