* ಶರಣು ಹುಲ್ಲೂರು ಅಚ್ಚರಿ ಎನ್ನುವಂತೆ ತೂಕ ಇಳಿಸಿಕೊಂಡಿದ್ದರು ಕೋಮಲ್‌. ಸಪೂರನಾದ ನಂತರ ಅವರು ಯಾವುದೇ ಚಿತ್ರವನ್ನು ಒಪ್ಪಿಕೊಂಡಿರಲಿಲ್ಲ. ಹಾಗಾಗಿ ತೆರೆಯ ಮೇಲೆ ಅವರು ಹೇಗೆ ಕಾಣುತ್ತಾರೆ ಅನ್ನುವ ಕುತೂಹಲ ಅಭಿಮಾನಿಗಳಲ್ಲಿತ್ತು. ಈಗವರು ಹೊಸ ಚಿತ್ರವನ್ನು ಒಪ್ಪಿಕೊಂಡಿದ್ದರಿಂದ ಆ ಕ್ಯೂರಿಯಾಸಿಟಿ ಮತ್ತಷ್ಟು ಹೆಚ್ಚಾಗಿದೆ. ಕನ್ವೇಶ್ವರ ಹೆಸರಿನಲ್ಲಿ ಮೂಡಿ ಬರುತ್ತಿರುವ ಈ ಚಿತ್ರದಲ್ಲಿ ಕೋಮಲ್‌ ಹೊಸ ರೀತಿಯ ಪಾತ್ರವನ್ನು ನಿರ್ವಹಿಸಲಿದ್ದಾರಂತೆ. ಇದು ಮಲ್ಟಿಸ್ಟಾರ್‌ ಚಿತ್ರ ಅನ್ನುವುದು ವಿಶೇಷ. ಅಂದಹಾಗೆ ಈ ಚಿತ್ರಕ್ಕೆ ನಾಯಕ ಉಪೇಂದ್ರ. ನಾಯಕಿಯಾಗಿ ವೇದಿಕಾ ಕಾಣಿಸಿಕೊಳ್ಳುತ್ತಿದ್ದಾರೆ. ಸಂಗೊಳ್ಳಿ ರಾಯಣ್ಣ ಚಿತ್ರದ ನಂತರ ನಿರ್ದೇಶಕ ನಾಗಣ್ಣ ಈ ಚಿತ್ರವನ್ನು ಕೈಗೆತ್ತಿಕೊಂಡಿದ್ದಾರೆ. ಕೋಮಲ್‌ಗೆ ವಿಭಿನ್ನ ಪಾತ್ರವನ್ನು ಹೆಣೆದಿದ್ದಾರಂತೆ ನಾಗಣ್ಣ. ಉಪೇಂದ್ರ ಮತ್ತು ಕೋಮಲ್‌ ಕಾಂಬಿನೇಷನ್‌ನಲ್ಲಿ ಈ ಸಿನಿಮಾ ಮೂಡಿ ಬರುತ್ತಿರುವುದರಿಂದ ಇದೊಂದು ಹಾಸ್ಯ ಪ್ರಧಾನ ಚಿತ್ರ ಎನ್ನಲಾಗುತ್ತಿದೆ. ಆದರೆ, ಚಿತ್ರದ ಬಗ್ಗೆ ಸದ್ಯ ಏನೂ ಹೇಳಲ್ಲ ಅಂತಿದ್ದಾರೆ ನಿರ್ದೇಶಕರು. 'ಕನ್ನೇಶ್ವರ ಅಂದಾಕ್ಷಣ ಇದೊಂದು ಭಕ್ತ ಪ್ರಧಾನ ಚಿತ್ರ ಅನಿಸುತ್ತದೆ. ಆದರೆ, ಇದು ಅಂತಹ ಚಿತ್ರವಲ್ಲ. ಉಪೇಂದ್ರ ಜತೆ ಕೋಮಲ್‌ ಇದ್ದಾರೆ ಅಂದಾಗಲೂ ಅದು ಕಾಮಿಡಿ ಚಿತ್ರ ಆಗಬಹುದು. ಪಾತ್ರಕ್ಕೂ ಮತ್ತು ಪಾತ್ರಧಾರಿಗಳಿಗೂ ಸಂಬಂಧವಿರುವುದಿಲ್ಲ. ಇದು ಎಲ್ಲರೂ ನೋಡುವಂತಹ ಚಿತ್ರ. ಮುಂದಿನ ದಿನಗಳಲ್ಲಿ ಎಂತಹ ಚಿತ್ರ ಅನ್ನುವುದನ್ನು ಖಂಡಿತಾ ಹೇಳುತ್ತೇನೆ' ಅಂತಾರೆ ನಿರ್ದೇಶಕರು. ಸದ್ದಿಲ್ಲದೇ ಶೂಟಿಂಗ್‌ ಕೂಡ ಆರಂಭಿಸಿದ್ದಾರೆ ನಿರ್ದೇಶಕರು. ಉಪೇಂದ್ರ ಮತ್ತು ವೇದಿಕಾ ಕಾಂಬಿನೇಷನ್‌ನ ದೃಶ್ಯಗಳು ಬೆಂಗಳೂರಿನಲ್ಲಿ ಶೂಟಿಂಗ್‌ ಆಗುತ್ತಿವೆ. ಉಪೇಂದ್ರ ನಟನೆಯ ಎ ಚಿತ್ರವನ್ನು ನಿರ್ಮಾಣ ಮಾಡಿದ್ದ ಸಂಸ್ಥೆಯೇ ಈ ಚಿತ್ರವನ್ನು ತಯಾರಿಸುತ್ತಿದೆ.
↧
ಉಪ್ಪಿ ಜತೆ ತೆರೆ ಹಂಚಿಕೊಂಡ ಕೋಮಲ್‌
↧