ಎಕನಾಮಿಕ್‌ ಟೈಮ್ಸ್‌ ಕೋಲ್ಕೊತಾ ಏಕ ದ್ವಾರದ(ಸಿಂಗಲ್‌ ಡೋರ್‌) ರೆಫ್ರಿಜಿರೇಟರ್‌ ದರ ಜನವರಿಯಿಂದ ಸುಮಾರು 4000 ರೂ. ತನಕ ಏರಿಕೆಯಾಗುವ ಸಾಧ್ಯತೆ ಇದೆ. ''ಸದ್ಯ ಮಾರುಕಟ್ಟೆಯಲ್ಲಿ ಸಿಂಗಲ್‌ ಡೋರ್‌ ಹೊಂದಿರುವ ರೆಫ್ರಿಜಿರೇಟರ್‌ಗಳು ಹೆಚ್ಚಿನ ವಿದ್ಯುತ್ ಬಳಕೆ ಮಾಡುತ್ತಿದ್ದು, ಇಂಧನ ಕಾರ್ಯಕ್ಷಮತೆ ಹೆಚ್ಚಿಸಲು ಉನ್ನತ ತಂತ್ರಜ್ಞಾನ ಅಳವಡಿಸಬೇಕಿದೆ. ಹೀಗಾಗಿ, ಬ್ಯುರೋ ಆಫ್‌ ಎನರ್ಜಿ ಎಫಿಷಿಯನ್ಸಿ(ಬಿಇಇ) ನೀಡುವ ಸ್ಟಾರ್‌ ರೇಟಿಂಗ್‌ನ ಅನುಸಾರ ರೆಫ್ರಿಜಿರೇಟರ್‌ಗಳ ದರದಲ್ಲಿ 2,000ದಿಂದ 4000 ರೂ. ತನಕ ಹೆಚ್ಚಳವಾಗುವ ಅವಕಾಶಗಳಿವೆ,'' ಎಂದು ರೆಫ್ರಿಜಿರೇಟರ್‌ ಉತ್ಪಾದಕರು ತಿಳಿಸಿದ್ದಾರೆ. ಡೈರೆಕ್ಟ್-ಕೂಲ್‌ ರೆಫ್ರಿಜಿರೇಟರ್‌ಗಳೆಂದೇ ಏಕ ದ್ವಾರದ ರೆಫ್ರಿಜಿರೇಟರ್‌ಗಳನ್ನು ಕರೆಯಲಾಗಿದ್ದು, ಒಟ್ಟು ಮಾರುಕಟ್ಟೆಯಲ್ಲಿ ಇವುಗಳ ಭಾಗ ಶೇ.75ರಷ್ಟಿದೆ. ಭಾರತದಲ್ಲಿ ಇದರ ಮಾರುಕಟ್ಟೆ ಮೌಲ್ಯ 16,000 ಕೋಟಿ ರೂ.ನಷ್ಟಿದ್ದು, ವಾರ್ಷಿಕವಾಗಿ ಶೇ.15ರಷ್ಟು ಬೆಳವಣಿಗೆ ಹೊಂದಿದೆ. ''ಬಿಇಇ ಕಡ್ಡಾಯ ಮಾರ್ಗಸೂಚಿಗಳ ಪರಿಣಾಮದಿಂದಾಗಿ ದರ ಹೆಚ್ಚಳ ಅನಿವಾರ್ಯ. ಬಿಇಇ ಪರಿಷ್ಕೃತ ನಿಯಮಗಳ ಪ್ರಕಾರ, ಜನವರಿಯಿಂದ 4 ಸ್ಟಾರ್‌ ಮತ್ತು 5 ಸ್ಟಾರ್‌ ರೇಟಿಂಗ್‌ನ ಏಕ ಬಾಗಿಲಿನ ರೆಫ್ರಿಜಿರೇಟರ್‌ ಮಾಡೆಲ್‌ಗಳ ಸ್ಟಾರ್‌ ರೇಟಿಂಗ್‌ 2 ಅಥವಾ 3 ಸ್ಟಾರ್‌ಗೆ ಕುಸಿಯಲಿದೆ. ಹೀಗಾಗಿ ಇವುಗಳನ್ನು ಮಾರುಕಟ್ಟೆಯಿಂದ ವಾಪಸ್‌ ಪಡೆಯುತ್ತೇವೆ.'' ಎಂದು ಕೆಲವು ಉತ್ಪಾದಕರು ಹೇಳಿದ್ದಾರೆ. ''ಏಕ ದ್ವಾರದ ರೆಫ್ರಿಜಿರೇಟರ್‌ಗಳ ದರ ಏರುವುದರಿಂದ, ಇಂಥ ಉತ್ಪನ್ನಗಳ ತಯಾರಿಕೆಯನ್ನೇ ನಿಲ್ಲಿಸಿ ಬಿಡುತ್ತೇವೆ,'' ಎಂದು ವಿಡಿಯೊಕಾನ್‌ ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿ ಸಿ.ಎಂ.ಸಿಂಗ್‌ ತಿಳಿಸಿದ್ದಾರೆ. ಎರಡು ಬಾಗಿಲಿನ ರೆಫ್ರಿಜಿರೇಟರ್‌ಗೂ ಇದೇ ಸ್ಥಿತಿ ಪ್ರಸಕ್ತ ವರ್ಷದ ಆರಂಭದಲ್ಲಿ ಎರಡು ಬಾಗಿಲ ರೆಫ್ರಿಜಿರೇಟರ್‌ಗಳಿಗೂ ಬಿಇಇ ನಿಯಮದಿಂದಾಗಿ ತೊಂದರೆ ಎದುರಾಗಿತ್ತು. ಹಾಲಿ 5 ಸ್ಟಾರ್‌ ಅನ್ನು ಹೊಂದಿದ್ದ ರೆಫ್ರಿಜಿರೇಟರ್‌ಗಳ ರಾರ‍ಯಂಕಿಂಗ್‌ 1 ಹಂತ ಕೆಳಕ್ಕೆ ಇಳಿದಿತ್ತು. ಏನಿದು ರೇಟಿಂಗ್‌? ರೆಫ್ರಿಜಿರೇಟರ್‌ಗಳು ಕಡಿಮೆ ವಿದ್ಯುತ್ ಬಳಕೆ ಮಾಡುವಂತೆ ತಂತ್ರಜ್ಞಾನ ಅಳವಡಿಸುವುದನ್ನು ಬ್ಯುರೋ ಆಫ್‌ ಎನರ್ಜಿ ಎಫಿಷಿಯನ್ಸಿ(ಬಿಇಇ) ಕಡ್ಡಾಯಗೊಳಿಸಿದೆ. ವಿದ್ಯುತ್ ಸಲಕರಣೆಗಳ ಇಂಧನ ಕಾರ್ಯಕ್ಷಮತೆಗೆ ಸಂಬಂಧಿಸಿದಂತೆ 'ಸ್ಟಾರ್‌' ರೇಟಿಂಗ್‌ ಅನ್ನು ನೀಡುವ ಪದ್ಧತಿಯನ್ನು ಬಿಇಇ ಜಾರಿಗೊಳಿಸಿದೆ. 5-ಸ್ಟಾರ್‌ ಪಡೆದಿರುವ ಉಪಕರಣಗಳಲ್ಲಿ ಹೆಚ್ಚಿನ ವಿದ್ಯುತ್ ಉಳಿಸುವ ತಂತ್ರಜ್ಞಾನ ಅಳವಡಿಕೆಯಾಗಿರುತ್ತದೆ. ಇದೀಗ ಬಿಇಇ ಪರಿಷ್ಕೃತ ನಿಯಮಗಳ ಪ್ರಕಾರ -ಪ್ರಸ್ತುತ 5-ಸ್ಟಾರ್‌ ಹೊಂದಿರುವ ಉತ್ಪನ್ನಗಳ ಸ್ಥಾನ 3-ಸ್ಟಾರ್‌ ಮಟ್ಟಕ್ಕೆ ಇಳಿಯಲಿದೆ. ಜನವರಿ ಒಂದರಿಂದ ಇದು ಅನ್ವಯವಾಗಲಿದ್ದು, 2-ಸ್ಟಾರ್‌ ಮತ್ತು ಅದಕ್ಕೂ ಕೆಳಗಿನ ಸ್ಟಾರ್‌ ಪಡೆದಿರುವ ಸಾಧನ/ಸಲಕರಣೆಗಳು ಮಾರುಕಟ್ಟೆಯಿಂದಹೊರಗುಳಿಯಲಿವೆ.
↧
ರೆಫ್ರಿಜಿರೇಟರ್‌ ದರ 4000 ರೂ. ಏರಿಕೆ ಸಂಭವ
↧