ಬೆಂಗಳೂರು: ಕೇಂದ್ರ ಸರಕಾರ ಮತ್ತು ಆರ್‌ಬಿಐ ಯಾವುದೇ ಪೂರ್ವ ಸಿದ್ಧತೆಯಿಲ್ಲದೆ 500-1000 ರೂ. ನೋಟುಗಳನ್ನು ಹಿಂತೆಗೆದುಕೊಂಡ ಪರಿಣಾಮ ಬ್ಯಾಂಕ್‌ ಉದ್ಯೋಗಿಗಳು ಮತ್ತು ಅಧಿಕಾರಿಗಳ ಮೇಲೆ ತೀವ್ರ ಒತ್ತಡ ಉಂಟಾಗಿದೆ. ಕೆಲಸದ ಒತ್ತಡ ತಾಳಲಾರದೆ ಬ್ಯಾಂಕ್‌ ಉದ್ಯೋಗಿಗಳ ಆರೋಗ್ಯದ ಮೇಲೆ ದುಷ್ಪರಿಣಾಮ ಉಂಟಾಗುತ್ತಿದೆ ಎಂದು ಆಲ್‌ ಇಂಡಿಯಾ ಬ್ಯಾಂಕ್‌ ಆಫೀಸರ್ಸ್‌ ಕಾನ್ಫಡರೇಷನ್‌ನ ಹಿರಿಯ ಉಪಾಧ್ಯಕ್ಷ ಡಿ. ಥಾಮಸ್‌ ಫ್ರಾಂಕೊ ಹೇಳಿದ್ದಾರೆ. '' ಬ್ಯಾಂಕ್‌ಗಳಲ್ಲಿ ಸಿಬ್ಬಂದಿ ದಿನವೊಂದಕ್ಕೆ 16-18 ಗಂಟೆಗಳ ಕಾಲ ದುಡಿಯಬೇಕಾದ ಒತ್ತಡ ಉಂಟಾಗಿದೆ. ಇದು ಅವರ ಆರೋಗ್ಯಕ್ಕೆ ಮಾರಕವಾಗಿ ಪರಿಣಮಿಸುತ್ತಿದೆ. ಸಿಬ್ಬಂದಿಯ ಕೊರತೆ, ಅವ್ಯವಸ್ಥೆ, ಪೂರ್ವಸಿದ್ಧತೆಯ ಕೊರತೆಯಿಂದ ಭಾರಿ ಸಮಸ್ಯೆಯಾಗಿದೆ'' ಎಂದು ಆರೋಪಿಸಿದರು. ''ಉತ್ತರಪ್ರದೇಶದ ಕಾನ್ಪುರ ಬಳಿ ನವೆಂಬರ್‌ 9ರಂದು ಹೊಸ ಕರೆನ್ಸಿ ನೋಟುಗಳನ್ನು ಸಾಗಿಸುವ ವಾಹನ ಅಪಘಾತಕ್ಕೀಡಾಗಿ 8 ಮಂದಿ ಸಾವಿಗೀಡಾಗಿದ್ದು, ಅದರಲ್ಲಿ 7 ಮಂದಿ ಎಸ್‌ಬಿಐ ಉದ್ಯೋಗಿಗಳಾಗಿದ್ದಾರೆ. ಭೋಪಾಲ, ನೆಲ್ಲೂರು ಮತ್ತು ಮಹಾರಾಷ್ಟ್ರದಲ್ಲಿ ಮೂವರು ಬ್ಯಾಂಕ್‌ ಅಧಿಕಾರಿಗಳು ಕೆಲಸದ ಒತ್ತಡ ತಾಳಲಾಗದೆ ಪ್ರಾಣ ಕಳೆದುಕೊಂಡಿದ್ದಾರೆ'' ಎಂದು ಥಾಮಸ್‌ ಅವರು 'ವಿಜಯ ಕರ್ನಾಟಕಕ್ಕೆ' ತಿಳಿಸಿದ್ದಾರೆ. '' ದೇಶದಲ್ಲಿ 14 ಲಕ್ಷ ಕೋಟಿ ರೂ.ಗೂ ಹೆಚ್ಚು ಮೌಲ್ಯದ ನೋಟುಗಳನ್ನು ಬದಲಿಸುವ ಸಂದರ್ಭ ಸೂಕ್ತ ಸಿದ್ಧತೆಯನ್ನು ಮಾಡಬೇಕಾಗಿತ್ತು. ಆಸ್ಪ್ರೇಲಿಯಾ, ಸ್ವಿಜರ್ಲೆಂಡ್‌ ಮುಂತಾದ ದೇಶಗಳಲ್ಲೂ ಇಂತಹ ಪ್ರಕ್ರಿಯೆಗಳು ಯಾವುದೇ ಅಡಚಣೆಯಿಲ್ಲದೆ ನಡೆದಿವೆ. ಆದರೆ ಭಾರತದಲ್ಲಿ ಯಾವುದೇ ಸಿದ್ಧತೆ ಮಾಡಿಕೊಳ್ಳದ ಪರಿಣಾಮ ಅವಾಂತರವಾಗಿದೆ. ಕನಿಷ್ಠ 500 ರೂ. ಹಾಗೂ 100 ರೂ.ಗಳ ನೋಟುಗಳನ್ನು ಮೊದಲೇ ಸಾಕಷ್ಟು ಪ್ರಮಾಣದಲ್ಲಿ ದೊರೆಯುವಂತೆ ವ್ಯವಸ್ಥೆ ಮಾಡಿದ್ದರೆ ಈ ಸಮಸ್ಯೆ ಆಗುತ್ತಿರಲಿಲ್ಲ'' ಎಂದವರು ಹೇಳಿದರು.
↧
ಒತ್ತಡದಿಂದ ಬ್ಯಾಂಕ್‌ ಉದ್ಯೋಗಿಗಳ ಸಾವು: ಒಕ್ಕೂಟ ಆರೋಪ
↧