ಸಿದ್ಧವಿರುವ ಮನೆಗಳ ಖರೀದಿಗೆ ಸಕಾಲ

* ಸಂಕೇತ್ ಧನೋರ್ಕರ್ ಎಕನಾಮಿಕ್ ಟೈಮ್ಸ್‌

ರಿಯಲ್ ಎಸ್ಟೇಟ್‌ನಲ್ಲಿ ಈಗ ಸಂಪೂರ್ಣ ಸಿದ್ಧವಾಗಿರುವ ಅಥವಾ ಬಹುತೇಕ ಪೂರ್ಣವಾಗಿರುವ ಮನೆಗಳು/ಫ್ಲಾಟ್‌ಗಳು ಖರೀದಿದಾರರಿಗೆ ಪ್ರೀಮಿಯಂ ವೆಚ್ಚದಲ್ಲಿ ಉಳಿತಾಯ ಮಾಡಿಕೊಡುತ್ತಿವೆ. ನಿರ್ಮಾಣ ಹಂತದ ಮನೆಗಿಂತಲೂ ಸಿದ್ಧ ಮನೆ/ಫ್ಲಾಟ್‌ಗಳನ್ನು ಏಕೆ ಖರೀದಿ ಮಾಡಬಾರದು ಎನ್ನುವಂತೆ ಮಾರುಕಟ್ಟೆಯ ಟ್ರೆಂಡ್‌ಗಳು ಬದಲಾಗುತ್ತಿವೆ.

ಅಪೂರ್ಣಗೊಂಡಿರುವ ಫ್ಲಾಟ್‌ಗಳನ್ನು ಖರೀದಿಸುವುದರಲ್ಲಿ ಇರುವ ಅಪಾಯಗಳು ಸಿದ್ಧಗೊಂಡಿರುವ ಮನೆಗಳಲ್ಲಿ ಇರುವುದಿಲ್ಲ. ನಿರ್ಮಾಣ ಹಂತದ ಮನೆಗಳನ್ನು ಖರೀದಿಸಿದರೆ, ಗುತ್ತಿಗೆದಾರ ಅಥವಾ ಫ್ಲಾಟ್ ಕಂಪನಿಗಳು ತಡ ಮಾಡುವ ಸಾಧ್ಯತೆಯೂ ಇರುತ್ತದೆ ಎಂದು ಗ್ರಾಹಕರು ಲೆಕ್ಕ ಹಾಕುತ್ತಿದ್ದಾರೆ.

ಸಮೀಕ್ಷೆಯೊಂದರಲ್ಲಿ - ‘ಯಾವ ಮಾದರಿ ಗೃಹ ಆಸ್ತಿ ಖರೀದಿಗೆ ನೀವು ಇಚ್ಛಿಸುವಿರಿ?’ ಎನ್ನುವ ಪ್ರಶ್ನೆಗೆ ಸಿದ್ಧವಾಗಿರುವ ಮನೆಗಳ ಬಗ್ಗೆ ಶೇ.58.9ರಷ್ಟು ಜನ ಒಲವು ತೋರಿದ್ದಾರೆ. ನಿರ್ಮಾಣ ಹಂತದ ಮನೆಗಳ ಬಗ್ಗೆ ಶೇ.16.1, ಹಳೇ ಮನೆಗಳಿಗೆ ಶೇ.7.1ರಷ್ಟು ಗ್ರಾಹಕರು ಆಸಕ್ತಿ ತೋರಿಸಿದ್ದಾರೆ. ಯಾವ ರೀತಿಯ ಮನೆ ಖರೀದಿಸಬೇಕೆಂದು ತಾವಿನ್ನೂ ನಿರ್ಧರಿಸಿಲ್ಲವೆಂದು ಶೇ.12.4ರಷ್ಟು ಜನ ಹೇಳಿದ್ದರೆ, ಫ್ರೀ ಲಾಂಚ್ ಆಫರ್‌ಗಳಿಗೆ ಶೇ.5.5 ಗ್ರಾಹಕರು ಉತ್ಸುಕತೆ ತೋರಿಸಿದ್ದಾರೆ. ಅಂದರೆ, ಬಹುತೇಕ ಖರೀದಿದಾರರು ವಾಸಕ್ಕೆ ಸಂಪೂರ್ಣ ಸಿದ್ಧವಾಗಿರುವ ಹೊಸ ಮನೆಗಳನ್ನೇ ಬಯಸಿರುವುದು ಸ್ಪಷ್ಟವಾಗಿದೆ.

