ಬೆಂಗಳೂರು: ಕನ್ನಡಿಗ ಕೆ.ಎಲ್‌ ರಾಹುಲ್‌ ಆಡಿದ ವೀರೋಚಿತ ಶತಕದ ಇನಿಂಗ್ಸ್‌ಗೆ ಗೆಲುವಿನ ಸಂಭ್ರಮ ಸಿಗಲಿಲ್ಲ. ತನ್ನ ಕೈಯಲ್ಲಿದ್ದ ಪಂದ್ಯವನ್ನು ಅಂತಿಮ ಎಸೆತದಲ್ಲಿ ವೆಸ್ಟ್ ಇಂಡೀಸ್‌ಗೆ ಒಪ್ಪಿಸಿದ ಭಾರತ, ಮೊದಲ ಟಿ20 ಪಂದ್ಯದಲ್ಲಿ 1 ರನ್ ಅಂತರದ ಸೋಲು ಅನುಭವಿಸಿತು. ಸೆಂಟ್ರಲ್‌ ಬ್ರೊವಾರ್ಡ್‌ ರೀಜನಲ್‌ ಪಾರ್ಕ್‌ ಮೈದಾನದಲ್ಲಿ ಶನಿವಾರ ನಡೆದ ಪಂದ್ಯದಲ್ಲಿ ಟಾಸ್‌ ಸೋತು ಮೊದಲು ಬ್ಯಾಟಿಂಗ್‌ ನಡೆಸಿದ ವಿಂಡೀಸ್‌ 20 ಓವರ್‌ಗಳಲ್ಲಿ 6 ವಿಕೆಟ್‌ಗೆ 245 ರನ್ ಗಳಿಸಿತು. ಬೆಟ್ಟದಂತಹ ಗುರಿ ಬೆನ್ನಟ್ಟಿದ ಟೀಮ್‌ ಇಂಡಿಯಾ, 20 ಓವರ್‌ಗಳಲ್ಲಿ 4 ವಿಕೆಟ್‌ ನಷ್ಟಕ್ಕೆ 244 ರನ್ ಗಳಿಸಿ ವೀರೋಚಿತ ಸೋಲಿಗೆ ಶರಣಾಯಿತು. ಕೊನೆಯ ಓವರ್‌ನಲ್ಲಿ ಭಾರತದ ಗೆಲುವಿಗೆ ಕೇವಲ 8 ರನ್ ಬೇಕಿತ್ತು. ಮೊದಲ 5 ಎಸೆತಗಳಲ್ಲಿ ಆರು ರನ್ ಗಳಿಸಿದ್ದ ಟೀಮ್‌ ಇಂಡಿಯಾ ಅಂತಿಮ ಎಸೆತದಲ್ಲಿ 2 ರನ್ ಗಳಿಸಬೇಕಿತ್ತು. ಆದರೆ ನಾಯಕ ಧೋನಿ ಕೊನೆಯ ಎಸೆತದಲ್ಲಿ ಔಟಾಗುತ್ತಿದ್ದಂತೆ ಭಾರತದ ಗೆಲುವಿನ ಕನಸು ಭಗ್ನಗೊಂಡಿತು. ರೋಚಕ ಜಯ ಸಾಧಿಸಿದ ವಿಂಡೀಸ್‌ 2 ಪಂದ್ಯಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದ್ದು, ಸರಣಿಯ ಅಂತಿಮ ಪಂದ್ಯ ಭಾನುವಾರ ಇದೇ ಮೈದಾನದಲ್ಲಿ ನಡೆಯಲಿದೆ. ರಾಹುಲ್‌ ಶತಕ ವ್ಯರ್ಥ ಕಠಿಣ ಗುರಿ ಬೆನ್ನಟ್ಟುವ ವೇಳೆ ಭಾರತಕ್ಕೆ ಗೆಲುವಿನ ಆಸೆ ಚಿಗುರಿಸಿದ್ದು ಕರ್ನಾಟಕದ ಭರವಸೆಯ ಬ್ಯಾಟ್ಸ್‌ಮನ್‌ ಕೆ.ಎಲ್‌ ರಾಹುಲ್‌. 