ಹೊಸದಿಲ್ಲಿ: ವಿಶ್ವದಲ್ಲಿ 2021ರ ಹೊತ್ತಿಗೆ ಸುಮಾರು 30,000 ಉದ್ಯೋಗ ಕಡಿತಕ್ಕೆ ಜರ್ಮನಿ ಕಾರ್‌ ಉತ್ಪಾದಕ ವೋಕ್ಸ್‌ವ್ಯಾಗನ್‌ ಮುಂದಾಗಿದ್ದು, ಆಡಳಿತ ಮಂಡಳಿ ಮತ್ತು ಕಾರ್ಮಿಕ ಸಂಘಟನೆಗಳು ಇದಕ್ಕೆ ಸಮ್ಮತಿಸಿವೆ ಎಂದು ಮೂಲಗಳು ತಿಳಿಸಿವೆ. ಪರಿಸರ ಮಾಲಿನ್ಯ ಪರೀಕ್ಷೆಯನ್ನು ವಂಚಿಸುವ ಸಾಧನವನ್ನು ವೋಕ್ಸ್‌ವ್ಯಾಗನ್‌ ಕಾರ್‌ಗಳಲ್ಲಿ ಅಳವಡಿಸಲಾಗಿದೆ ಎನ್ನುವ ವಿವಾದದಿಂದ ಕಂಪನಿ ಈ ಹಿಂದೆ ತತ್ತರಿಸಿತ್ತು. ಇದೀಗ ಉದ್ಯೋಗ ಕಡಿತದ ಮೂಲಕ ಕಂಪನಿಯ ಲಾಭ ಹೆಚ್ಚಿಸಲು ಮತ್ತು ಎಲೆಕ್ಟ್ರಿಕ್‌ ಮತ್ತು ಸೆಲ್ಫ್‌ ಡ್ರೈವಿಂಗ್‌ ಕಾರ್‌ಗಳ ತಯಾರಿಕೆ ಆರಂಭಿಸಲು ನಿರ್ಧರಿಸಿದೆ. ವಾಹನ ಉದ್ಯಮದಲ್ಲಿ ಯುರೋಪ್‌ನ ಬೃಹತ್‌ ಕಂಪನಿಯಾಗಿರುವ ವೋಕ್ಸ್‌ವ್ಯಾಗನ್‌, ಜರ್ಮನಿಯಲ್ಲಿನ ತನ್ನ ಬೃಹತ್‌ ಘಟಕವನ್ನು ಉಳಿಸಿಕೊಳ್ಳಲು ಪ್ರಯತ್ನಿಸುತ್ತಿದೆ. ಡೀಸೆಲ್‌ ಪರೀಕ್ಷೆ ವಂಚನೆಯಿಂದ ಹೊರಬರಲು ಸಾಕಷ್ಟು ಹಣವನ್ನು ತೆರಬೇಕಿದೆ. ಇದೆಲ್ಲದಕ್ಕೆ ಬಿಲಿಯನ್‌ಗಟ್ಟಲೇ ಹಣ ಅಗತ್ಯವಿದ್ದು, ಕಂಪನಿಯು ಉದ್ಯೋಗ ಕಡಿತ ಪ್ರಕ್ರಿಯೆಗೆ ನಿರ್ಧರಿಸಿದೆ ಎಂದು ಮೂಲಗಳು ಹೇಳಿವೆ. ಜರ್ಮನಿಯೊಂದರಲ್ಲೇ 23 ಸಾವಿರ ಉದ್ಯೋಗಗಳನ್ನು ಕಡಿತಗೊಳಿಸಲಿದ್ದು, ಇದರಿಂದ ವಾರ್ಷಿಕ 300 ಕೋಟಿ ಡಾಲರ್‌ಗೂ ಹೆಚ್ಚಿನ ಹಣ ಉಳಿತಾಯವಾಗಲಿದೆ. ವಿಶ್ವದಲ್ಲಿ ವೋಕ್ಸ್‌ವ್ಯಾಗನ್‌ ಸಮೂಹವು 6,10,076 ಉದ್ಯೋಗಿಗಳನ್ನು ಹೊಂದಿದ್ದು, ಉದ್ಯೋಗ ಕಡಿತದ ಸುದ್ದಿಗೆ ಪ್ರತಿಕ್ರಿಯಿಸಲು ನಿರಾಕರಿಸಿದೆ.
↧
ವೋಕ್ಸ್‌ವ್ಯಾಗನ್‌: 30,000 ಉದ್ಯೋಗ ಕಡಿತ
↧