ಬೆಂಗಳೂರು: ಬೆಂಗಳೂರು ಜೈನ್‌ ಯೂನಿವರ್ಸಿಟಿಯ ಮೀನಾಕ್ಷಿ ಕುಬೇರ್‌ ಅವರು ಚಂಡೀಗಢದಲ್ಲಿ ನಡೆಯುತ್ತಿರುವ ಅಖಿಲ ಭಾರತ ಅಂತರ್‌ ಯೂನಿವರ್ಸಿಟಿ ಈಜು ಚಾಂಪಿಯನ್‌ಷಿಪ್‌ನ ಮಹಿಳೆಯರ 400ಮೀಟರ್‌ ವೈಯಕ್ತಿಕ ಮೆಡ್ಲೆ ಸ್ಪರ್ಧೆಯಲ್ಲಿ ಸ್ವರ್ಣ ಪದಕ ಜಯಿಸಿದ್ದಾರೆ. ಕೂಟದ ಮೂರನೇ ದಿನವಾದ ಬುಧವಾರ ನಡೆದ ಫೈನಲ್‌ ಸ್ಪರ್ಧೆಯಲ್ಲಿ ಮಿಂಚಿದ ರಾಜ್ಯದ ಮೀನಾಕ್ಷಿ ಕುಬೇರ್‌ ಮಹಿಳೆಯರ 400ಮೀ. ವೈಯಕ್ತಿಕ ಮೆಡ್ಲೆ ಸ್ಪರ್ಧೆಯಲ್ಲಿ 5:23.58ಸೆಕೆಂಡ್‌ಗಳಲ್ಲಿ ಮೊದಲಿಗರಾಗಿ ಗುರಿ ಮುಟ್ಟುವ ಮೂಲಕ ಸ್ವರ್ಣ ಪದಕಕ್ಕೆ ಕೊರಳೊಡ್ಡಿದರು. ಮೀನಾಕ್ಷಿಗೆ ತೀವ್ರ ಪೈಪೋಟಿವೊಡ್ಡಿದ ಬಿಲ್ಸಾಪುರ ಯೂನಿವರ್ಸಿಟಿಯ ಸೃಷ್ಠಿ ನಾಗ್‌(5:36.24ಸೆಕೆಂಡ್‌) ಮತ್ತು ಮುಂಬಯಿ ಯೂನಿವರ್ಸಿಟಿಯ ಮುಂಗೆಕರ್‌ ಸಿಮ್ರಾನ್‌ (5:41.78 ಸೆಕೆಂಡ್‌) ಕ್ರಮವಾಗಿ ಎರಡು ಮತ್ತು ಮೂರನೇ ಸ್ಥಾನದೊಂದಿಗೆ ಬೆಳ್ಳಿ ಹಾಗೂ ಕಂಚಿನ ಪದಕ ಗೆದ್ದುಕೊಂಡರು. ಮಹಿಳೆಯರ 200 ಮೀಟರ್‌ ಬ್ರೆಸ್ಟ್‌ ಸ್ಟ್ರೋಕ್‌ ವಿಭಾಗದ ಫೈನಲ್‌ನಲ್ಲಿ ಬೆಂಗಳೂರು ಜೈನ್‌ ಯೂನಿವರ್ಸಿಟಿಯ ಪೂರ್ವ ಶೆಟ್ಟಿ 3:00.86 ಸೆಕೆಂಡ್‌ಗಳಲ್ಲಿ ಮೂರನೇ ಸ್ಥಾನದೊಂದಿಗೆ ಕಂಚಿನ ಪದಕಕ್ಕೆ ತೃಪ್ತಿಪಟ್ಟಿದ್ದಾರೆ. ಪಂಜಾಬ್‌ ಯೂನಿವರ್ಸಿಟಿಯ ಚಹತ್‌ ಅರೋರಾ(2:53.75ಸೆ.) ಮತ್ತು ಮುಂಬಯಿ ಯೂನಿವರ್ಸಿಟಿಯ ಉದೇಶಿ ರುತುಜಾ (2:57.69ಸೆ.) ಕ್ರಮವಾಗಿ ಮೊದಲೆರಡು ಸ್ಥಾನ ಗಳಿಸಿ ಚಿನ್ನ ಮತ್ತು ಬೆಳ್ಳಿ ಪದಕವನ್ನು ತಮ್ಮದಾಗಿಸಿಕೊಂಡಿದ್ದಾರೆ.
↧
ಈಜು: ರಾಜ್ಯದ ಮೀನಾಕ್ಷಿಗೆ ಸ್ವರ್ಣ ಪದಕ
↧