ಮುಂಬಯಿ: ಮುಂಬಯಿ ಷೇರು ಮಾರುಕಟ್ಟೆ ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್‌ ಸೋಮವಾರ 374 ಅಂಕಗಳ ಕುಸಿತಕ್ಕೀಡಾಯಿತು. ಕಳದ ಎರಡು ವಾರಗಳಲ್ಲಿಯೇ ಇದು ಗರಿಷ್ಠ ಪತನವಾಗಿದೆ. ಅಮೆರಿಕದಲ್ಲಿ ಅಧ್ಯಕ್ಷೀಯ ಸಂವಾದ ಸನ್ನಿಹಿತವಾಗುತ್ತಿರುವಂತೆಯೇ ಜಾಗತಿಕ ಷೇರು ಮಾರುಕಟ್ಟೆಯಲ್ಲಿ ಸೂಚ್ಯಂಕಗಳು ಮುಗ್ಗರಿಸಿವೆ. ಒಪೆಕ್‌ನ ಸಭೆ ಕೂಡ ಈ ವಾರ ನಡೆಯಲಿರುವುದು ಕೂಡ ನಕಾರಾತ್ಮಕ ಪ್ರಭಾವ ಬೀರಿತು. ಸೆನ್ಸೆಕ್ಸ್‌ 373.94 ಅಂಕ ನಷ್ಟದಲ್ಲಿ 28,294.28ಕ್ಕೆ ದಿನದ ವಹಿವಾಟು ಮುಕ್ತಾಯಗೊಳಿಸಿದರೆ, ನಿಫ್ಟಿ 108.50 ಅಂಕ ನಷ್ಟದಲ್ಲಿ 8,723.05ಕ್ಕೆ ಸ್ಥಿರವಾಯಿತು. ಅಕ್ಟೋಬರ್‌ 4ರಂದು ಆರ್‌ಬಿಐನ ಹಣಕಾಸು ನೀತಿ ಪರಾಮರ್ಶೆ ನಡೆಯಲಿದ್ದು, ಹೂಡಿಕೆದಾರರು ಕಾತರದಿಂದ ಎದುರು ನೋಡುತ್ತಿದ್ದಾರೆ. ಆರ್‌ ಬಿಐನ ಹೊಸ ಗವರ್ನರ್‌ ಉರ್ಜಿತ್‌ ಪಟೇಲ್‌ ನೇತೃತ್ವದಲ್ಲಿ ಮೊದಲ ಹಣಕಾಸು ಪರಾಮರ್ಶೆ ಇದಾಗಲಿದೆ. ಏಷ್ಯಾ, ಯುರೋಪ್‌ನಲ್ಲಿ ಸೂಚ್ಯಂಕಗಳು ಮುಗ್ಗರಿಸಿತು. ಒಎನ್‌ಜಿಸಿ,ಗೇಲ್‌, ಭಾರ್ತಿ ಏರ್‌ಟೆಲ್‌, ಐಟಿಸಿ, ಮಹೀಂದ್ರಾ ಆ್ಯಂಡ್‌ ಮಹೀಂದ್ರಾ, ಹೀರೊಮೊಟೊ ಕಾರ್ಪ್‌ ಷೇರುಗಳು ತೀವ್ರ ನಷ್ಟಕ್ಕೀಡಾಯಿತು. ಹೀಗಿದ್ದರೂ, ಐಸಿಐಸಿಐ ಬ್ಯಾಂಕ್‌, ಎನ್‌ಟಿಪಿಸಿ ಲಾಭ ಗಳಿಸಿತು. ವಿದೇಶಿ ಹೂಡಿಕೆದಾರರು 299 ಕೋಟಿ ರೂ. ಮೌಲ್ಯದ ಷೇರುಗಳನ್ನು ಶುಕ್ರವಾರ ಮಾರಾಟ ಮಾಡಿದ್ದರು.
↧
ಸೆನ್ಸೆಕ್ಸ್‌ 374 ಅಂಕ ಪತನ
↧