ನ್ಯೂಯಾರ್ಕ್‌: ಕ್ಯೂಬಾ ಧೀಮಂತ ನಾಯಕ ಫಿಡೆಲ್‌ ಕ್ಯಾಸ್ಟ್ರೊ ಅವರ ನಿಧನಕ್ಕೆ ಸಮಸ್ತ ವಿಶ್ವ ನಾಯಕರು ದುಃಖ ವ್ಯಕ್ತಪಡಿಸಿ, ಮೆಚ್ಚುಗೆ ಮಾತುಗಳ ಮೂಲಕ ಗೌರವ ನಮನ ಸಲ್ಲಿಸುತ್ತಿದ್ದರೆ, ಅಮೆರಿಕ ಚುನಾಯಿತ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಹೀಗಳಿಕೆಯ ಹೇಳಿಕೆ ನೀಡಿದ್ದಾರೆ. ''ಕ್ಯಾಸ್ಟ್ರೊ ಒಬ್ಬ ಕ್ರೂರ ಸರ್ವಾಧಿಕಾರಿ. ಸುಮಾರು ಆರು ದಶಕಗಳ ಕಾಲ ಕ್ಯೂಬಾದ ಸ್ವಂತ ಜನತೆಯನ್ನೇ ದಮನ ಮಾಡಿದ ಕ್ರೂರ ಸರ್ವಾಧಿಕಾರಿ ಅಳಿದಿರುವುದನ್ನು ಇಡೀ ವಿಶ್ವವೇ ಗುರುತಿಸುತ್ತಿದೆ,'' ಎಂದು ಟ್ರಂಪ್‌ ಹೇಳಿದ್ದಾರೆ. ಕ್ಯಾಸ್ಟ್ರೊ ಆಡಳಿತಾವಧಿಯು ಕ್ಯೂಬಾ ಜನರ ಪಾಲಿಗೆ ಮರೀಚಿಕೆಯಾಗಿತ್ತು. ಕಳ್ಳತನ, ಊಹಿಸಲಾಗದ ನರಳಾಟ, ಬಡತನ ಮತ್ತು ಮಾನವ ಹಕ್ಕುಗಳ ಉಲ್ಲಂಘನೆಯೇ ಕ್ಯಾಸ್ಟ್ರೊ ಆಡಳಿತದಲ್ಲಿ ರಾರಾಜಿಸಿದವು ಎಂದು ಟ್ರಂಪ್‌ ದೂರಿದ್ದಾರೆ. ''ನಿರಂಕುಶ ದ್ವೀಪ ರಾಷ್ಟ್ರವಾಗೇ ಉಳಿದಿರುವ ಕ್ಯೂಬಾದ ಜನರಿಗೆ ಕ್ಯಾಸ್ಟ್ರೊ ನಿಧನದ ಬಳಿಕವಾದರೂ ಜನತೆ ಸ್ವತಂತ್ರವಾಗಿ ಬದುಕುವ ಅವಕಾಶ ಸಿಗುತ್ತದೆ ಎಂಬ ಆಶಾವಾದ ನಮ್ಮದು. ಕ್ಯೂಬಾ ಜನತೆ ಸಮೃದ್ಧಿ ಮತ್ತು ಸ್ವಾತಂತ್ರ್ಯದೆಡೆಗೆ ಹೋಗಲು ತಮ್ಮ ಆಡಳಿತವು ಎಲ್ಲಾ ಅಗತ್ಯ ನೆರವು ಒದಗಿಸಲಿದೆ,'' ಎಂದು ಟ್ರಂಪ್‌ ಹೇಳಿದ್ದಾರೆ.
↧
ಕ್ಯಾಸ್ಟ್ರೊ ಕ್ರೂರ ಸರ್ವಾಧಿಕಾರಿ:ಸಲ್ಲದ ಮಾತಾಡಿದ ಟ್ರಂಪ್‌
↧