ಬೆಲೆ ಕುಸಿತದಿಂದ ಕಂಗಾಲಾದ ರೈತನ ಹೊಸ ಐಡಿಯಾ / 1 ಟನ್‌ ಹೂವಿಗೆ ವಾಟ್ಸ್‌ ಆ್ಯಪ್‌ನಲ್ಲಿ ಬೇಡಿಕೆ * ರವಿರಾಜ್‌ ಆರ್‌.ಗಲಗಲಿ ಬಾಗಲಕೋಟ ರೈತ ತನ್ನ ಮಾರುಕಟ್ಟೆ ತಾನೇ ಸೃಷ್ಟಿಸಿಕೊಂಡಾಗ ಲಾಭ ನಿಶ್ಚಿತ ಎನ್ನುವ ಮಾತಿನ ಬೆನ್ನತ್ತಿದ ಯುವ ರೈತರೊಬ್ಬರು ವಾಟ್ಸ್‌ಆ್ಯಪ್‌ ಮೂಲಕ ಹೂವು ಮಾರಾಟ ಮಾಡುತ್ತಿದ್ದಾರೆ. ಹೀಗೆ ಬರೋಬ್ಬರಿ 1 ಟನ್‌ ಚೆಂಡು ಹೂವು ಬುಕ್‌ ಆಗಿದೆ. ಬಾಗಲಕೋಟದ ಯುವ ರೈತ ರೋಶನ್‌ ವೈಜಾಪುರ ಹೊಸ ಹಾದಿ ಹಿಡಿದವರು. ಹೊಲದಲ್ಲಿದ್ದ ಹೂವುಗಳ ಫೋಟೊಗಳನ್ನು ವಾಟ್ಸ್‌ಆ್ಯಪ್‌ನಲ್ಲಿ ಹಾಕಿದ ಅವರು ಬುಕಿಂಗ್‌ ಓಪನ್‌ ಎಂಬ ಸಂದೇಶ ತೇಲಿಬಿಟ್ಟರು. ಕೇವಲ ಒಂದು ಗಂಟೆ ಅವಧಿಯಲ್ಲಿ ಹೆಚ್ಚು ಕಡಿಮೆ 900 ಕೆಜಿ ಹೂವಿಗೆ ಆರ್ಡರ್‌ ಹರಿದುಬಂದಿತು ಎನ್ನುತ್ತಾರೆ ಅವರು. ರೋಶನ್‌ ಸ್ನೇಹಿತರು ನಾನಾ ಗ್ರೂಪ್‌ಗಳಲ್ಲಿ ಸಂದೇಶ ಹರಿಬಿಟ್ಟರು. ಹೀಗೆ ಹರಿದಾಡಿದ ಸಂದೇಶ ಹೂವಿಗೆ ಮಾರುಕಟ್ಟೆ ಸೃಷ್ಟಿಸಿದೆ. ಅಂದ ಹಾಗೆ ತಾಜಾ ಹೂವುಗಳನ್ನು ಗ್ರಾಹಕರ ಮನೆ, ಮನೆಗೆ ತಲುಪಿಸಲಾಗುತ್ತದೆ. ಸದ್ಯ ಚೆಂಡು ಹೂವು ಪ್ರತಿ ಕೆಜಿಗೆ 50 ರೂ.ವರೆಗೆ ಇದೆ, ಹಬ್ಬದ ಅವಧಿಯಲ್ಲಿ 100 ರೂ.ವರೆಗೆ ಹೆಚ್ಚಳವಾಗುವ ಸಾಧ್ಯತೆಯಿದೆ. ಕೆಲವು ದಿನಗಳ ಹಿಂದೆ ಚೆಂಡು ಹೂವಿನ ಬೆಲೆ ಪ್ರತಿ ಕೆಜಿಗೆ ಕೇವಲ 15 ರೂ.ವರೆಗೆ ಬಂದಾಗ ಕಂಗಾಲಾಗಿದ್ದರು. ಬೆಂಗಳೂರು, ಮುಂಬೈ ಮಾರುಕಟ್ಟೆಗಳಿಗೆ ಹೂವು ಕಳುಹಿಸಿದರೂ ಸಾಗಣೆ ವೆಚ್ಚವೂ ದೊರೆಯುತ್ತಿರಲಿಲ್ಲ. ಇಂತಹ ಸ್ಥಿತಿಯಲ್ಲಿ ತಾಜಾ ಹೂವನ್ನು ನೇರವಾಗಿ ಗ್ರಾಹಕರಿಗೆ ಮಾರಾಟ ಮಾಡಿದರೇ ಹೇಗೆ ಎಂಬ ಐಡಿಯಾ ಈಗ ಫಲ ನೀಡಿದೆ. ----- ಹೊಲದಲ್ಲಿರುವ ಅಂದಾಜು 1 ಟನ್‌ ಹೂವು ಈಗಾಗಲೇ ಬುಕ್‌ ಆಗಿವೆ. ಶನಿವಾರ ಈ ಹೂವುಗಳನ್ನು ಗ್ರಾಹಕರಿಗೆ ತಲುಪಿಸುತ್ತೇವೆ. ತಾಜಾ ಹೂವುಗಳು ಮನೆ ಬಾಗಿಲಿಗೆ ಬರುವುದರಿಂದ ಗ್ರಾಹಕರೂ ಖುಷಿಯಾಗಿದ್ದಾರೆ. ನನಗೆ ರೆಡಿಮೇಡ್‌ ಮಾರ್ಕೆಟ್‌ ದೊರೆತಿದೆ. -ರೋಶನ್‌ ವೈಜಾಪುರ, ರೈತ
↧
ಚೆಂಡು ಹೂವಿಗೆ ಈಗ WhatsApp ಮಾರ್ಕೆಟ್‌
↧