ಫಿಡೆಲ್‌ ಇಲ್ಲದ ಕ್ಯೂಬಾ: ಶೋಕ ಸಾಗರದಲ್ಲಿ ಮುಳುಗಿದ ಜನತೆ

ಧೀಮಂತ ನಾಯಕನಿಗೆ ದೇಶದ ನಾಗರಿಕರ ಗೌರವ ನಮನ

ಹವಾನಾ: ಶತಮಾನದ ಕ್ರಾಂತಿಕಾರಿ ನಾಯಕ ಫಿಡೆಲ್‌ ಕ್ಯಾಸ್ಟ್ರೊ ಅಗಲಿಕೆಗೆ ಕ್ಯೂಬಾ ಜನತೆ ಶೋಕ ಸಾಗರದಲ್ಲಿ ಮುಳುಗಿದೆ. ಕಮ್ಯುನಿಸ್ಟ್‌ ದ್ವೀಪ ರಾಷ್ಟ್ರದ ದಿಗ್ಗಜನಾಗಿ, ವಿಶ್ವದ ಕ್ರಾಂತಿಕಾರಿ ನಾಯಕನಾಗಿ ಮೆರೆದು, ಮರೆಯಾದ ಕ್ಯಾಸ್ಟ್ರೊಗೆ ಅಂತಿಮ ಗೌರವ ನಮನ ಸಲ್ಲಿಸಲು ಇಡೀ ರಾಷ್ಟ್ರವೇ ಸಿದ್ಧವಾಗುತ್ತಿದೆ.

ಮಹಾನ್‌ ನಾಯಕನಿಗೆ ಗೌರವ ನಮನ ಸಲ್ಲಿಸುವ ಅಂಗವಾಗಿ ಕ್ಯೂಬಾದಲ್ಲಿ ಭಾನುವಾರ ಎಲ್ಲಾ ಅಧಿಕೃತ ವ್ಯಾವಹಾರಿಕ ಚಟುವಟಿಕೆಗಳಿಗೆ ತೆರೆ ಬಿದ್ದಿತ್ತು.

ವಜ್ರ ಮುಷ್ಠಿಯ ಶಿಸ್ತು, ಸಿದ್ಧಾಂತಗಳಿಂದಲೇ ವಿಶ್ವದ ದೊಡ್ಡಣ್ಣ ಅಮೆರಿಕವನ್ನು ಅರ್ಧ ಶತಮಾನದ ಕಾಲ ಎದುರು ಹಾಕಿಕೊಂಡೇ ದಿಟ್ಟ ಹೋರಾಟ ನಡೆಸಿದ ಕ್ಯಾಸ್ಟ್ರೊ 20ನೇ ಶತಮಾನದ ಮಹಾನ್‌ ನಾಯಕರಾಗಿ ಹೊರಹೊಮ್ಮಿದ್ದರು.

ಕ್ಯಾಸ್ಟ್ರೊ ಅವರಿಗೆ ಗೌರವ ನಮನ ಸಲ್ಲಿಸಲು ಹವಾನಾ ಸೇರಿದಂತೆ ದೇಶದ ನಾನಾ ನಗರಗಳಲ್ಲಿ ಸೋಮವಾರದಿಂದ ಸ್ಮರಣಾರ್ಥ ಕಾರ್ಯಕ್ರಮಗಳು ಆರಂಭವಾಗಲಿವೆ. ಹವಾನಾದ ಐತಿಹಾಸಿಕ ರೆವಲ್ಯೂಶನ್‌ ಸ್ಕ್ವೇರ್‌ನಲ್ಲಿ ಕ್ಯೂಬಾ ಜನತೆ ಒಂದುಗೂಡಿ, ಸಂತಾಪ ಸೂಚಿಸಲಿದ್ದಾರೆ.

ಡಿಸೆಂಬರ್‌ 4ರಂದು ಸಾಂಟಿಯಾಗೊ ನಗರದಲ್ಲಿ ಅಂತ್ಯಕ್ರಿಯೆ ನಡೆಯಲಿದೆ. ಅದಕ್ಕೂ ಮೊದಲು ದೇಶಾದ್ಯಂತ ಕ್ಯಾಸ್ಟ್ರೊ ಅವರ ಪಾರ್ಥಿವ ದೇಹದ ಅಂತ್ಯಯಾತ್ರೆ ನಡೆಯಲಿದೆ.

ಹವಾನಾದಲ್ಲಿ ಸದಾಗಿಜಿಗುಡುತ್ತಿದ್ದ ರಸ್ತೆಗಳು ನಾಯಕನನ್ನು ಕಳೆದುಕೊಂಡು ಮೌನಕ್ಕೆ ಶರಣಾಗಿವೆ. ಕ್ಯಾಸ್ಟ್ರೊ ಅಪಾರ ಅನುಯಾಯಿಗಳು ಮತ್ತು ಬೆಂಬಲಿಗರು ಶೋಕದಲ್ಲಿ ಮುಳುಗಿದ್ದಾರೆ.

''ಬಡವರು ಮತ್ತು ತುಳಿತಕ್ಕೆ ಒಳಗಾದವರಿಗೆ ಹೋರಾಟ ನಡೆಸಿದ ಕ್ಯಾಸ್ಟ್ರೊ ನನ್ನ ಜೀವಕ್ಕಿಂತ ದೊಡ್ಡದಾದ ವ್ಯಕ್ತಿತ್ವ. 1959ರ ಕ್ಯಾಸ್ಟ್ರೊ ದಂಗೆಗೆ ಮುನ್ನ ನಾನು ಬಡತನದ ಬೇಗೆಯಲ್ಲಿದ್ದೆ,'' ಎಂದು 82 ವರ್ಷದ ಅರೋರಾ ಮೆಂಡೆಜ್‌ ನೆನಪು ಮಾಡಿಕೊಂಡಿದ್ದಾರೆ.

'ಸಮಾಜವಾದದ ಘೋಷಣೆ ಅಳವಡಿಸಿಕೊಳ್ಳಿ, ಇಲ್ಲವೇ ಅಳಿಯಿರಿ' ಎಂದು ಕರೆ ನೀಡಿದ್ದ ಕ್ಯಾಸ್ಟ್ರೊ, ತಮ್ಮ ಜೀವನದ ಕೊನೆವರೆಗೂ ತಮ್ಮ ಸಿದ್ಧಾಂತಕ್ಕೆ ಬದ್ಧರಾಗಿದ್ದರು. ತಮ್ಮ ಮೇಲೆ 632 ಬಾರಿ ಹತ್ಯೆ ಪ್ರಯತ್ನಗಳು ನಡೆದರೂ ಕ್ಯಾಸ್ಟ್ರೊ ಎದೆಗುಂದಿರಲಿಲ್ಲ ಎಂದು ಅವರ ಸಮೀಪವರ್ತಿಗಳು ತಿಳಿಸಿದ್ದಾರೆ.