ಡಬ್ಲ್ಯುಟಿಎ ಫೈನಲ್ಸ್‌ ಟೆನಿಸ್‌ ಟೂರ್ನಿ ಸಿಂಗಾಪುರ: ಸ್ಲೊವಾಕಿಯಾದ ಟೆನಿಸ್‌ ತಾರೆ ಡೊಮಿನಿಕಾ ಸಿಬುಲ್ಕೊವಾ, ಇಲ್ಲಿ ನಡೆಯುತ್ತಿರುವ ಡಬ್ಲ್ಯುಟಿಎ ಫೈನಲ್ಸ್‌ ಟೂರ್ನಿಯಲ್ಲಿ ರೊಮೇನಿಯಾದ ಆಟಗಾರ್ತಿ ಸಿಮೋನಾ ಹ್ಯಾಲೆಪ್‌ ಅವರ ಸವಾಲನ್ನು ಅಂತ್ಯಗೊಳಿಸಿದ್ದಾರೆ. ರೌಂಡ್‌ ರಾಬಿನ್‌ ಮಾದರಿಯ ಟೂರ್ನಿಯಲ್ಲಿ ಗ್ರೂಪ್‌ ರೆಡ್‌ನಲ್ಲಿ ಮೊದಲ ಎರಡೂ ಪಂದ್ಯಗಳನ್ನು ಸೋತಿದ್ದ ಡೊಮಿನಿಕಾ ಸಿಬುಲ್ಕೊವಾ, 6-3, 7-6(7/5) ಅಂತರದ ನೇರ ಸೆಟ್‌ಗಳಿಂದ ಹ್ಯಾಲೆಪ್‌ಗೆ ಸೋಲುಣಿಸಿ ತಮ್ಮ ಸೆಮಿಫೈನಲ್‌ ಕನಸನ್ನು ಜೀವಂತವಾಗಿರಿಸಿಕೊಂಡಿದ್ದಾರೆ. ಮತ್ತೊಂದೆಡೆ ಮೊದಲ ಪಂದ್ಯ ಗೆದ್ದು ನಂತರ 2ನೇ ಪಂದ್ಯದಲ್ಲಿ ಸೋಲನುಭವಿಸಿದ್ದ ಹ್ಯಾಲೆಪ್‌, 3ನೇ ಪಂದ್ಯದಲ್ಲಿಯೂ ನಿರಾಸೆ ಅನುಭವಿಸಿ ಸ್ಪರ್ಧೆಯಿಂದ ನಿರ್ಗಮಿಸುವಂತಾಗಿದೆ. ಒಟ್ಟಾರೆ 46.8 ಕೋಟಿ ರೂ. ಬಹುಮಾನ ಮೊತ್ತವನ್ನು ಹೊಂದಿರುವ ಟೂರ್ನಿಯ ಗ್ರೂಪ್‌ ರೆಡ್‌ನಲ್ಲಿ ವಿಶ್ವದ ನಂ.1 ಆಟಗಾರ್ತಿ ಏಂಜಲಿಕ್‌ ಕೆರ್ಬರ್‌ ಸತತ ಎರಡು ಗೆಲುವಿನೊಂದಿಗೆ ಸೆಮಿಫೈನಲ್‌ ಸ್ಥಾನವನ್ನು ಖಚಿತ ಪಡಿಸಿಕೊಂಡಿದ್ದಾರೆ. ಕೆರ್ಬರ್‌, ಅಮೆರಿಕದ ಯುವ ಆಟಗಾರ್ತಿ ಮ್ಯಾಡಿಸ್ಸನ್‌ ಕೀಸ್‌ ವಿರುದ್ಧ ತಮ್ಮ ಕೊನೆಯ ಪಂದ್ಯವನ್ನಾಡಲಿದ್ದಾರೆ. ಈ ಪಂದ್ಯದಲ್ಲಿ ಕೆರ್ಬರ್‌ ನೇರ ಸೆಟ್‌ಗಳ ಜಯ ದಾಖಲಿಸಿದರೆ, ಸಿಬುಲ್ಕೊವಾಗೆ ಸೆಮಿಫೈನಲ್‌ ಹಾದಿ ತೆರೆದುಕೊಳ್ಳುತ್ತದೆ. ಕೀಸ್‌ ಕೇವಲ ಒಂದು ಸೆಟ್‌ ಗೆದ್ದರೂ ಉಪಾಂತ್ಯ ಪ್ರವೇಶಿಸಲಿದ್ದಾರೆ. ಗ್ರೂಪ್‌ ವೈಟ್‌ನಲ್ಲಿ ರಷ್ಯಾದ ಅನುಭವಿ ಆಟಗಾರ್ತಿ ಶ್ವೆತ್ಲಾನ ಕುಜೆತ್ಸೊವಾ, ಸತತ ಎರಡು ಗೆಲುವಿನೊಂದಿಗೆ ಸೆಮಿಫೈನಲ್‌ ಅರ್ಹತೆ ಪಡೆದುಕೊಂಡಿದ್ದರೆ. ಉಳಿದಿರುವ ಒಂದು ಸ್ಥಾನಕ್ಕಾಗಿ ಸ್ಪೇನ್‌ನ ತಾರೆ ಗಾರ್ಬೈನ್‌ ಮುಗುರುಜಾ, ಜೆಕ್‌ಗಣರಾಜ್ಯದ ಕ್ಯಾರೊಲಿನಾ ಪ್ಲಿಸ್ಕೊವಾ ಮತ್ತು ಹಾಲಿ ಚಾಂಪಿಯನ್‌ ಆಗ್ನೇಸ್ಕಾ ರಾಡ್ವಾಂಸ್ಕಾ ನಡುವೆ ಪೈಪೋಟಿಯಿದೆ. ಮುಗುರುಜಾಗೆ ನಿರಾಸೆ ಮೊದಲ ಪಂದ್ಯದಲ್ಲಿ ಮೂರು ಸೆಟ್‌ಗಳ ಹೋರಾಟ ನಡೆಸಿ ಸೋಲುಂಡಿದ್ದ ಹಾಲಿ ಚಾಂಪಿಯನ್‌ ಪೋಲೆಂಡ್‌ನ ಆಗ್ನೆಸ್ಕಾ ರಾಡ್ವಾಂಸ್ಕಾ ಗ್ರೂಪ್‌ ವೈಟ್‌ನಲ್ಲಿ ಖಾತೆ ತೆರೆದಿದ್ದಾರೆ. ಬುಧವಾರ ತಡರಾತ್ರಿ ನಡೆದ ಪಂದ್ಯದಲ್ಲಿ 7-6(7/1), 6-3 ಅಂತರದ ನೇರ ಸೆಟ್‌ಗಳಿಂದ ಫ್ರೆಂಚ್‌ ಓಪನ್‌ ಚಾಂಪಿಯನ್‌ ಸ್ಪೇನ್‌ನ ಗಾರ್ಬೈನ್‌ ಮುಗುರುಜಾ ಅವರನ್ನು ಬಗ್ಗುಬಡಿದರು. ಟೂರ್ನಿಯಲ್ಲಿ ಸತತ 2 ಸೋಲುಂಡಿರುವ ಮುಗುರುಜಾ ಅವರ ಸೆಮಿಫೈನಲ್‌ ಹಾದಿ ಬಹುತೇಕ ಅಂತ್ಯಗೊಂಡಿದೆ.
↧
ಸಿಮೋನಾ ಹ್ಯಾಲೆಪ್‌ ಔಟ್‌
↧