55 ಲಕ್ಷ ಹವಾಲಾ ಹಣ ದರೋಡೆ ?

ಬೆಂಗಳೂರು: ಚಿನ್ನಾಭರಣ ಖರೀದಿಸಲೆಂದು ಹವಾಲಾ ಹಣದೊಂದಿಗೆ ಬೆಂಗಳೂರಿಗೆ ಬಂದಿದ್ದ ಕೇರಳ ಮೂಲದ ವ್ಯಾಪಾರಿಯೊಬ್ಬರ ಬಳಿ ಇದ್ದ 55 ಲಕ್ಷ ರೂ ಅನ್ನು ದುಷ್ಕರ್ಮಿಗಳು ದರೋಡೆ ಮಾಡಿರುವ ಪ್ರಕರಣವೊಂದು ನಡೆದಿರುವುದಾಗಿ ತಿಳಿದುಬಂದಿದೆ.

ಮಂಗಳವಾರ ಸಂಜೆ ಘಟನೆ ನಡೆದಿದ್ದು ಕೇರಳ ಮೂಲದ ಖಲೀಂ ಎನ್ನುವವರು ಹಣದ ಸಮೇತ ಬೆಂಗಳೂರಿಗೆ ಬಂದಿದ್ದರು. ಅವರು ಕಂದಾಯ ಭವನದ ಬಳಿ ಇರುವ ನಬಾರ್ಡ್‌ ಕಚೇರಿ ಸಮೀಪ ನಿಂತಿದ್ದಾಗ ಅಲ್ಲಿಗೆ ಬಂದ ದುಷ್ಕರ್ಮಿಗಳು 55 ಲಕ್ಷ ರೂ ಇದ್ದ ಬ್ಯಾಗ್‌ ಕಿತ್ತುಕೊಂಡು ಪರಾರಿಯಾಗಿದ್ದಾರೆ ಎಂದು ತಿಳಿದುಬಂದಿದೆ.

ಖಲೀಂ ಬಳಿ ಇದ್ದ ಹಣ ಹವಾಲಾ ಹಣವಾಗಿದ್ದರಿಂದ ಅವರು ದೂರು ನೀಡದೆ ಹಾಗೇ ವಾಪಸಾದರು. ಆದರೆ ಈ ಬಗ್ಗೆ ಹಲಸೂರು ಗೇಟ್‌ ಪೊಲೀಸರಿಗೆ ಮಾಹಿತಿ ಸಿಕ್ಕಿದ್ದರೂ , ದೂರು ನೀಡಲು ಯಾರೂ ಮುಂದೆ ಬಂದಿಲ್ಲ. ''ಘಟನೆ ಬಗ್ಗೆ ಸಂಪೂರ್ಣ ಮಾಹಿತಿ ಸಿಕ್ಕಿಲ್ಲ. ದರೋಡೆಗೆ ಒಳಗಾಗಿರುವ ವ್ಯಾಪಾರಿ ಏಕೆ ದೂರು ನೀಡಿಲ್ಲ ಎನ್ನುವುದೂ ಗೊತ್ತಿಲ್ಲ. ಎಷ್ಟು ಹಣ, ಅದರ ಮೂಲವೂ ಗೊತ್ತಾಗಿಲ್ಲ. ಬೇರೆ ಬೇರೆ ವ್ಯಾಪಾರಿಗಳ ಮೂಲಕ ಅಸ್ಪಷ್ಟ ಮಾಹಿತಿ ನಮಗೆ ಸಿಕ್ಕಿದೆ,''ಎಂದು ಅಧಿಕಾರಿಗಳು ತಿಳಿಸಿದರು.