ಎಡವಿದ ಸೈನಾ, ಮುನ್ನಡೆದ ಸಿಂಧೂ

ಹಾಂಕಾಂಗ್‌ ಓಪನ್‌ ಬ್ಯಾಡ್ಮಿಂಟನ್‌ ಟೂರ್ನಿ

ಕೌಲೂನ್‌: ರಿಯೊ ಒಲಿಂಪಿಕ್‌ ಪದಕ ವಿಜೇತೆ ಪಿ.ವಿ. ಸಿಂಧೂ ಇಲ್ಲಿ ನಡೆಯುತ್ತಿರುವ ಹಾಂಕಾಂಗ್‌ ಓಪನ್‌ ಸೂಪರ್‌ ಸಿರೀಸ್‌ ಬ್ಯಾಡ್ಮಿಂಟನ್‌ ಟೂರ್ನಿಯ ಮಹಿಳೆಯರ ಸಿಂಗಲ್ಸ್‌ನಲ್ಲಿ ಸೆಮಿಫೈನಲ್‌ ಪ್ರವೇಶಿಸಿದ್ದಾರೆ. ಆದರೆ ಇತ್ತೀಚೆಗೆ ಗಾಯದಿಂದ ಚೇತರಿಸಿಕೊಂಡು ಕಣಕ್ಕಿಳಿದಿದ್ದ ಸೈನಾ ನೆಹ್ವಾಲ್‌ 8ರ ಘಟ್ಟದಲ್ಲಿ ಸೋತು ಟೂರ್ನಿಯಿಂದ ನಿರ್ಗಮಿಸಿದ್ದಾರೆ.

ಶುಕ್ರವಾರ ನಡೆದ ಮಹಿಳೆಯರ ಸಿಂಗಲ್ಸ್‌ ವಿಭಾಗದ ಕ್ವಾರ್ಟರ್‌ಫೈನಲ್‌ ಪಂದ್ಯದಲ್ಲಿ ಕಳೆದ ವಾರವಷ್ಟೇ ಚೀನಾ ಓಪನ್‌ ಗೆದ್ದಿರುವ ಸಿಂಧೂ 21-18, 21-23, 21-18 ಗೇಮ್‌ಗಳಿಂದ ಸಿಂಗಾಪುರದ ಕ್ಸಿಯೊಯು ಲಿಯಾಂಗ್‌ ವಿರುದ್ಧ ಪ್ರಯಾಸದ ಜಯ ದಾಖಲಿಸಿ ಮತ್ತೊಂದು ಪ್ರಶಸ್ತಿಯತ್ತ ಮಹತ್ವದ ಹೆಜ್ಜೆಯಿಟ್ಟಿದ್ದಾರೆ.

ಒಂದು ಗಂಟೆ, 19 ನಿಮಿಷ ನಡೆದ ಮ್ಯಾರಥಾನ್‌ ಹೋರಾಟದಲ್ಲಿ ಮೊದಲ ಗೇಮ್‌ ಗೆದ್ದ 9ನೇ ರಾರ‍ಯಂಕಿನ ಸಿಂಧೂ, ದ್ವಿತೀಯ ಗೇಮ್‌ನಲ್ಲಿ ಲಿಯಾಂಗ್‌ ಪ್ರಬಲ ಹೋರಾಟಕ್ಕೆ ಶರಣಾದರು. ಆದರೆ ನಿರ್ಣಾಯಕ ಗೇಮ್‌ನಲ್ಲಿ ಸಿಂಗಾಪುರ ಆಟಗಾರ್ತಿಯ ಸವಾಲನ್ನು ಬಗ್ಗು ಬಡಿದು ಪಂದ್ಯ ವಶಪಡಿಸಿಕೊಂಡರು. ಸಿಂಧೂ, ಫೈನಲ್‌ ಪ್ರವೇಶಕ್ಕಾಗಿ ಹಾಂಕಾಂಗ್‌ನ ಚೆವುಂಗ್‌ ಯಿ ಅವರ ಸವಾಲು ಎದುರಿಸಲಿದ್ದಾರೆ.

ಸೈನಾಗೆ ಮತ್ತೆ ನಿರಾಸೆ

ಮತ್ತೊಂದು ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ ಸೈನಾ 8-21, 21-18, 19-21 ಗೇಮ್‌ಗಳಿಂದ ಸ್ಥಳೀಯ ಪ್ರತಿಭೆ ಚೆವುಂಗ್‌ ವಿರುದ್ಧ ಪರಾಭವಗೊಂಡರು. ತೀವ್ರತರದ ಮೊಣಕಾಲಿನ ಗಾಯದಿಂದ ಇತ್ತೀಚೆಗಷ್ಟೇ ಚೇತರಿಸಿಕೊಂಡಿರುವ ಸೈನಾ ಕೇವಲ 12 ನಿಮಿಷಗಳ ಮೊದಲ ಗೇಮ್‌ನ ಹೋರಾಟದಲ್ಲಿ 8-21ರಿಂದ ಸೋಲುಂಡರು. ಆದರೆ ಬಳಿಕ ಪುಟಿದೆದ್ದ ನೂತನ ರಾರ‍ಯಂಕಿಂಗ್‌ನಲ್ಲಿ 11ನೇ ಸ್ಥಾನಕ್ಕೆ ಕುಸಿದಿರುವ ಸೈನಾ, 21-18ರಲ್ಲಿ ಎರಡನೇ ಗೇಮ್‌ ಗೆದ್ದು 1-1ರಲ್ಲಿ ತಿರುಗೇಟು ನೀಡಿದರು.

