ಆಧಾರ್ ಗುರುತು ದೃಢೀಕರಣಕ್ಕೆ ಪೂರಕ ಹೊಸ ಟ್ಯಾಬ್ಲೆಟ್

ಬೆಂಗಳೂರು: ಸ್ಮಾರ್ಟ್‌ಫೋನ್ ದಿಗ್ಗಜ ಕಂಪನಿ ಸ್ಯಾಮ್ಸಂಗ್ ಹೊಸ 'ಮೇಡ್ ಇನ್ ಇಂಡಿಯಾ' ಟ್ಯಾಬ್ಲೆಟ್ ಘೋಷಿಸಿದೆ. ಇದು ನಗದು-ರಹಿತ ಹಾಗೂ ಕಾಗದ-ರಹಿತ ವಹಿವಾಟುಗಳಿಗೆ ಬಳಕೆಯಾಗಬಲ್ಲ 'ಆಧಾರ್' ಸೇರಿದಂತೆ ಬಯೋಮೆಟ್ರಿಕ್ ತಂತ್ರಜ್ಞಾನದ ವಿನೂತನ ಸಾಧ್ಯತೆಗಳಿಗೆ ನಾಂದಿ ಹಾಡಿದೆ.

ಇದರಲ್ಲಿರುವ ಐರಿಸ್ ತಂತ್ರಜ್ಞಾನವು, ನಮ್ಮ ಕಣ್ಣಿನ ಪಾಪೆಯನ್ನು ಗುರುತು ಹಿಡಿಯುವ ಸಾಮರ್ಥ್ಯ ಹೊಂದಿರುವುದರಿಂದ, ಟ್ಯಾಬ್ಲೆಟ್ ಸುರಕ್ಷತೆಗಾಗಿ ಮಾತ್ರವಷ್ಟೇ ಅಲ್ಲದೆ, ಆಧಾರ್ ಮೂಲಕ ವ್ಯಕ್ತಿಯೊಬ್ಬನ ಗುರುತಿನ ದೃಢೀಕರಣಕ್ಕೂ ಅನುಕೂಲ ಮಾಡಿಕೊಡಲಿದೆ. ಇದು ಭಾರತ ಸರಕಾರದ 'ಡಿಜಿಟಲ್ ಇಂಡಿಯಾ' ಮೂಲಕ ಭ್ರಷ್ಟಾಚಾರ ನಿವಾರಣೆಯ ಅಭಿಯಾನಕ್ಕೆ ಪೂರಕವಾಗಲಿದೆ.

ಆಧಾರ್ ಕಾರ್ಡ್‌ಗೆ ಕಣ್ಣು ಪಾಪೆ ಹಾಗೂ ಕೈ ಬೆರಳಚ್ಚು - ಎರಡನ್ನೂ ಒಬ್ಬ ವ್ಯಕ್ತಿಯ ಬಯೋಮೆಟ್ರಿಕ್ ಗುರುತಿನ ಮಾನದಂಡವಾಗಿ ಬಳಸಲಾಗುತ್ತಿದೆ. ಹಿಂಭಾಗದ ಕ್ಯಾಮೆರಾದ ಮೇಲ್ಭಾಗದಲ್ಲಿರುವ ಐರಿಸ್ ಸ್ಕ್ಯಾನರ್ ಮೂಲಕ ಕಣ್ಣಿನ ಪಾಪೆಯನ್ನು ಸ್ಕ್ಯಾನ್ ಮಾಡಿದರೆ, ಸಂಬಂಧಿತ ತಂತ್ರಜ್ಞಾನದ ಮೂಲಕವಾಗಿ ಆಧಾರ್ ಮಾಹಿತಿಯು ಲಭ್ಯವಾಗುತ್ತದೆ.
ಪ್ರಧಾನ ಮಂತ್ರಿ ಜನಧನ್ ಯೋಜನೆ, ರಾಷ್ಟ್ರೀಯ ಆರೋಗ್ಯ ಅಭಿಯಾನ, ಇ-ಆಸ್ಪತ್ರೆ ಕಾರ್ಯಕ್ರಮ, ಡಿಜಿಲಾಕರ್, ಪಾಸ್‌ಪೋರ್ಟ್, ತೆರಿಗೆ, ಪಿಂಚಣಿ, ಮುಂತಾಗಿ ಸರಕಾರದ ಹಲವಾರು ಕಾರ್ಯಕ್ರಮಗಳಿಗೆ ಆಧಾರ್ ಕಡ್ಡಾಯವಿರುವುದರಿಂದ, ಅಲ್ಲಿ ಈ ತಂತ್ರಜ್ಞಾನ ಬಳಕೆಯಾಗಬಹುದು. ಭಾಷೆ ಅಥವಾ ಶಿಕ್ಷಣದ ಅಡಚಣೆಗಳ್ಯಾವುವೂ ಇಲ್ಲದೆ ಸರಕಾರದ ಫಲಾನುಭವಿಗಳ ದೃಢೀಕರಣಕ್ಕೆ ಹೊಸ ಆಯಾಮ ದೊರೆತಂತಾಗುತ್ತದೆ ಎಂದು ಸ್ಯಾಮ್ಸಂಗ್ ಹೇಳಿಕೊಂಡಿದೆ.

ಈಗಾಗಲೇ ದೇಶಾದ್ಯಂತ ಸುಮಾರು 100 ಕೋಟಿ ಮಂದಿ ಆಧಾರ್ ಕಾರ್ಡ್ ಪಡೆದಿದ್ದು, ಈ ರೀತಿಯ ಹೊಸ ತಂತ್ರಜ್ಞಾನಗಳೂ ಬಂದಿರುವುದರೊಂದಿಗೆ, ಆಧಾರ್ ಆಧಾರಿತ ಸರಕಾರಿ ಕಾರ್ಯಕ್ರಮಗಳಿಗೆ ಹೆಚ್ಚಿನ ಉತ್ತೇಜನ ದೊರೆಯಲಿದೆ.

