ಬೆಂಗಳೂರು: ಇಟಲಿಯ ದಂತ ಚಿಕಿತ್ಸೆ ಉಪಕರಣಗಳ ತಯಾರಕ ಮೆಕ್ಟ್ರಾನ್‌ ಡೆಂಟಲ್‌ ಕಂಪನಿಯು ಭಾರತದಲ್ಲಿ ಹೊಂದಿದ್ದ ವ್ಯವಹಾರವನ್ನು ಮೈಸೂರು ಮೂಲದ ವೈದ್ಯಕೀಯ ಸಾಧನಗಳ ತಯಾರಕ ಸ್ಕ್ಯಾ‌ನ್‌ರೇ ಟೆಕ್ನಾಲಜೀಸ್‌ ಖರೀದಿಸಿದೆ. 50 ಲಕ್ಷ ಡಾಲರ್‌ನ ವ್ಯಾಪಾರ ಒಪ್ಪಂದ ಇದಾಗಿದೆ. ಮೆಕ್ಟ್ರಾನ್‌ನ ಭಾರತೀಯ ಘಟಕವು ಬೆಂಗಳೂರಿನಲ್ಲಿ ಉತ್ಪಾದನಾ ಕೇಂದ್ರವನ್ನು ಹೊಂದಿದ್ದು, 70 ಉದ್ಯೋಗಿಗಳಿದ್ದಾರೆ. ಮೃದು ಅಂಗಾಂಶಗಳಿಗೆ ದಕ್ಕೆಯಾಗದಂತೆ ಮೂಳೆಯನ್ನು ಕತ್ತರಿಸುವ ದಂತ ಚಿಕಿತ್ಸೆಗೆ ಅಗತ್ಯವಾದ ಉಪಕರಣಗಳ ತಯಾರಿಕೆಯಲ್ಲಿ ಇಟಲಿಯ ಈ ಕಂಪನಿ ನೈಪುಣ್ಯತೆ ಸಾಧಿಸಿದೆ. ವೈದ್ಯಕೀಯ ಉಪಕರಣಗಳು ಮತ್ತು ಆರೋಗ್ಯ ರಕ್ಷೆ ವಲಯದಲ್ಲಿ ಮೆಕ್ಟ್ರಾನ್‌ನ ಒಂದು ಭಾಗದ ಖರೀದಿಯೊಂದಿಗೆ ಒಟ್ಟು ನಾಲ್ಕು ಕಂಪನಿಗಳನ್ನು ಈ ತನಕ ಸ್ಕ್ಯಾ‌ನ್‌ರೇ ಸ್ವಾಧೀನ ಪಡಿಸಿಕೊಂಡಂತೆ ಆಗಿದೆ. ಈ ಮೊದಲು ಎಲ್‌ ಅ್ಯಂಡ್‌ ಟಿ ಮೆಡಿಕಲ್‌, ಪ್ರೈಕಾಲ್‌ ಹೆಲ್ತ್‌ಕೇರ್‌, ಬೊಲೊಗ್ನಾ ಮೂಲದ ಎಕ್ಸ್‌-ರೇ ಟ್ಯೂಬ್‌ ತಯಾರಕ ಸಿಇಐ-ಇಟಲಿ ಕಂಪನಿಗಳನ್ನು ಸ್ಕ್ಯಾ‌ನ್‌ರೇ ಸ್ವಾಧೀನ ಪಡಿಸಿಕೊಂಡಿದೆ. 1.5 ಕೋಟಿ ಡಾಲರ್‌ ಹಣವನ್ನು ಇದಕ್ಕಾಗಿ ಕಂಪನಿ ಹೂಡಿಕೆ ಮಾಡಿದೆ. ''ಜಾಗತಿಕ ಗುಣಮಟ್ಟಕ್ಕೆ ತಕ್ಕುದಾದ ವೈದ್ಯಕೀಯ ಚಿಕಿತ್ಸೆ ಉಪಕರಣಗಳನ್ನು ಸ್ಥಳೀಯವಾಗಿ ಉತ್ಪಾದಿಸುವುದು ನಮ್ಮ ಯೋಜನೆ. ಎಲ್ಲ ದಂತ ಚಿಕಿತ್ಸೆ ಉಪಕರಣಗಳು ಒಂದೇ ವೇದಿಕೆಯಡಿ ದೊರೆಯುವಂತಾಗಬೇಕು. ಈ ನಿಟ್ಟಿನಲ್ಲಿ ನಾವು ಕಾರ್ಯಪ್ರವೃತ್ತರಾಗಿದ್ದೇವೆ. ಭಾರತೀಯ ದಂತ ಚಿಕಿತ್ಸೆ ಮಾರುಕಟ್ಟೆಯಲ್ಲಿ ಇನ್ನು 3-5 ವರ್ಷಗಳಲ್ಲಿ ನಾವು ನಂಬರ್‌ ಒನ್‌ ಆಗಬೇಕು ಎನ್ನುವ ಗುರಿಯನ್ನು ಹೊಂದಿದ್ದೇವೆ,'' ಎಂದು ಸ್ಕ್ಯಾ‌ನ್‌ರೇ ಟೆಕ್ನಾಲಜಿಯ ವ್ಯವಸ್ಥಾಪಕ ನಿರ್ದೇಶಕ ವಿಶ್ವಪ್ರಸಾದ್‌ ಆಳ್ವ ತಿಳಿಸಿದ್ದಾರೆ.
↧
ಮೈಸೂರಿನ ಸ್ಕ್ಯಾ‌ನ್‌ರೇ ತೆಕ್ಕೆಗೆ ಇಟಲಿ ಕಂಪನಿ
↧