ಲಾಸನ್ನೆ: ಡೋಪಿಂಗ್‌ ನಿಯಮ ಉಲ್ಲಂಘಿಸಿದ ಆರೋಪದ ಮೇರೆಗೆ 2012ರ ಲಂಡನ್‌ ಒಲಿಂಪಿಕ್ಸ್‌ ಕೂಟದಲ್ಲಿ ಸ್ವರ್ಣ ಪದಕ ಜಯಿಸಿದ್ದ ಕಜಕಸ್ತಾನದ ಮೂವರು ವೇಟ್‌ಲಿಫ್ಟರ್‌ಗಳಿಂದ ಅಂತಾರಾಷ್ಟ್ರೀಯ ಒಲಿಂಪಿಕ್‌ ಒಕ್ಕೂಟ(ಐಒಸಿ) ಗುರುವಾರ ಪದಕಗಳನ್ನು ವಾಪಸ್‌ ಪಡೆದಿದೆ. ಲಂಡನ್‌ ಮತ್ತು 2008ರ ಬೀಜಿಂಗ್‌ ಒಲಿಂಪಿಕ್ಸ್‌ನಲ್ಲಿ ಪದಕ ಗೆದ್ದವರ ಮಾದರಿಗಳನ್ನು ಹೊಸ ತಂತ್ರಜ್ಞಾನದೊಂದಿಗೆ ಇತ್ತೀಚೆಗೆ ಪರೀಕ್ಷಿಸಲಾಗಿದ್ದು, ನೂರಾರು ಪ್ರಕರಣಗಳು ಬೆಳಕಿಗೆ ಬಂದಿವೆ.ಆ ಪೈಕಿ ಕಜಕಸ್ತಾನದ ಜುಲ್ಫಿಯಾ ಚಿನ್ಸ್‌ಹಾನ್ಲೊ, ಮೈಯಾ ಮನೆಜಾ ಮತ್ತು ಸ್ವೆಟ್ಲಾನಾ ಪೊಡೊಬೆಜೊವಾ ಸಹ ಸೇರಿದ್ದಾರೆ. ಇವರಲ್ಲದೆ ಲಂಡನ್‌ ಕೂಟದಲ್ಲಿ ಕಂಚಿನ ಪದಕ ಗೆದ್ದಿದ್ದ ಬೆಲರೂಸ್‌ನ ವೇಟ್‌ಲಿಫ್ಟರ್‌ ಒಬ್ಬರನ್ನು ಸಹ ಐಒಸಿ ಅನರ್ಹಗೊಳಿಸಿದೆ. 2012ರ ಲಂಡನ್‌ ಗೇಮ್ಸ್‌ನಲ್ಲಿ ಬೆಳ್ಳಿ ಪದಕ ತಮ್ಮದಾಗಿಸಿಕೊಂಡಿದ್ದ ರಷ್ಯಾದ ವೇಟ್‌ಲಿಫ್ಟರ್‌ ಬೆಸಿಕ್‌ ಕುಡೊಕೊವಾ ಕೂಡ ಡೋಪಿಂಗ್‌ ನಿಯಮ ಉಲ್ಲಂಘಿಸಿದ್ದಾರೆ. ಆದರೆ 2013ರಲ್ಲೇ ಕುಡೊಕೊವಾ ಮೃತಪಟ್ಟಿರುವ ಹಿನ್ನೆಲೆಯಲ್ಲಿ ಅವರಿಂದ ಪದಕ ವಾಪಸ್‌ ಪಡೆಯಲಾಗಿಲ್ಲ ಎಂದು ಐಒಸಿ ಹೇಳಿದೆ. ಸ್ವರ್ಣ ಪದಕ ಗೆದ್ದಿದ್ದ ಜುಲ್ಫಿಯಾ ಚಿನ್ಸ್‌ಹಾನ್ಲೊ (30), ಮನೆಜಾ(30) ಮತ್ತು ಪೊಡೊಬೆಡೊವಾ (29) ಮೂವರು ನಿಷೇಧಿತ ಪದಾರ್ಥ ಸೇವಿಸಿರುವುದು ಸುಧಾರಿತ ಪರೀಕ್ಷೆ ವೇಳೆ ಪತ್ತೆಯಾಗಿದೆ.
↧
ಡೋಪಿಂಗ್‌: ಕಜಕಸ್ತಾನ್‌ದ ಮೂವರಿಂದ ಚಿನ್ನ ಕಸಿದ ಐಒಸಿ
↧