ವಿಶ್ವಸಂಸ್ಥೆ: ಭಾರತದ ಅರ್ಥವ್ಯವಸ್ಥೆಯು ಈ ವರ್ಷ ಶೇ.7.3ರಷ್ಟು ಪ್ರಗತಿ ಸಾಧಿಸಲಿದೆ ಎಂದು ವಿಶ್ವ ಸಂಸ್ಥೆಯ ಮುನ್ನೋಟ ತಿಳಿಸಿದೆ. ವಿಶ್ವ ಆರ್ಥಿಕ ಪರಿಸ್ಥಿತಿಯ ಕುರಿತು ವಿಶ್ವಸಂಸ್ಥೆ ಬಿಡುಗಡೆಗೊಳಿಸಿರುವ ವರದಿಯ ಪ್ರಕಾರ, ಭಾರತವು 2017ರಲ್ಲಿ ಶೇ.7.5ರ ಜಿಡಿಪಿ ದರ ದಾಖಲಿಸಲಿದೆ. ದೇಶೀಯವಾಗಿ ಆರ್ಥಿಕ ನೀತಿಗಳ ಸುಧಾರಣೆಯಲ್ಲಿ ಸ್ವಲ್ಪ ವಿಳಂಬವಾದರೂ, ಬ್ಯಾಂಕಿಂಗ್‌ ವ್ಯವಸ್ಥೆ ಸವಾಲುಗಳನ್ನೆದುರಿಸುತ್ತಿದ್ದರೂ, ಹೂಡಿಕೆಯ ಒಳಹರಿವು, ವಿದೇಶಿ ನೇರ ಬಂಡವಾಳ ಹೂಡಿಕೆಯ ಹೆಚ್ಚಳ, ಸಾರ್ವಜನಿಕ ಮತ್ತು ಖಾಸಗಿ ಸಹಭಾಗಿತ್ವ, ಮೂಲ ಸೌಕರ್ಯ ವಲಯಗಳಲ್ಲಿ ಹೂಡಿಕೆ ಇತ್ಯಾದಿಗಳ ಪರಿಣಾಮ ಜಿಡಿಪಿ ವೃದ್ಧಿಸಲಿದೆ ಎಂದು ವಿಶ್ವಸಂಸ್ಥೆ ತಿಳಿಸಿದೆ. ಇದೇ ವೇಳೆ ಚೀನಾದ ಜಿಡಿಪಿ ಬೆಳವಣಿಗೆ 2016ರಲ್ಲಿ ಶೇ.6.4 ಮತ್ತು 2017ರಲ್ಲಿ ಶೇ.6.4ಕ್ಕೆ ತಗ್ಗಲಿದೆ ಎಂದು ವಿಶ್ವ ಸಂಸ್ಥೆ ತಿಳಿಸಿದೆ. ಚೀನಾದಲ್ಲಿ ನಿರೀಕ್ಷೆಗೂ ಮೀರಿ ಆರ್ಥಿಕ ಬೆಳವಣಿಗೆ ಮಂದಗತಿಗೆ ತಿರುಗಲಿದ್ದು, ಇದು ಹಣಕಾಸು ಮತ್ತು ಸರಕು ಮಾರುಕಟ್ಟೆಯ ಮೇಲೆ ನಕಾರಾತ್ಮಕ ಪ್ರಭಾವ ಬೀರಲಿದೆ. ಕೆಲವು ಸರಕುಗಳನ್ನು ಅವಲಂಬಿಸಿರುವ ಅರ್ಥವ್ಯವಸ್ಥೆಗಳಲ್ಲಿ ಸಾಲದ ಬಿಕ್ಕಟ್ಟು ಉಲ್ಬಣಿಸಲಿದೆ ಎಂದು ವಿಶ್ವಸಂಸ್ಥೆಯ ವರದಿ ತಿಳಿಸಿದೆ. ದಕ್ಷಿಣ ಏಷ್ಯಾದ ಜಿಡಿಪಿಯ 70 ಪರ್ಸೆಂಟ್‌ನಷ್ಟು ಪಾಲನ್ನು ಭಾರತದ ಅರ್ಥವ್ಯವಸ್ಥೆ ಹೊಂದಿದೆ. 2015ರಲ್ಲಿ ದೇಶದ ಜಿಡಿಪಿ ಶೇ.7.2ರಷ್ಟಿತ್ತು.
↧
ಭಾರತದ ಜಿಡಿಪಿ ಶೇ.7.3ಕ್ಕೆ ಏರಿಕೆ: ವಿಶ್ವಸಂಸ್ಥೆ
↧