ಪಟಣಾ: ಪಿಯುಸಿ ಟಾಪರ್‌ಗಳ ಹಗರಣಕ್ಕೆ ಸಂಬಂಧಿಸಿದಂತೆ ಬಿಹಾರ ಶಾಲಾ ಪರೀಕ್ಷಾ ಮಂಡಳಿಯ ಮಾಜಿ ಕಾರ್ಯದರ್ಶಿ ಹರಿಹರನಾಥ್‌ ಝಾ ಅವರನ್ನು ಸೋಮವಾರ ವಿಶೇಷ ತನಿಖಾ ತಂಡ (ಎಸ್‌ಐಟಿ)ವು ಬಂಧಿಸಿದೆ. ಹಗರಣಕ್ಕೆ ಸಂಬಂಧಿಸಿದ ವಿಚಾರಣೆ ಸಲುವಾಗಿ ಶನಿವಾರದಿಂದಲೇ ಎಸ್‌ಐಟಿಯ ವಶದಲ್ಲಿದ್ದ ಝಾ ಅವರನ್ನು, ಅವರೇ ಸ್ವತಃ ಬಾಯಿಬಿಟ್ಟ ಮಾಹಿತಿಗಳು ಹಾಗೂ ಇತರೆ ಬಂಧಿತರು ನೀಡಿದ ಮಾಹಿತಿಗಳ ಆಧಾರದ ಮೇಲೆ ಬಂಧಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.ಝಾ ಅವರನ್ನು ಎಸ್‌ಐಟಿಯು ಸ್ಥಳೀಯ ನ್ಯಾಯಾಲಯಕ್ಕೆ ಹಾಜರುಪಡಿಸಲಿದೆ. ಹಗರಣ ವಿಚಾರವಾಗಿ ಈಗಾಗಲೇ ಪಿಯು ಮಂಡಳಿ ಮಾಜಿ ಅಧ್ಯಕ್ಷ ಲಾಲ್‌ಕೇಶ್ವರ್‌ ಪ್ರಸಾದ್‌ ಮತ್ತು ಅವರ ಪತ್ನಿ, ಜೆಡಿಯು ಮಾಜಿ ಶಾಸಕಿ, ವಾರಣಸಿಯ ಉಶಾ ಸಿನ್ಹಾ, ವಿ.ಆರ್‌.ಕಾಲೇಜಿನ ಪ್ರಿನ್ಸಿಪಾಲ್‌ ಮತ್ತು ನಿರ್ದೇಶಕ ಬಚ್ಚಾ ರೈ, ಹಾಗೂ 12ನೇ ತರಗತಿಯ ಟಾಪರ್‌ ರೂಬಿ ರೈ ಸೇರಿ 20ಕ್ಕೂ ಹೆಚ್ಚು ಜನರು ಬಂಧಿತರಾಗಿದ್ದಾರೆ. ಹಗರಣದ ಮಾಸ್ಟರ್‌ಮೈಂಡ್‌ ರೈ ಆಗಿದ್ದು, ಬಿಹಾರದ ಇಬ್ಬರು ಟಾಪರ್‌ಗಳೂ ಈತನ ಕಾಲೇಜಿನವರೇ ಆಗಿದ್ದರು. ಆಜ್‌ತಕ್‌ ಸುದ್ದಿ ವಾಹಿನಿ ನಡೆಸಿದ ಕುಟುಕು ಕಾರ್ಯಾಚರಣೆಯಲ್ಲಿ ಟಾಪರ್‌ಗಳು ಅವರು ಓದಿದ ವಿಷಯಕ್ಕೆ ಸಂಬಂಧಿಸಿದಂತೆ ಅತಿ ಸರಳ ಪ್ರಶ್ನೆಗಳಿಗೂ ಉತ್ತರಿಸಲು ವಿಫಲರಾದ ಬೆನ್ನಲ್ಲಿ ಹಗರಣದ ವಾಸನೆ ಬಡಿದಿದೆ. ಕಲಾ ವಿಭಾಗದ ಟಾಪರ್‌ ಎನಿಸಿದ ರೂಬಿ ರೈಗೆ ಸಮಾಜಶಾಸ್ತ್ರ ಯಾವುದರ ಕುರಿತಾಗಿ ಎಂದು ಪ್ರಶ್ನಿಸಿದಾಗ ಅಡುಗೆಯ ಬಗ್ಗೆ ಎಂದು ಹೇಳಿ ಆಘಾತಗೊಳಿಸಿದ್ದಳು. ಈ ಹಿನ್ನೆಲೆಯಲ್ಲಿ ಎಸ್‌ಐಟಿ ತನಿಖೆ ಆರಂಭಿಸಿತ್ತು.
↧
ಟಾಪರ್‌ ಹಗರಣ; ಪಿಯು ಮಂಡಳಿ ಮಾಜಿ ಕಾರ್ಯದರ್ಶಿ ಬಂಧನ
↧