ಮುಂಬಯಿ: ಭಾರತದ ಅತಿ ದೊಡ್ಡ ಎಂಜಿನಿಯರಿಂಗ್‌ ಕಂಪನಿಯಾದ ಲಾರ್ಸನ್‌ ಆ್ಯಂಡ್‌ ಟೂಬ್ರೊ 14,000 ಹುದ್ದೆಗಳನ್ನು ಕಡಿತಗೊಳಿಸಿದೆ. ಅಂದರೆ ತನ್ನ ಒಟ್ಟು ಸಿಬ್ಬಂದಿಯಲ್ಲಿ ಶೇ.11.2ರಷ್ಟನ್ನು ಇಳಿಸಿದೆ. ಇತ್ತೀಚಿನ ದಿನಗಳಲ್ಲಿ ಕಾರ್ಪೊರೇಟ್‌ ಕಂಪನಿಯೊಂದರ ಅತಿ ದೊಡ್ಡ ಉದ್ಯೋಗ ಕಡಿತ ಇದಾಗಿದೆ. ಬಿಸಿನೆಸ್‌ ಮಂದಗತಿಯಲ್ಲಿರುವುದರಿಂದ ಈ ಕ್ರಮವನ್ನು ತೆಗೆದುಕೊಳ್ಳಲಾಗುತ್ತಿದೆ ಎಂದು ಎಲ್‌ಆ್ಯಂಡ್‌ಟಿ ಹೇಳಿದೆ. ಕಂಪನಿಯಲ್ಲಿ ನಡೆಯುತ್ತಿರುವ ಡಿಜಟಲೀಕರಣ ಪ್ರಕ್ರಿಯೆ ಕೂಡ ಪರಿಣಾಮ ಬೀರಿದೆ. '' ಕಂಪನಿಯು ತನ್ನ ವಹಿವಾಟಿಗೆ ತಕ್ಕಂತೆ ಉದ್ಯೋಗಿಗಳ ಸಂಖ್ಯೆಯನ್ನು ಹೊಂದಿಸುತ್ತಿದ್ದು, ಇದರ ಪರಿಣಾಮ ಸೆಪ್ಟೆಂಬರ್‌ ತನಕ ಕಳೆದ 6 ತಿಂಗಳುಗಳಲ್ಲಿ 14,000 ಹುದ್ದೆಗಳನ್ನು ಕಡಿತಗೊಳಿಸುವಲ್ಲಿ ಸಫಲರಾಗಿದ್ದೇವೆ'' ಎಂದು ಎಲ್‌ಆ್ಯಂಡ್‌ಟಿಯ ಮುಖ್ಯ ಹಣಕಾಸು ಅಧಿಕಾರಿ ಆರ್‌. ಶಂಕರ್‌ ರಾಮನ್‌ ತಿಳಿಸಿದ್ದಾರೆ. ಮುಂಬರುವ ತಿಂಗಳುಗಳಲ್ಲಿಯೂ ವಹಿವಾಟು ಮಂದಗತಿಯಲ್ಲಿಯೇ ಮುಂದುವರಿಯುವ ಸಾಧ್ಯತೆ ಇದೆ. ಸರಕಾರಿ ವಲಯದಲ್ಲಿ ಆರ್ಡರ್‌ಗಳ ಸಂಖ್ಯೆ ಏರಿದ್ದರೂ, ಖಾಸಗಿ ವಲಯದಲ್ಲಿ ಕುಸಿದಿದೆ. ಇದು ಹೊಂದಾಣಿಕೆಯ ಉಪಕ್ರಮವಾಗಿದ್ದು, ಹಲವು ಶ್ರೇಣಿಗಳಲ್ಲಿ ನಡೆಯಲಿದೆ ಎಂದು ಪರಿಗಣಿಸಿಕೊಳ್ಳಬಾರದು ಎಂದವರು ಹೇಳಿದ್ದಾರೆ. ಎಲ್‌ಆ್ಯಂಡ್‌ಟಿ ಕೆಲವು ಸವಾಲುಗಳನ್ನು ಎದುರಿಸುತ್ತಿದೆ. ಗ್ರಾಹಕರು ತಮ್ಮ ವಹಿವಾಟು ಪ್ರಸ್ತಾಪಗಳನ್ನು ಮುಂದೂಡುತ್ತಿದ್ದಾರೆ. ಮಧ್ಯ ಪ್ರಾಚ್ಯದಲ್ಲಿ ತೈಲ ದರಗಳು ಇಳಿಯುತ್ತಿವೆ. ದೇಶೀಯ ಮಾರುಕಟ್ಟೆಯಲ್ಲಿ ಪೈಪೋಟಿ ಹೆಚ್ಚಳವಾಗಿದೆ. ವೆಚ್ಚ ಹೆಚ್ಚುತ್ತಿದೆ ಎಂದು ರಾಮನ್‌ ವಿವರಿಸಿದರು. ಎಲ್‌ಆ್ಯಂಡ್‌ಟಿ 2016-17ರ ಮೊದಲಾರ್ಧದಲ್ಲಿ 46,885 ಕೋಟಿ ರೂ. ಆದಾಯ ಗಳಿಸಿದ್ದು, ಶೇ.8.6 ಏರಿಕೆಯಾಗಿದೆ. ಲಾಭ 1,197 ಕೋಟಿ ರೂ.ಗಳಿಂದ 2,044 ಕೋಟಿ ರೂ.ಗೆ ಏರಿದೆ.
↧
ಎಲ್‌ಆ್ಯಂಡ್‌ಟಿ: 14,000 ಹುದ್ದೆ ಕಡಿತ
↧