ಪ್ರೀಮಿಯಂನಲ್ಲಿ ಇಳಿಕೆ

ಸಿದ್ಧವಾಗಿರುವ ಮನೆಗಳು/ಫ್ಲಾಟ್‌ಗಳಿಗೆ ಪ್ರೀಮಿಯಂ ವೆಚ್ಚವು ಸಾಮಾನ್ಯವಾಗಿ ಶೇ.10-15ರಷ್ಟು ಇರುತ್ತದೆ. ಆದರೆ, ಈ ಪ್ರೀಮಿಯಂ ವೆಚ್ಚ ಬೆಂಗಳೂರಿನಲ್ಲಿ ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ ಶೇ.4.9ಕ್ಕೆ ಇಳಿಕೆಯಾಗಿದೆ. ಡಿಸೆಂಬರ್ 2015ರ ಅವಧಿಯಲ್ಲಿ ಇದು ಶೇ.6ರಷ್ಟಿತ್ತು. ಮುಂಬಯಿ, ನೋಯ್ಡಾ ಸೇರಿದಂತೆ ದೇಶದ ಬಹುತೇಕ ನಗರಗಳಲ್ಲಿ ಈ ಮೊತ್ತ ಕುಸಿದಿದ್ದು, ಗ್ರಾಹಕರಿಗೆ ಇದು ವರದಾನವಾಗಿ ಪರಿಣಮಿಸಿದೆ. ಸಿದ್ಧವಾಗಿರುವ ಮನೆಗಳ ಖರೀದಿಸಿದರೆ, ಕೂಡಲೇ ಅದನ್ನು ಸ್ವಾಧೀನಕ್ಕೆ ಪಡೆದು ವಾಸ ಮಾಡಬಹುದು ಇಲ್ಲವೇ ಮರು ಮಾರಾಟ ಮೌಲ್ಯವೂ ದೊರಕುತ್ತದೆ. ನಿರ್ಮಾಣ ಹಂತದ ಮನೆಗಳಿಗೆ ಹೂಡಿಕೆ ಮಾಡಿ 2-3 ವರ್ಷ ಕಾಯುವುದು ಏಕೆ ಎಂದು ಖರೀದಿದಾರರು ಈಗ ಯೋಚಿಸುತ್ತಿದ್ದಾರೆ. ಸಿದ್ಧ ಮನೆಗಳ ಖರೀದಿಯಿಂದ ಬಾಡಿಗೆ ಉಳಿಸುವ ಅವಕಾಶವೂ ಇದೆ.

ಭಾರತೀಯ ರಿಯಲ್ ಎಸ್ಟೇಟ್ ಮಾರುಕಟ್ಟೆಯ ಇತಿಹಾಸದಲ್ಲಿ ಸಿದ್ಧ ಮನೆಗಳು ಅಥವಾ ಬಹುತೇಕ ಪೂರ್ಣಗೊಂಡಿರುವ ಮನೆಗಳ ಪ್ರೀಮಿಯಂ ವೆಚ್ಚ ಇಳಿಕೆಯ ಉದಾಹರಣೆಗಳಿಲ್ಲ,’’ ಎನ್ನುತ್ತಾರೆ ಅಮಿತ್ ಎಂಟರ್‌ಪ್ರೈಸಸ್ ಹೌಸಿಂಗ್‌ನ ಸಿಎಂಡಿ ಕಿಶೋರ್ ಪಾಠಿ. ‘‘ಖ್ಯಾತ ಡೆವಲಪರ್‌ಗಳು ಒಳ್ಳೆಯ ಜಾಗಗಳಲ್ಲಿ ಅಭಿವೃದ್ಧಿಪಡಿಸಿರುವ ಸಿದ್ಧ ಮನೆಗಳು ಈಗ ಲಭ್ಯ ಇವೆ,’’ ಎಂದು ಕಿಶೋರ್ ಹೇಳುತ್ತಾರೆ.

ನೂತನ ರಿಯಲ್ ಎಸ್ಟೇಟ್ ವಿಧೇಯಕವು ಯೋಜನೆಗಳನ್ನು ತ್ವರಿತವಾಗಿ ಪೂರ್ಣಗೊಳಿಸುವಂತೆ ಡೆವಲಪರ್‌ಗಳ ಮೇಲೆ ಒತ್ತಡ ಹೇರುತ್ತದೆ. ಮುಂದಿನ ದಿನಗಳಲ್ಲಿ ಸಿದ್ಧ ಮನೆಗಳ ಲಭ್ಯತೆ ಇನ್ನಷ್ಟು ಹೆಚ್ಚುವ ನಿರೀಕ್ಷೆ ಇದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.