ಯೋಧರ ಕೊಂಡಾಡಿದ ಭಾಗವತ್

ನಾಗ್ಪುರ: ಬಲ್ಟಿಸ್ಥಾನ, ಗಿಲ್ಗಿಟ್, ಮಿರ್‌ಪುರ, ಮುಜಾಫರಬಾದ್ ಸೇರಿದಂತೆ ಸಮಸ್ತ ಕಾಶ್ಮೀರವೂ ಭಾರತದ ಅವಿಭಾಜ್ಯ ಅಂಗ. ಈ ಪ್ರದೇಶಗಳನ್ನು ಆಕ್ರಮಿಸಿಕೊಂಡಿರುವ ಪಾಕಿಸ್ತಾನಕ್ಕೆ ತಕ್ಕ ಪಾಠ ಕಲಿಸುವ ಅಗತ್ಯವಿದೆ ಎಂದು ಆರೆಸ್ಸೆಸ್ ಮುಖ್ಯಸ್ಥ ಮೋಹನ್ ಭಾಗವತ್ ಹೇಳಿದ್ದಾರೆ.

ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ಸಂಸ್ಥಾಪನಾ ದಿನವಾದ ವಿಜಯ ದಶಮಿಯಂದು ಕೇಂದ್ರ ಕಚೇರಿಯಿರುವ ನಾಗ್ಪುರದಲ್ಲಿ ನಡೆದ ಬೃಹತ್ ಶೋಭಾಯಾತ್ರೆ ಹಾಗೂ ಸಮಾವೇಶ ಉದ್ದೇಶಿಸಿ ಮಾತನಾಡಿದ ಭಾಗವತ್, ಪಿಒಕೆಗೆ ನುಗ್ಗಿ ಉಗ್ರರ ಶಿಬಿರಗಳನ್ನು ಧ್ವಂಸಗೊಳಿಸಿದ ಭಾರತೀಯ ಸೇನೆಯ ‘ಸರ್ಜಿಕಲ್ ದಾಳಿ’ಯನ್ನು ಮನಸಾರೆ ಕೊಂಡಾಡಿದರು. ಸೇನೆಯು ಇಂತಹ ದಿಟ್ಟ ಕ್ರಮ ಕೈಗೊಳ್ಳುವುದರ ಹಿಂದೆ ಪ್ರಧಾನಿ ನರೇಂದ್ರ ಮೋದಿ ಸರಕಾರದ ದೃಢ ನಿರ್ಧಾರವೇ ಕಾರಣ ಎಂದು ಮೋದಿ ನಾಯಕತ್ವವನ್ನು ಶ್ಲಾಘಿಸಿದರು.

ಉಗ್ರ ದಮನದ ಮೂಲಕ ಭಾರತವು, ತನ್ನ ಸಹನೆಗೂ ಒಂದು ಮಿತಿಯಿದೆ ಎಂಬುದನ್ನು ತೋರಿಸಿಕೊಟ್ಟಿದೆ. ಉಗ್ರರ ಹುಟ್ಟಡಗಿಸಲು ನಮ್ಮ ಸೇನೆ ತೋರುತ್ತಿರುವ ಧೀರ ಹೋರಾಟವನ್ನು ರಾಜಕೀಯ ಭಿನ್ನಾಭಿಪ್ರಾಯ ಮರೆತು ಎಲ್ಲರೂ ಮುಕ್ತ ಮುನಸ್ಸಿನಿಂದ ಬೆಂಬಲಿಸಬೇಕು. ಅಲ್ಲದೆ ಉಗ್ರ ಪೋಷಕ ಪಾಕಿಸ್ತಾನವನ್ನು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಏಕಾಂಗಿಯಾಗಿಸಲು ಪ್ರಯತ್ನಿಸುತ್ತಿರುವ ಕೇಂದ್ರ ಸರಕಾರಕ್ಕೆ ಸಾಥ್ ನೀಡಬೇಕು ಎಂದು ಕರೆಕೊಟ್ಟರು.

ಹಣೆಪಟ್ಟಿ ಬೇಡ:

‘‘ಗೋ ರಕ್ಷಣೆಯ ನೆಪದಲ್ಲಿ ಯಾರೋ ಕೆಲ ದುರುಳರು ದಲಿತರ ವಿರುದ್ಧ ದೌರ್ಜನ್ಯ ನಡೆಸಿದ ಮಾತ್ರಕ್ಕೆ ಎಲ್ಲ ಗೋ ರಕ್ಷಕರಗಳನ್ನು ಢೋಂಗಿಗಳು ಎಂದು ಜರಿಯುವುದು ಸರಿಯಲ್ಲ. ಜೈನ ಸಮುದಾಯದವರು ಅತ್ಯಂತ ಪ್ರಾಮಾಣಿಕತೆಯಿಂದ ಗೋವುಗಳ ರಕ್ಷಣೆಯಲ್ಲಿ ತೊಡಗಿದ್ದಾರೆ. ಈ ವಿಚಾರದಲ್ಲಿ ಅವರ ಸೇವೆ ಅನನ್ಯ. ಹೀಗಾಗಿ ಎಲ್ಲಾ ಗೋ ರಕ್ಷಕರನ್ನು ನಕಲಿ ಎಂದು ದೂರುವುದರಿಂದ ಕಾನೂನು ಪರಿಮಿತಿಯೊಳಗೆ ಗೋವುಗಳ ರಕ್ಷಣೆಯಲ್ಲಿ ತೊಡಗಿರುವ ಜನರ ಸೇವಾ ಮನೋಭಾವಕ್ಕೆ ಧಕ್ಕೆಯಾಗುತ್ತದೆ,’’ ಎಂದು ಹೇಳಿದರು.

ಚಡ್ಡಿಯಿಂದ ಪ್ಯಾಂಟ್‌ಗೆ....

ಈ ಮೊದಲೇ ನಿರ್ಧರಿಸಿದ್ದಂತೆ ಆರೆಸ್ಸೆಸ್ ಕಾರ‌್ಯಕರ್ತರು ಕಡು ಕಂದು ಬಣ್ಣದ ಪ್ಯಾಂಟ್, ಅದೇ ಬಣ್ಣದ ಸಾಕ್ಸ್ ಮತ್ತು ಕಪ್ಪು ಟೊಪ್ಪಿಯೊಂದಿಗೆ ಗಮನ ಸೆಳೆದರು. ಇದರೊಂದಿಗೆ ಸಂಘದ ನೂತನ ಸಮವಸ್ತ್ರ ದಸರಾ ದಿನದಂದೇ ಅಧಿಕೃತವಾಗಿ ಜಾರಿಗೆ ಬಂದಂತಾಗಿದೆ. 90 ವರ್ಷದ ಇತಿಹಾಸ ಹೊಂದಿರುವ ಆರೆಸ್ಸೆಸ್‌ನ ಖಾಕಿ ಚಡ್ಡಿ, ಖಾಕಿ ಸಾಕ್ಸ್ ಮಾಯವಾಗಿ, ಈಗ ಕಂದು ಬಣ್ಣದ ಪ್ಯಾಂಟ್ ಹಾಗೂ ಕಂದು ಬಣ್ಣದ ಸಾಕ್ಸ್‌ಗಳು ಬಂದಿವೆ. ಉಳಿದಂತೆ ಬಿಳಿ ಅಂಗಿ ಹಾಗೂ ಕಪ್ಪು ಬಣ್ಣದ ಟೋಪಿಯನ್ನು ಹಾಗೆಯೇ ಉಳಿಸಿಕೊಳ್ಳಲಾಗಿದೆ.