* ವಾಹನಗಳಲ್ಲಿ ಬಳಸುವ ವಿಶೇಷ ಉಕ್ಕಿನ ಉತ್ಪಾದನೆಗೆ ಘಟಕ * ಆಟೊಮೊಬೈಲ್‌ ವಲಯದ ಅಭಿವೃದ್ಧಿಗೆ ಸಹಕಾರಿ * ಮೇಕ್‌ ಇನ್‌ ಇಂಡಿಯಾಗೆ ಬೆಂಬಲ * ಆಟೊಮೊಬೈಲ್‌ ಉಕ್ಕು ಆಮದು ತಗ್ಗಿಸಲು ಉಪಯುಕ್ತ ಹೊಸದಿಲ್ಲಿ: ಸಾರ್ವಜನಿಕ ವಲಯದ ಉಕ್ಕು ಉತ್ಪಾದಕ ಸೇಲ್‌ ಹಾಗೂ ಅನಿವಾಸಿ ಭಾರತೀಯ ಉದ್ಯಮಿ ಲಕ್ಷ್ಮೇ ಮಿತ್ತಲ್‌ ನೇತೃತ್ವದ ಅರ್ಸೆಲರ್‌ ಮಿತ್ತಲ್‌ ಜಂಟಿ ಸಹಭಾಗಿತ್ವದಲ್ಲಿ ಸುಮಾರು 100 ಕೋಟಿ ಡಾಲರ್‌(6,700 ಕೋಟಿ ರೂ.) ಹೂಡಿಕೆಯ ಉಕ್ಕು ಉತ್ಪಾದನಾ ಘಟಕ ಭಾರತದಲ್ಲಿ ನಿರ್ಮಿಸಲು ಉದ್ದೇಶಿಸಲಾಗಿದ್ದು, ಮುಂದಿನ ಡಿಸೆಂಬರ್‌ ವೇಳೆಗೆ ಒಪ್ಪಂದ ಅಂತಿಮವಾಗುವ ನಿರೀಕ್ಷೆ ಇದೆ. ಉಕ್ಕು ಸಚಿವ ಚೌಧರಿ ಬೀರೇಂದ್ರ ಸಿಂಗ್‌ ಅವರು ಈ ವಿಷಯವನ್ನು ಬುಧವಾರ ತಿಳಿಸಿದ್ದಾರೆ. ಈ ಸಂಬಂಧ ಕೈಗೊಳ್ಳಬೇಕಾದ ಪ್ರಕ್ರಿಯೆಗಳ ಬಗ್ಗೆ ಸೇಲ್‌ ಮತ್ತು ಅರ್ಸೆಲರ್‌ ಕಂಪನಿಗೆ ಸೂಚಿಸಲಾಗಿದ್ದು, ಡಿಸೆಂಬರ್‌ನಲ್ಲಿ ಒಪ್ಪಂದ ಅಂತಿಮವಾಗಲಿದೆ ಎಂದರು. ಈಗಾಗಲೇ ಉಭಯ ಕಂಪನಿಗಳ ನಡುವೆ ಎಂಒಯು ಆಗಿದೆ. ಬೀರೇಂದ್ರ ಸಿಂಗ್‌ ಅವರು ಲಂಡನ್‌ನಲ್ಲಿ ಕಳೆದ ವಾರ ಲಕ್ಷ್ಮೇ ಮಿತ್ತಲ್‌ ಜತೆಗೆ ಮಾತುಕತೆ ನಡೆಸಿದ್ದು, ಸೇಲ್‌ ಅಧ್ಯಕ್ಷ ಪಿ.ಕೆ ಸಿಂಗ್‌ ಅವರೂ ಭಾಗವಹಿಸಿದ್ದರು. ಉದ್ದೇಶಿತ ಘಟಕ ಅತ್ಯಾಧುನಿಕ ತಂತ್ರಜ್ಞಾನ ಮತ್ತು ಮೂಲ ಸೌಕರ್ಯವನ್ನು ಒಳಗೊಳ್ಳಲಿದೆ. ಆಟೊಮೇಟಿವ್‌ ಉಕ್ಕು ಉತ್ಪಾದನಾ ಘಟಕ (ವಾಹನಗಳ ತಯಾರಿಕೆಯಲ್ಲಿ ಬಳಸುವ ಉಕ್ಕು) ಇದಾಗಿರಲಿದ್ದು, ಸೇಲ್‌ನ ಉತ್ಪನ್ನಗಳನ್ನು ವೃದ್ಧಿಸಲಿದೆ. ಭಾರತ 2020ರ ವೇಳೆಗೆ ಜಗತ್ತಿನಲ್ಲಿಯೇ ಅತಿ ದೊಡ್ಡ ಆಟೊಮೊಬೈಲ್‌ ಉತ್ಪಾದನಾ ತಾಣವಾಗಿ ಹೊರಹೊಮ್ಮಲು ಯತ್ನಿಸುತ್ತಿದೆ. ಈ ನಿಟ್ಟಿನಲ್ಲಿ ಭಾರತದಲ್ಲಿಯೇ ಆಟೊಮೊಬೈಲ್‌ಗೆ ಸಂಬಂದಿಸಿದ ಉಕ್ಕು ಉತ್ಪಾದನೆಯಾಗಬೇಕು. ಹಾಗೂ ಇದರ ಆಮದು ತಗ್ಗಬೇಕಾಗಿದೆ. ಈ ಹಿನ್ನೆಲೆಯಲ್ಲಿ ಉಭಯ ಕಂಪನಿಗಳ ಜಂಟಿ ಸಹಭಾಗಿತ್ವದ ಕಂಪನಿ ಮಹತ್ವ ಪಡೆದಿದೆ.
↧
ಸೇಲ್‌-ಅರ್ಸೆಲರ್‌ ಮಿತ್ತಲ್‌ ಉಕ್ಕು ಘಟಕ: ಡಿಸೆಂಬರ್‌ನಲ್ಲಿ ಅಂತಿಮ
↧