ಹೊಸದಿಲ್ಲಿ: ದೇಶದಲ್ಲಿ 500-1000 ರೂ. ನೋಟುಗಳನ್ನು ಅಮಾನ್ಯಗೊಳಿಸಿರುವುದರಿಂದ ಗ್ರಾಹಕರ ಅನುಕೂಲಕ್ಕಾಗಿ ಸ್ಯಾಮ್‌ಸಂಗ್‌ ಹೊಸ ಯೋಜನೆ ಘೋಷಿಸಿದೆ. ಅದರ ಪ್ರಕಾರ ಗ್ರಾಹಕರು ಸ್ಯಾಮ್‌ಸಂಗ್‌ನ ಕನ್‌ಸ್ಯೂಮರ್‌ ಡ್ಯೂರಬಲ್‌ ಉತ್ಪನ್ನಗಳನ್ನು ಖರೀದಿಸಿದ 60 ದಿನಗಳ ನಂತರ ಹಣ ಪಾವತಿಸಲು ಹಾಗೂ ಅದಕ್ಕೂ ಕಂತುಗಳನ್ನು (ಇಎಂಐ) ಕಲ್ಪಿಸಿದೆ. ಕನ್‌ಸ್ಯೂಮರ್‌ ಡ್ಯೂರಬಲ್‌ ಮತ್ತು ಮೊಬೈಲ್‌ ಫೋನ್‌ ಉತ್ಪನ್ನಗಳಲ್ಲಿ ಮುಂಚೂಣಿಯಲ್ಲಿರುವ ಸ್ಯಾಮ್‌ಸಂಗ್‌, ಶೂನ್ಯ ಡೌನ್‌ಪೇಮೆಂಟ್‌, ಇಎಂಐ ವ್ಯವಸ್ಥೆಯನ್ನು ಪ್ರಕಟಿಸಿದೆ. ಗ್ರಾಹಕರ ಅನುಕೂಲಕ್ಕಾಗಿ ಇದನ್ನು ವ್ಯವಸ್ಥೆ ಮಾಡಲಾಗಿದೆ ಎಂದು ಸ್ಯಾಮ್‌ಸಂಗ್‌ ಇಂಡಿಯಾ ಎಲೆಕ್ಟ್ರಾನಿಕ್ಸ್‌ನ ಉಪಾಧ್ಯಕ್ಷ ರಾಜೀವ್‌ ಭೂತಾನಿ ಹೇಳಿದ್ದಾರೆ. ಈ ಯೋಜನೆಯು 2016ರ ಡಿಸೆಂಬರ್‌ 31ರ ತನಕ ಅನ್ವಯವಾಗಲಿದ್ದು, ಸ್ಯಾಮ್‌ಸಂಗ್‌ ಟಿ.ವಿ, ಏರ್‌ ಕಂಡೀಶನರ್‌, ರೆಫ್ರಿಜರೇಟರ್‌, ವಾಷಿಂಗ್‌ ಮೆಶೀನ್‌, ಮೈಕ್ರೊವೇವ್‌ ಮುಂತಾದವುಗಳನ್ನು ಇದರಡಿಯಲ್ಲಿ ಕೊಳ್ಳಬಹುದು. ಕಂಪನಿಯು ಒಟ್ಟು ಮೂರು ವಿಧದ ಯೋಜನೆ ಪ್ರಕಟಿಸಿದ್ದು, ಗ್ರಾಹಕರು ಖರೀದಿಸುವಾಗ ಏನೂ ಕೊಡದೆ, 10-12 ಕಂತುಗಳಲ್ಲಿ ಕೊಡಬಹುದು. ಎರಡನೆಯದಾಗಿ ಈಗ ಖರೀದಿಸಿ 60 ದಿನಗಳ ನಂತರ 8 ಕಂತುಗಳ ಮೂಲಕ ಪಾವತಿಸಬಹುದು. ಕ್ರೆಡಿಟ್‌ ಕಾರ್ಡ್‌ ಗ್ರಾಹಕರು ಖರೀದಿಸುವಾಗ ಏನೂ ಕೊಡದೆ, ನಂತರ 3-12 ತಿಂಗಳಲ್ಲಿ ಪಾವತಿಸಬಹುದಾದ ಮೂರನೇ ವ್ಯವಸ್ಥೆಯೂ ಇದೆ.
↧
ಸ್ಯಾಮ್‌ಸಂಗ್‌ ಗ್ರಾಹಕರಿಗೆ 60ದಿನಗಳ ಅನುಕೂಲ
↧