ಮೊದಲ ಗೇಮ್‌ನಲ್ಲಿ ಚುರುಕಿನ ಪಾದ ಚಲನೆ ತೋರದ ಮಾಜಿ. ನಂ.1 ಸೈನಾ, ದ್ವಿತೀಯ ಗೇಮ್‌ನಲ್ಲಿ ಎದುರಾಳಿ ಸವಾಲನ್ನು ಸಮರ್ಥವಾಗಿ ಹಿಮ್ಮೆಟ್ಟಿಸಿ ಮುನ್ನಡೆ ಗಳಿಸಿದರು. ಆದರೆ ಸತತ ಆರು ಪಾಯಿಂಟ್‌ ಗಳಿಸಿದ ಚೆವುಂಗ್‌ 11-7ರಲ್ಲಿ ಮೇಲುಗೈ ಸಾಧಿಸಿದರು. ವಿರಾಮದ ಬಳಿಕ ಪರಿಣಾಮಕಾರಿ ಆಟಕ್ಕೆ ಆದ್ಯತೆ ನೀಡಿದ ಭಾರತೀಯ ಆಟಗಾರ್ತಿ ಸತತ ಅಂಕ ಪಡೆದು 11-11ರಲ್ಲಿ ಪ್ರತಿ ಹೋರಾಟ ನೀಡಿದರು. ಈ ಹಂತದಲ್ಲಿ ಉಭಯ ಆಟಗಾರರಿಂದ 12-13, 14-14ರಿಂದ ಜಿದ್ದಾಜಿದ್ದಿನ ಕದನ ಏರ್ಪಟ್ಟರೂ ಸೈನಾ 17-16ರಲ್ಲಿ ಮುನ್ನಡೆ ಗಳಿಸಿದರು. ಇದಕ್ಕೆ ಬಗ್ಗದ ಹಾಂಕಾಂಗ್‌ ಆಟಗಾರ್ತಿ 16-16ರಲ್ಲಿ ತಿರುಗೇಟು ನೀಡಿದರು. ಆದರೆ ಅನುಭವದ ಆಟವಾಡಿದ ಸೈನಾ 21-18ರಲ್ಲಿ ಗೇಮ್‌ ವಶಪಡಿಸಿಕೊಳ್ಳುವಲ್ಲಿ ಯಶಸ್ವಿಯಾದರು.

ನಿರ್ಣಾಯಕ ಹಾಗೂ ಮೂರನೇ ಗೇಮ್‌ನಲ್ಲಿ ಸೈನಾ 7-3ರ ಅಂತರ ಕಾಯ್ದುಕೊಂಡರಾದರೂ ಸ್ಥಳೀಯ ಆಟಗಾರ್ತಿ ಚೆವುಂಗ್‌ ಸತತ ಐದು ಪಾಯಿಂಟ್‌ ತಂದು 9-9ರಲ್ಲಿ ದಿಟ್ಟ ಹೋರಾಟ ನೀಡಿದರಲ್ಲದೆ 11-10ರಲ್ಲಿ ಮುನ್ನಡೆ ಗಳಿಸಿದರು. ಚೆವುಂಗ್‌ ಗೇಮ್‌ ಜಯಿಸಲು ಮೂರು ಅಂಕ ಕೊರತೆ ಹೊಂದಿದ್ದ ವೇಳೆ ಸತತ ಆರು ಪಾಯಿಂಟ್‌ ಕಲೆಹಾಕಿ ಭಾರತೀಯ ಆಟಗಾರ್ತಿ ಹಿನ್ನಡೆಯನ್ನು 17-18ಕ್ಕೆ ತಗ್ಗಿಸಿದರಾದರೂ ಅಂತಿಮವಾಗಿ ಗೇಮ್‌ ಉಳಿಸಿಕೊಳ್ಳುವಲ್ಲಿ ಎಡವಿದರು. ಕಳೆದವಾರವಷ್ಟೇ ಚೀನಾ ಓಪನ್‌ನ ಆರಂಭಿಕ ಸುತ್ತಿನಲ್ಲೇ ಹೊರಬಿದ್ದಿದ್ದ ಸೈನಾ, ಈ ಸೋಲಿನೊಂದಿಗೆ ಹಾಂಕಾಂಗ್‌ ಪ್ರಶಸ್ತಿಯ ಆಸೆಯನ್ನು ಕೈಬಿಟ್ಟರು.