4ನೇ ಕ್ರಮಾಂಕದಲ್ಲಿ ಕ್ರೀಸ್‌ಗಿಳಿದ ರಾಹುಲ್‌ 46 ಎಸೆತಗಳಲ್ಲಿ ಟಿ20 ವೃತ್ತಿಜೀವದ ಚೊಚ್ಚಲ ಶತಕ ಸಿಡಿಸಿ ಅಬ್ಬರಿಸಿದರು. ಒಟ್ಟು 51 ಎಸೆತಗಳನ್ನೆದುರಿಸಿದ ರಾಹುಲ್‌ 12 ಬೌಂಡರಿ ಹಾಗೂ 5 ಮನಮೋಹಕ ಸಿಕ್ಸರ್‌ಗಳ ನೆರವಿನಿಂದ ಅಜೇಯ 110 ರನ್ ಗಳಿಸಿದರು. ಅಲ್ಲದೆ ರೋಹಿತ್‌ ಶರ್ಮಾ (62 ರನ್; 28 ಎಸೆತ, 4 ಬೌಂಡರಿ, 4 ಸಿಕ್ಸರ್‌) ಜತೆ 3ನೇ ವಿಕೆಟ್‌ಗೆ 89 (43 ಎಸೆತ) ರನ್ ಸೇರಿಸಿದ ರಾಹುಲ್‌, 4ನೇ ವಿಕೆಟ್‌ಗೆ ನಾಯಕ ಧೋನಿ (43, 25 ಎ.) ಜತೆ 49 ಎಸೆತಗಳಲ್ಲಿ ರನ್‌ಗಳ ಜತೆಯಾಟವಾಡಿದರು. ಆದರೆ ಅಂತಿಮವಾಗಿ ಭಾರತ ಸೋಲುವುದರೊಂದಿಗೆ ರಾಹುಲ್‌ ಹೋರಾಟ ವ್ಯರ್ಥಗೊಂಡಿತು. ವಿಂಡೀಸ್‌ ಬ್ಯಾಟಿಂಗ್‌ ಅಬ್ಬರ ಇದಕ್ಕೂ ಮೊದಲು ಅಮೆರಿಕದಲ್ಲಿ ಮೊದಲ ಬಾರಿ ಕ್ರಿಕೆಟ್‌ ಪಂದ್ಯವಾಡಲು ಕಣಕ್ಕಿಳಿದ ಭಾರತ ಟಾಸ್‌ ಗೆದ್ದು ಮೊದಲು ಫೀಲ್ಡಿಂಗ್‌ ಆಯ್ಕೆ ಮಾಡಿಕೊಂಡಿತು. ವಿಂಡೀಸ್‌ ಪರ ಜಾನ್ಸನ್‌ ಚಾರ್ಲ್ಸ್ (79, 33 ಎ.) ಎವಿನ್‌ ಲೆವಿಸ್‌ (100, 49 ಎ.) ಮೊದಲ ವಿಕೆಟ್‌ಗೆ 126 ರನ್ ಸೇರಿಸಿದರು. 48 ಎಸೆತಗಳಲ್ಲಿ ಚೊಚ್ಚಲ ಶತಕ ಗಳಿಸಿದ ಲೆವಿಸ್‌, ಸ್ಟುವರ್ಟ್‌ ಬಿನ್ನಿ ಎಸೆದ ಇನಿಂಗ್ಸ್‌ನ 11ನೇ ಓವರ್‌ನಲ್ಲಿ ಐದು ಸಿಕ್ಸರ್‌ಗಳ ಸಹಿತ 32 ರನ್ ಸಿಡಿಸಿದರು. ಸೆಂಟ್ರಲ್‌ ಬ್ರೊವಾರ್ಡ್‌ ರೀಜನಲ್‌ ಪಾರ್ಕ್‌ ಮೈದಾನ ಗಾತ್ರದಲ್ಲಿ ಚಿಕ್ಕದಾಗಿದ್ದ ಕಾರಣ ಪಂದ್ಯದಲ್ಲಿ ಸಿಕ್ಸರ್‌ಗಳ ಸುರಿಮಳೆಯಾಯಿತು. ವಿಂಡೀಸ್‌ ಇನಿಂಗ್ಸ್‌ನಲ್ಲಿ 21 ಸಿಕ್ಸರ್‌ ಹಾಗೂ ಭಾರತದ ಇನಿಂಗ್ಸ್‌ನಲ್ಲಿ 11 ಸಿಕ್ಸರ್‌ ಸೇರಿದಂತೆ ಒಟ್ಟು 32 ಸಿಕ್ಸರ್‌ಗಳು ದಾಖಲಾದವು.
↧
ಭಾರತದ ವಿರುದ್ಧ ವೆಸ್ಟ್ ಇಂಡೀಸ್‌ಗೇ ರೋಚಕ 1 ರನ್ ಜಯ
↧