ಹೊಸದಿಲ್ಲಿ: ಮುಂದಿನ 3-4 ತಿಂಗಳಲ್ಲಿ ಕಾಲ್‌ ಡ್ರಾಪ್‌ ಸಮಸ್ಯೆ ತಿಳಿಯಾಗುವ ಲಕ್ಷಣಗಳು ಕಾಣಿಸಿವೆ ಎಂದು ಕೇಂದ್ರ ದೂರ ಸಂಪರ್ಕ ಸಚಿವ ಮನೋಜ್‌ ಸಿನ್ಹಾ ಹೇಳಿದ್ದಾರೆ. ಲೋಕಸಭೆಗೆ ಈ ಬಗ್ಗೆ ಮಾಹಿತಿ ನೀಡಿದ ಅವರು, ''ಟೆಲಿಕಾಂ ಆಪರೇಟರ್‌ಗಳ ಜತೆ ಎರಡು ದಿನಗಳ ಹಿಂದೆ ಸಭೆ ನಡೆಸಿದ್ದು, ಕಾಲ್‌ ಡ್ರಾಪ್‌ ಸಮಸ್ಯೆ ನೀಗಿಸುವ ನಿಟ್ಟಿನಲ್ಲಿ ಕ್ರಮ ಕೈಗೊಳ್ಳುವಂತೆ ಸೂಚನೆ ನೀಡಲಾಗಿದೆ. ಪರಿಸ್ಥಿತಿ ಸುಧಾರಿಸುವ ವಿಶ್ವಾಸ ನಮ್ಮಲ್ಲಿದೆ,'' ಎಂದರು. ''ಮೂಲ ಸೌಕರ್ಯ ಸುಧಾರಣೆ ಮತ್ತು ಒಂದು ಲಕ್ಷ ಬೇಸ್‌ ಟ್ರಾನ್ಸಿವರ್‌ ಸ್ಟೇಷನ್‌ಗಳನ್ನು ಸ್ಥಾಪಿಸಲು 20,000 ಕೋಟಿ ರೂ.ಗಳನ್ನು ಟೆಲಿಕಾಂ ಆಪರೇಟರ್‌ಗಳು ಖರ್ಚು ಮಾಡಲಿದ್ದಾರೆ. ಇದರಿಂದ ಗ್ರಾಹಕರಿಗೆ ಉತ್ತಮ ಗುಣಮಟ್ಟದ ಸೇವೆ ಲಭಿಸಲಿದೆ,'' ಎಂದು ಹೇಳಿದರು. ''ಮೊಬೈಲ್‌ ಇಂಟರ್‌ನೆಟ್‌ ಡೇಟಾ ಯೋಜನೆಗಳ ಅವಧಿಯನ್ನು 365 ದಿನಕ್ಕೆ ವಿಸ್ತರಿಸುವ(ಪ್ರಸ್ತುತ ಗರಿಷ್ಠ 90 ದಿನಗಳ ಅವಧಿ ಇದೆ) ನಿಟ್ಟಿನಲ್ಲಿ ದೂರ ಸಂಪರ್ಕ ಸಚಿವಾಲಯವು ಸಂಬಂಧಿಸಿದ ಇಲಾಖೆಗಳ ಜತೆ ಸಂಪರ್ಕದಲ್ಲಿದೆ,'' ಎಂದು ಸಚಿವರು ವಿವರಿಸಿದರು.
↧
ಕಾಲ್‌ ಡ್ರಾಪ್‌ ಸಮಸ್ಯೆ ಸುಧಾರಣೆ
↧