ನೋವು ಮರೆಸಿದ ನಾಟಕ: ಸೋನು

* ಹರೀಶ್‌ ಬಸವರಾಜ್‌

*ಖಾಸಗಿ ಫೋಟೋಗಳು ಹೇಗೆ ಲೀಕ್‌ ಆದವು. ಈ ಘಟನೆಯಿಂದ ನೀವು ಹೇಗೆ ಹೊರಬಂದಿರಿ?

ನನ್ನ ಕೆರಿಯರ್‌ ಹಾಳು ಮಾಡಬೇಕು ಅಂತ ಯಾರೋ ಒಬ್ಬರು ಮಾಡಿರುವ ಕುತಂತ್ರವದು. ತುಂಬಾ ಜನರು ಅದಕ್ಕೆ ತಮ್ಮದೇ ಆದ ರೀತಿಯಲ್ಲಿ ಕತೆ ಕಟ್ಟಿದರು. ಅದು ನನಗೆ ತುಂಬಾನೇ ಬೇಸರವಾಯಿತು. ಈ ಘಟನೆಯಿಂದ ನನಗೂ ಕೂಡ ಆಘಾತವಾಯಿತು. ಯಾರು ಯಾಕೆ ಇದೆಲ್ಲಾ ಆಯಿತು ಎಂದು ಕೇಳಲಿಲ್ಲ. ಸೋನು ಬಾಳಲ್ಲಿ ಹೀಗೆಲ್ಲಾ ಆಯಿತಲ್ಲ ಎಂದು ಮಾತಾಡುತ್ತಿದ್ದಾರೆ. ಆಗಿದ್ದಂತೂ ಸತ್ಯ. ಹಾಗಾಗಿ ಅದನ್ನು ನಾನು ಎದುರಿಸಲೇಬೇಕಿತ್ತು. ಈ ಘಟನೆಯಿಂದ ಆಚೆ ಬರಲು ತುಂಬಾನೇ ಕಷ್ಟಪಟ್ಟೆ. ಅದನ್ನು ಮರೆಯುವುದಕ್ಕಾಗಿಯೇ ರಂಗಭೂಮಿಯಲ್ಲಿ ತೊಡಗಿಸಿಕೊಂಡೆ. ಈಗ ಸಂಪೂರ್ಣವಾಗಿ ಅದರಿಂದ ಹೊರಬಂದಿದ್ದೇನೆ.

*ರಂಗಭೂಮಿಯಲ್ಲಿ ಯಾವ ರೀತಿ ತೊಡಗಿಸಿಕೊಂಡಿದ್ದೀರಿ? ಏನು ಮಾಡುತ್ತಿದ್ದೀರಾ?

ನನ್ನ ಸ್ನೇಹಿತ ಅಭಿಷೇಕ್‌ ಅಯ್ಯಂಗಾರ ಎಂಬುವವರು 'ವಿ ಮೂವ್‌ ಥೇಟರ್‌' ಎಂಬ ಸಂಸ್ಥೆ ನಡೆಸುತ್ತಿದ್ದಾರೆ. ಅದರಲ್ಲಿಯ ಕೆಲ ನಾಟಕಗಳಲ್ಲಿ ಸಕ್ರಿಯಳಾಗಿದ್ದೇಣೆ. 'ಇ= ಎಂಸಿ ಸ್ಕ್ವೇರ್‌' ಎಂಬ ನಾಟಕದಲ್ಲಿ ನಟಿಸಿದೆ. ಕೆಲ ಷೋಗಳು ಆಯಿತು. ರಂಗಭೂಮಿ ಮನಸ್ಸಿಗೆ ಒಂದು ರೀತಿಯಲ್ಲಿ ನೆಮ್ಮದಿ ನೀಡುತ್ತದೆ. ಈಗ ಸಂತೋಷವಾಗಿದ್ದೇನೆ.

*ಈ ಘಟನೆ ಆದಾಗ ನಿಮ್ಮ ಪೋಷಕರ ಪ್ರತಿಕ್ರಿಯೆ ಹೇಗಿತ್ತು?

ಎಲ್ಲರೂ ನನಗಾಗ ಧೈರ್ಯ ತುಂಬಿದರು. ಆ ಸಂದರ್ಭದಲ್ಲಿ ಸಹಜವಾಗಿಯೇ ಎಲ್ಲರಿಗೂ ಆತಂಕವಾಗಿತ್ತು. ಇಂದು ನಾನು ಇಷ್ಟು ಚೆನ್ನಾಗಿದ್ದೇನೆ ಅಂದರೆ ಅದಕ್ಕೆ ಕಾರಣ ಅಪ್ಪ, ಅಮ್ಮ ಮತ್ತು ತಂಗಿ. ನಂತರ ನನ್ನ ಸ್ನೇಹಿತರು ಕೂಡ ಸಾಕಷ್ಟು ಸಹಾಯ ಮಾಡಿದರು.

*ಸ್ವಲ್ಪ ದಿನ ಚಿತ್ರರಂಗದಿಂದ ದೂರವಾಗಿದ್ದಿರಿ, ಈಗ ಒಟ್ಟಿಗೆ ನಾಲ್ಕೈದು ಸಿನಿಮಾಗಳಲ್ಲಿ ನಟಿಸುತ್ತಿದ್ದೀರಾ?

