ಹೊಸದಿಲ್ಲಿ: ಜನಪ್ರಿಯ ಬ್ರಾಂಡ್‌ಗಳ ಸ್ಮಾರ್ಟ್‌ಫೋನ್‌ ಅಥವಾ ಟ್ಯಾಬ್ಲೆಟ್‌ಗಳನ್ನು ಖರೀದಿಸುವ ಹಂಬಲ ಅನೇಕರಿಗೆ. ಆದರೆ, ಕೆಲವರಿಗೆ ದರ ಕೈಗೆಟಕುವುದಿಲ್ಲ. ಇಂಥವರಿಗಾಗಿಯೇ ಅಮೆಜಾನ್ ಇಂಡಿಯಾ 'ಬಳಸಿದ ಮತ್ತು ನವೀಕರಿಸಿದ(ರೀಪರ್ಬಿಷ್‌ಮೆಂಟ್‌) ಗ್ಯಾಜೆಟ್'ಗಳ ಮಾರಾಟಕ್ಕೆ ಆನ್‌ಲೈನ್‌ ಮಳಿಗೆಯನ್ನು ತೆರೆದಿದೆ. ಸ್ಮಾರ್ಟ್‌ಫೋನ್‌ಗಳಷ್ಟೇ ಅಲ್ಲ, ಟ್ಯಾಬ್ಲೆಟ್‌ಗಳು, ಲ್ಯಾಪ್‌ಟಾಪ್‌ಗಳನ್ನೂ 6 ತಿಂಗಳ ವ್ಯಾರಂಟಿಯೊಂದಿಗೆ ಗ್ರಾಹಕರಿಗೆ ಮಾರಾಟ ಮಾಡುತ್ತಿದೆ. ಆ ಮೂಲಕ ಹಳೆಯ ಗ್ಯಾಜೆಟ್‌ಗಳನ್ನು ಮಾರಾಟ ಮಾಡುವ ದಿಲ್ಲಿಯ ಗಫರ್‌ ಮಾರ್ಕೆಟ್‌, ಮುಂಬಯಿನ ಲಾಮಿಂಗ್‌ಟನ್‌ ರೋಡ್‌ ಮತ್ತು ಕೋಲ್ಕೊತಾದ ಚಾಂದಿನಿ ಮಾರ್ಕೆಟ್‌ ಸೇರಿದಂತೆ ದೇಶದ ಸೆಕೆಂಡ್‌ ಹ್ಯಾಂಡ್‌ ಉತ್ಪನ್ನಗಳ ಮಾರುಕಟ್ಟೆಗಳಿಗೆ ಅಮೆಜಾನ್ ಸ್ಪರ್ಧೆಯೊಡ್ಡಿದೆ. ಅಮೆಜಾನ್.ಇನ್‌ ಜಾಲತಾಣಕ್ಕೆ ಹೋಗಿ, ಬಳಸಿದ ಮತ್ತು ನವೀಕರಿಸಿದ ಗ್ಯಾಜೆಟ್‌ಗಳ ವಿಭಾಗವನ್ನು ಕ್ಲಿಕ್‌ ಮಾಡಿದರೆ ಸಾಕು. ಅಲ್ಲಿ ನಿಮ್ಮ ಕೈಗೆಟಕುವ ಸ್ಮಾರ್ಟ್‌ಫೋನ್‌ ಮತ್ತಿತರ ಗ್ಯಾಜೆಟ್‌ಗಳು ಲಭ್ಯ. ಬಳಸಿದ ಮತ್ತು ನವೀಕರಿಸಿದ ಗ್ಯಾಜೆಟ್‌ಗಳ ಮಾರಾಟಕ್ಕೆ ಭಾರತದಲ್ಲಿ ಅವಕಾಶ ಕಲ್ಪಿಸಿದ ಮೊದಲ ಇ-ಕಾಮರ್ಸ್‌ ಬ್ರಾಂಡ್‌ ಆಗಿ ಅಮೆಜಾನ್ ಹೊರಹೊಮ್ಮಿದೆ. ====== ಹೊಸ ಆವೃತ್ತಿ ಮತ್ತು ವಿನೂತನ ಆಯ್ಕೆಗಳಿರುವ ಸ್ಮಾರ್ಟ್‌ಫೋನ್‌/ಲ್ಯಾಪ್‌ಟಾಪ್‌/ಟ್ಯಾಬ್ಲೆಟ್‌ಗಳನ್ನು ಖರೀದಿಸಲು ಕೆಲವರು ತಮ್ಮ ಹಳೆಯ ಸಾಧನಗಳನ್ನು ಮಾರಾಟ ಮಾಡುತ್ತಾರೆ. ಇಂಥ ಉತ್ಪನ್ನಗಳಿಗೆ ಅಮೆಜಾನ್ ಸ್ಥಳಾವಕಾಶ ಕಲ್ಪಿಸಿದೆ. ಇನ್ನೂ ಕೆಲವು ಸಲ ತಾಂತ್ರಿಕ ಸಮಸ್ಯೆ ಮತ್ತಿತರ ಕಾರಣಗಳಿಗೆ ತಮ್ಮ ಫೋನ್‌ಗಳನ್ನು ಗ್ರಾಹಕರು ಉತ್ಪಾದಕರಿಗೆ ವಾಪಸ್‌ ಮಾಡಬಹುದು. ಅಂಥ ಫೋನ್‌ಗಳಲ್ಲಿನ ಸಮಸ್ಯೆ ನಿವಾರಿಸಿ ಮತ್ತು ನವೀಕರಿಸಲಾಗುತ್ತದೆ. ಇಂಥ ಫೋನ್‌ಗಳೂ ಅಮೆಜಾನ್‌ನಲ್ಲಿ ಲಭ್ಯ. ಸೀಲ್‌ ಮಾಡಿದ ಪ್ಯಾಕಿಂಗ್‌ನಲ್ಲಿ ನವೀಕರಿಸಿದ ಉತ್ಪನ್ನಗಳನ್ನು ಗ್ರಾಹಕರಿಗೆ ರವಾನಿಸಲಾಗುತ್ತದೆ. ಒಂದು ವೇಳೆ ಉತ್ಪನ್ನವು ಹೆಚ್ಚು ಕಾಲ ಬಾಳಿಕೆ ಬರದೇ ಇದ್ದರೆ, ಅದನ್ನು ಮರಳಿಸಲು ಅವಕಾಶವಿಲ್ಲ ಎನ್ನುವ ಷರತ್ತು ವಿಧಿಸಲಾಗಿದೆ.
↧
ಅಮೆಜಾನ್: ಬಳಸಿದ, ನವೀಕರಿಸಿದ ಗ್ಯಾಜೆಟ್ ಲಭ್ಯ
↧