ನೆಲಕಚ್ಚಿದ ಬಾಳೆ, ಬಂದ್‌ ಆದ ಮಗ್ಗ: ಲಕ್ಷಾಂತರ ಹಾನಿ

ರಬಕವಿ/ಬನಹಟ್ಟಿ ವರದಿ: ರಬಕವಿ ಸಮೀಪದ ಯರಗಟ್ಟಿ ಗ್ರಾಮದಲ್ಲಿನ ಹತ್ತಾರು ಎಕರೆ ಪ್ರದೇಶದಲ್ಲಿನ ಬಾಳೆ ಸಂಪೂರ್ಣ ನೆಲಕಚ್ಚಿದ ಪರಿಣಾಮ ಲಕ್ಷಾಂತರ ರೂ. ಹಾನಿಯಾಗಿದೆ.

ಪುಂಡಲೀಕ ಗೋಪಾಳೆ ಹಾಗೂ ದುಂಡಪ್ಪ ಗೋಪಾಳೆ, ಬಸಪ್ಪ ಹಾಗೂ ಯಲ್ಲಪ್ಪ ಗೋಪಾಳೆ, ವಿಜಯಲಕ್ಷ್ಮಿ ರಾಯಪ್ಪ ಹೆಗ್ಗನವರ ಬಾಳೆ ಬೆಳೆ ಸೇರಿದಂತೆ ನಾನಾಕಡೆ ಸುಮಾರು 50 ಲಕ್ಷ ಕ್ಕೂ ಅಧಿಕ ಬೆಲೆ ಬಾಳುವ ಬಾಳೆ ಹಾನಿಯಾಗಿದೆ.

ಇನ್ನೇನು ವಾರದಲ್ಲಿಯೇ ಮಾರುಕಟ್ಟೆಗೆ ತೆರಳಬೇಕಿದ್ದ ಬಾಳೆ ಬಿರುಗಾಳಿಗೆ ಸಿಲುಕಿ ರೈತ ನಲುಗುವಂತಾಗಿದೆ. ಲಕ್ಷಾಂತರ ರೂ. ಸಾಲ ಮಾಡಿ ಬಾಳೆಯನ್ನೇ ನಂಬಿ ಬಾಳ್ವೆ ಮಾಡುತ್ತಿರುವ ಗೋಪಾಳೆ ಕುಟುಂಬಕ್ಕೆ ಬರಸಿಡಿಲು ಬಡಿದಂತಾಗಿದೆ.

ಜನಪ್ರತಿನಿಧಿಗಳಾಗಲಿ, ಅಧಿಕಾರಿಗಳಾಗಲಿ ಸೌಜನ್ಯಕ್ಕಾದರೂ ಭೇಟಿ ನೀಡದಿರುವುದು ಸೋಜಿಗದ ಸಂಗತಿಯಾಗಿದೆ ಎಂದು ಮಾಜಿ ಶಾಸಕ ಸಿದ್ದು ಸವದಿ ಆರೋಪಿಸಿದ್ದಾರೆ.

ಪ್ರಭಾವಿ ಸಚಿವರಾಗಿರುವ ಕ್ಷೇತ್ರದ ಶಾಸಕರು ಸೇಡಿನ ರಾಜಕಾರಣ ಬಿಟ್ಟು ಕ್ಷೇತ್ರದಲ್ಲಿ ಹಾನಿಗೊಳಗಾದ ಕುಟುಂಬಗಳ ಪರಿಶೀಲನೆ ನಡೆಸಿ, ಆರ್ಥಿಕ ಸಹಾಯ ಒದಗಿಸಬೇಕೆಂದು ಸವದಿ ಆಗ್ರಹಿಸಿದ್ದಾರೆ. ಕೆಲ ನೇಕಾರ ಕುಟುಂಬಗಳ ಶೆಡ್‌ ಹಾಗೂ ಕಾರ್ಖಾನೆಗಳ ಚಾವಣಿಗಳು ಹಾರಿ ಹೋಗಿದ್ದು, ಅವರ ಬದುಕಿಗೆ ಸಂಜೀವಿನಿಯಾಗಿರುವ ಮಗ್ಗಗಳ ಬಂದ್‌ ಆಗಿವೆ. ಇವೆಲ್ಲವನ್ನೂ ಜವಳಿ ಇಲಾಖೆ ಪರಿಶೀಲನೆ ನಡೆಸಿ ಪರಿಹಾರ ಒದಗಿಸಬೇಕೆಂದು ಸವದಿ ಒತ್ತಾಯಿಸಿದರು.