ನಾನು ಸಿನಿಮಾಗಳಿಂದ ದೂರ ಇರಲಿಲ್ಲ, 'ದ್ಯಾವ್ರೆ' ನನ್ನ ಕಮ್‌ ಬ್ಯಾಕ್‌ ಸಿನಿಮಾ. ನಂತರ ಹಲವು ಸಿನಿಮಾಗಳಲ್ಲಿ ನಿರಂತರವಾಗಿ ತೊಡಗಿಸಿಕೊಂಡೆ. ಆದರೆ ಅವುಗಳಿಗೆ ಬಿಡುಗಡೆ ಭಾಗ್ಯ ಸಿಕ್ಕಿದ್ದು ಲೇಟಾಯಿತು ಅಷ್ಟೇ. ಇದೀಗ 'ಶರಾವತಿ ತೀರದಲ್ಲಿ' 'ಹ್ಯಾಪಿ ನ್ಯೂ ಇಯರ್‌' ಚಿತ್ರದಲ್ಲಿ ನಟಿಸಿದ್ದೇನೆ. ತಮಿಳಿನಲ್ಲಿ ಒಂದು, ಮಲೆಯಾಳಂನಲ್ಲಿ ಒಂದು ಸಿನಿಮಾ ಒಪ್ಪಿಕೊಂಡಿದ್ದೇನೆ. 'ಶರಾವತಿ ತೀರದಲ್ಲಿ' ನನಗೆ ತುಂಬಾ ಸ್ಪೇಷಲ್‌ ಸಿನಿಮಾ, ತುಂಬಾ ತೂಕ ಇರುವ ಪಾತ್ರ ಅಲ್ಲಿ ಸಿಕ್ಕಿದೆ. ನನ್ನ ಕೆರಿಯರ್‌ನಲ್ಲಿ ಇಂತಹ ಪಾತ್ರವನ್ನು ನಾನು ಈವರೆಗೂ ನಿರ್ವಹಿಸಿರಲಿಲ್ಲ. ಹ್ಯಾಪಿ ನ್ಯೂ ಇಯರ್‌ ಸಿನಿಮಾದಲ್ಲಿ ವಿಜಯ್‌ರಾಘವೇಂದ್ರ ಅವರ ಪತ್ನಿಯಾಗಿ ಪಾತ್ರ ಮಾಡುತ್ತಿದ್ದೇನೆ.

*ಗಿಲ್ಟೂ ಎನ್ನುವ ಸಿನಿಮಾದಲ್ಲಿ ವಿಭಿನ್ನ ರೀತಿಯ ಪಾತ್ರ ನಿರ್ವಹಿಸುತ್ತಿದ್ದೀರಾ ಅನ್ನುವ ಮಾತಿದೆ. ಆ ಪಾತ್ರದ ಬಗ್ಗೆಹೇಳುವುದಾದರೆ?

2015ರಲ್ಲಿ ನಾನು 'ಕಿರಗೂರಿನ ಗಯ್ಯಾಳಿಗಳು' 'ಒನ್‌ ಡೇ ಬಿಫೋರ್‌' 'ಮಾರಿಕೊಂಡವರು' ಈ ಮೂರೇ ಸಿನಿಮಾ ಒಪ್ಪಿಕೊಂಡಿದ್ದು. ಆನಂತರ ಯಾವ ಚಿತ್ರವನ್ನೂ ಒಪ್ಪಿಕೊಳ್ಳಬಾರದು ಎಂದು ತೀರ್ಮಾನಿಸಿದ್ದೆ. ಆದರೆ 'ಗಿಲ್ಟೂ' ಸಿನಿಮಾದ ನಿರ್ದೇಶಕರು ಕತೆ ಹೇಳಿದಾಗ ಆ ಪಾತ್ರದ ಜೊತೆ ನಾನು ಲವ್‌ನಲ್ಲಿ ಬಿದ್ದೆ. ಆಮೇಲೆ ನಿರ್ಮಾಪಕರನ್ನು ಹಿಡಿಯಲು ಒಂದು ಟ್ರೈಲರ್‌ ಶೂಟ್‌ ಮಾಡಿದೆವು ಅದು ಹಿಟ್‌ ಆಗಿದೆ. ವಿಭಿನ್ನ ಪಾತ್ರ ಅದನ್ನು ಸಿನಿಮಾದಲ್ಲೇ ನೋಡಬೇಕು. ಇದಲ್ಲದೇ ಇನ್ನೊಂದೆರಡು ಸಿನಿಮಾಗಳನ್ನು ಒಪ್ಪಿಕೊಂಡಿದ್ದೇನೆ. ಮುಂದಿನ ದಿನಗಳಲ್ಲಿ ರಂಗಭೂಮಿಯಲ್ಲೇ ಹೆಚ್ಚು ತೊಡಗಿಸಿಕೊಂಡು ನೆಮ್ಮದಿ ಕಂಡುಕೊಳ್ಳುತ್ತೇನೆ.