ಇತರ ಸ್ಮಾರ್ಟ್‌ಫೋನ್ ತಯಾರಕ ಸಂಸ್ಥೆಗಳೂ ಐರಿಸ್ ತಂತ್ರಜ್ಞಾನವನ್ನು ಅಳವಡಿಸಿ, ಆಧಾರ್ ಮೂಲಕ ಸರಕಾರಿ ಕಾರ್ಯಗಳಲ್ಲಿ ಭಾಗಿಯಾಗುವ ಸಾಧ್ಯತೆಗಳೂ ಹೆಚ್ಚಾಗಿವೆ. ಈ ಟ್ಯಾಬ್ಲೆಟ್ ಇನ್ನಷ್ಟೇ ಮಾರುಕಟ್ಟೆಗೆ ಬಿಡುಗಡೆಯಾಗಬೇಕಿದೆ.

ಬುಧವಾರ ಘೋಷಣೆಯಾದ ಈ ವಿನೂತನ ಈ ಸ್ಯಾಮ್ಸಂಗ್ ಗೆಲಾಕ್ಸಿ ಐರಿಸ್ ಟ್ಯಾಬ್ಲೆಟ್ ಬೆಲೆ 13,499 ರೂ. 7 ಇಂಚು ಸ್ಕ್ರೀನ್, 1.2 ಗಿಗಾಹರ್ಟ್ಜ್ ಕ್ವಾಡ್ ಕೋರ್ ಪ್ರೊಸೆಸರ್, 1.5 ಜಿಬಿ RAM, 8 ಜಿಬಿ ಆಂತರಿಕ ಸ್ಟೋರೇಜ್ ಈ ಟ್ಯಾಬ್ಲೆಟ್‌ನಲ್ಲಿ ಇರಲಿದ್ದು, 200 ಜಿಬಿ ವರೆಗೂ ಮೈಕ್ರೋ ಎಸ್‌ಡಿ ಕಾರ್ಡ್ ಮೂಲಕ ಸ್ಟೋರೇಜ್ ವಿಸ್ತರಿಸಬಹುದು. ಹಿಂಭಾಗದಲ್ಲಿ 5 ಮೆಗಾಪಿಕ್ಸೆಲ್ ಕ್ಯಾಮೆರಾ, 3600 mAh ಬ್ಯಾಟರಿ ಸಾಮರ್ಥ್ಯ, 3ಜಿ ತಂತ್ರಜ್ಞಾನ ಜತೆಗೆ ಆಂಡ್ರಾಯ್ಡ್ ಲಾಲಿಪಾಪ್ ಕಾರ್ಯಾಚರಣಾ ವ್ಯವಸ್ಥೆ ಇದೆ.

ಬ್ಯಾಂಕಿಂಗ್ ಹಾಗೂ ಇ-ಗವರ್ನೆನ್ಸ್ ವಿಭಾಗಗಳಲ್ಲಿನ ಯಾವುದೇ ವ್ಯವಹಾರಕ್ಕೆ ಬಯೋಮೆಟ್ರಿಕ್ ಗುರುತಿನ ದೃಢೀಕರಣ ಎಲ್ಲೆಲ್ಲಾ ಬಳಕೆಯಾಗುತ್ತದೆಯೋ, ಅಲ್ಲೆಲ್ಲಾ ಈ ಟ್ಯಾಬ್ಲೆಟ್‌ನ ಐರಿಸ್ ಸ್ಕ್ಯಾನರ್ ನೆರವಿಗೆ ಬರಲಿದೆ ಎಂದು ಸ್ಯಾಮ್ಸಂಗ್ ಹೇಳಿಕೊಂಡಿದೆ.

ಇದೇ ಸಂದರ್ಭದಲ್ಲಿ ಆ್ಯಪ್ ಡೆವಲಪರ್‌ಗಳು ಆಧಾರ್ ಆಧಾರಿತವಾದ ಆ್ಯಪ್‌ಗಳನ್ನು ನಿರ್ಮಿಸಲು ಅನುಕೂಲವಾಗುವಂತೆ ಸ್ಯಾಮ್ಸಂಗ್ ಸಾಫ್ಟ್‌ವೇರ್ ಡೆವಲಪ್‌ಮೆಂಟ್ ಕಿಟ್‌ಗಳನ್ನೂ ಒದಗಿಸಲಿದೆ ಎಂದು ಸ್ಯಾಮ್ಸಂಗ್ ಇಂಡಿಯಾದ ಕಾರ್ಪೊರೇಟ್ ಉಪಾಧ್ಯಕ್ಷ ಹಾಗೂ ಸಿಟಿಒ ಡಾ.ಅಲೋಕನಾಥ್ ಡೇ ಹೊಸದಿಲ್ಲಿಯಲ್ಲಿ ಬುಧವಾರ ತಿಳಿಸಿದ್ದಾರೆ.

ಗ್ರಾಹಕರಿಗೆ ತಮ್ಮ ಮಾಹಿತಿಯ ಸುರಕ್ಷತೆಯ ಬಗ್ಗೆ ಆತಂಕವಿದ್ದರೆ, ಸ್ಯಾಮ್ಸಂಗ್ ನಾಕ್ಸ್ (KNOX) ಎಂಬ ತಂತ್ರಜ್ಞಾನವೊಂದರ ಮೂಲಕ ಕಣ್ಣುಪಾಪೆಯ ದತ್ತಾಂಶವನ್ನು ಎನ್‌ಕ್ರಿಪ್ಟ್ ಮಾಡಲಾಗಿರುತ್ತದೆ.