ರವಿಚಂದ್ರನ್‌ರ ಹಿರಿಯ ಪುತ್ರ ಮನೋರಂಜನ್‌ ತುಂಬ ಬಿಝಿ ಆಗಿದ್ದಾರೆ. ರವಿಚಂದ್ರನ್‌ ಸದ್ಯ ಹೆಬ್ಬುಲಿ ಚಿತ್ರದಲ್ಲಿ ಮಾತ್ರ ನಟಿಸುತ್ತಿದ್ದರೆ, ಮಗ ಮೂರು ಸಿನಿಮಾಗಳ ನಾಯಕ. ಈಗಷ್ಟೇ ಮನೋರಂಜನ್‌, ಸಾಹೇಬ ಸಿನಿಮಾದ ಶೂಟಿಂಗ್‌ ಮುಗಿಸಿಕೊಂಡು ಡಬ್ಬಿಂಗ್‌ ಕಾರ‍್ಯದಲ್ಲಿ ತೊಡಗಿದ್ದಾರೆ. ಜತೆಗೆ ನಂದ ಕಿಶೋರ್‌ ನಿರ್ದೇಶನದ ವಿಐಪಿ ಚಿತ್ರಕ್ಕೂ ನಾಯಕನಾಗಿ ಆಯ್ಕೆ ಆಗಿದ್ದಾರೆ. ಈ ಸಿನಿಮಾಗಾಗಿ ತಯಾರಿ ಮಾಡಿಕೊಳ್ಳುತ್ತಲೇ, ಮತ್ತೊಂದು ಚಿತ್ರಕ್ಕೂ ಸಹಿ ಮಾಡಿದ್ದಾರೆ. ಈ ಹೊಸ ಚಿತ್ರಕ್ಕೆ ಚಂಗುಮಣಿ ಎಂದು ಹೆಸರಿಡಲಾಗಿದೆ. ಮನೋರಂಜನ್‌ ಅವರ ಚೊಚ್ಚಲು ಸಿನಿಮಾ ಇನ್ನೂ ರಿಲೀಸ್‌ ಆಗಿಲ್ಲ. ಆದರೂ, ಅವರನ್ನು ಸಿನಿಮಾಗಳು ಹುಡುಕಿಕೊಂಡು ಬರುತ್ತಿರುವುದು ವಿಶೇಷ. ಅದರಲ್ಲೂ ಚಂಗುಮಣಿ ಸಿನಿಮಾದ ಬಗ್ಗೆ ಈಗಾಗಲೇ ಕ್ರೇಜ್‌ ಕೂಡ ಕ್ರಿಯೇಟ್‌ ಆಗಿದೆ. ಕಾರಣ 1979ರಲ್ಲಿ ಬಿಡುಗಡೆಯಾದ ಐತಿಹಾಸಿಕ ಚಿತ್ರ 'ಹುಲಿಯ ಹಾಲಿನ ಮೇವು'ದಲ್ಲಿ ರಾಜ್‌ಕುಮಾರ್‌ ಅವರು ಚಂಗುಮಣಿ ಎಂಬ ಪಾತ್ರ ನಿರ್ವಹಿಸಿದ್ದರು. ಹಾಗಾಗಿ ಈ ಚಂಗುಮಣಿಯ ಬಗ್ಗೆ ಕುತೂಹಲ ಮೂಡಿದೆ. ಗೋಲಿಸೋಡಾ ಚಿತ್ರದಲ್ಲಿ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿರುವ ರಘುರಾಜು ಚಂಗುಮಣಿಗೆ ಆ್ಯಕ್ಷ ನ್‌ ಕಟ್‌ ಹೇಳಲಿರುವುದು ವಿಶೇಷ. ರವಿಚಂದ್ರನ್‌ ತಮ್ಮ ಮಗನ ಸಿನಿಮಾ ಭವಿಷ್ಯದ ಬಗ್ಗೆ ತುಂಬ ಕನಸುಗಳನ್ನು ಇಟ್ಟುಕೊಂಡಿದ್ದಾರೆ. ಈಗ ಮನೋರಂಜನ್‌ ಬಿಝಿ ಆಗಿರುವುದನ್ನು ನೋಡಿದರೆ, ಇವರು ಅಪ್ಪನ ಕನಸನ್ನು ನನಸು ಮಾಡುವ ಹಾದಿಯಲ್ಲಿಯಂತೂ ಸಾಗಿದ್ದಾರೆ ಅಂತ ಅನಿಸುತ್ತಿದೆ.
↧
ಅಪ್ಪನಿಗಿಂತಲೂ ಮಗ ಬ್ಯುಸಿಯಂತೆ
↧