ಬ್ಯಾಂಕ್‌ ಸಾಲದ ಬಿಕ್ಕಟ್ಟು : ನ್ಯೂಜಿಲ್ಯಾಂಡ್‌ ಅರ್ಥವ್ಯವಸ್ಥೆಗಿಂತ ದೊಡ್ಡದು

ಕಳೆದ 6 ತಿಂಗಳಿನಲ್ಲಿ ಬ್ಯಾಂಕ್‌ಗಳ ನಿವ್ವಳ ಲಾಭ ಇಳಿಕೆ

ಒಟ್ಟು 13 ಲಕ್ಷ ಕೋಟಿ ರೂ. ಸಾಲದ ಬಿಕ್ಕಟ್ಟು ಸಂಭವ

ಎಕನಾಮಿಕ್‌ ಟೈಮ್ಸ್‌ ಮುಂಬಯಿ

ಭಾರತದಲ್ಲಿ ವಸೂಲಾಗದಿರುವ ಸಾಲದ ಸಮಸ್ಯೆ ದಿನೇದಿನೆ ಬಿಗಡಾಯಿಸುತ್ತಿದ್ದು, ಬ್ಯಾಂಕ್‌ಗಳ ಲಾಭಾಂಶವನ್ನು ಹೀರಿಕೊಳ್ಳುತ್ತಿದೆ. ಇಂತಹ ಸಾಲದ ಮೊತ್ತ 170 ಶತಕೋಟಿ ಡಾಲರ್‌ಗೆ (ಸುಮಾರು 11 ಲಕ್ಷ ಕೋಟಿ ರೂ.ಗೆ) ಹೆಚ್ಚಳವಾಗುವ ಆತಂಕ ಉಂಟಾಗಿದೆ. ಅಂದರೆ ನ್ಯೂಜಿಲ್ಯಾಂಡ್‌ನ ಅರ್ಥವ್ಯವಸ್ಥೆಯ ಗಾತ್ರಕ್ಕಿಂತಲೂ ದೊಡ್ಡ ಮೊತ್ತಕ್ಕೆ ಅನುತ್ಪಾದಕ ಸಾಲದ ಹೊರೆ ಬೆಳೆಯುವ ಸಾಧ್ಯತೆ ಇದೆ ಎಂದು ಆರ್ಥಿಕ ವಿಶ್ಲೇಷಕರು ಹೇಳಿದ್ದಾರೆ.

ರಿಸರ್ವ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಬ್ಯಾಂಕ್‌ಗಳಿಗೆ ಅನುತ್ಪಾದನ ಸಾಲದ ನಿಯಂತ್ರಣ ಸಂಬಂಧ ಪದೇಪದೆ ಎಚ್ಚರಿಕೆ ಮತ್ತು ಸಲಹೆ ನೀಡುತ್ತಿದೆ. ಮುಖ್ಯವಾಗಿ ಕಳೆದ ತಿಂಗಳು ಖಾಸಗಿ ವಲಯದ ಎರಡು ಪ್ರಮುಖ ಬ್ಯಾಂಕ್‌ಗಳಿಗೆ ವಿಸ್ತೃತ ಮಾರ್ಗದರ್ಶಿಯನ್ನು ಆರ್‌ಬಿಐ ಒದಗಿಸಿತ್ತು.

ಹಣಕಾಸು ತಜ್ಞರ ಪ್ರಕಾರ ವಸೂಲಾಗದ ಭಾರಿ ಮೊತ್ತದ ಸಾಲದಿಂದ ಅಪಾಯ ಅತ್ಯಂತ ಸ್ಪಷ್ಟವಾಗಿದೆ. ಇದು ಈಗಾಗಲೇ ಬ್ಯಾಂಕ್‌ಗಳ ಲಾಭಾಂಶವನ್ನು ಕಸಿಯುತ್ತಿದೆ. ಸಾಲ ವಿತರಣೆಯನ್ನು ಹೆಚ್ಚಿಸಲೂ ಅಡ್ಡಿಯಾಗಿದೆ. ಬಿಸಿನೆಸ್‌ ವಲಯದಲ್ಲಿ ಮತ್ತಷ್ಟು ಸುಸ್ತಿ ಸಾಲದ ಆತಂಕಕ್ಕೆ ಕಾರಣವಾಗಿದೆ.

ಬ್ಯಾಂಕ್‌ಗಳಲ್ಲಿ ಸಾಲ ವಿತರಣೆಯ ಪ್ರಮಾಣದಲ್ಲಿ ಕಳೆದ ಸಾಲಿನಲ್ಲಿ 10.7 ಪರ್ಸೆಂಟ್‌ ಏರಿಕೆಯಾಗಿದ್ದರೂ, ಕಳೆದ ಎರಡು ದಶಕದಲ್ಲಿಯೇ ಮಂದಗತಿಯ ಬೆಳವಣಿಗೆಯಾಗಿದೆ. ಕಬ್ಬಿಣ ಮತ್ತು ಉಕ್ಕು ವಲಯದಲ್ಲಿ ವಸೂಲಾಗದ ಸಾಲದ ಭಾರಿ ಸಮಸ್ಯೆ ಕಂಡು ಬಂದಿದೆ. ಕಳೆದ 6 ತಿಂಗಳಿನಿಂದೀಚೆಗೆ ಬ್ಯಾಂಕ್‌ಗಳ ಲಾಭಾಂಶದಲ್ಲಿ ಗಣನೀಯ ಇಳಿಕೆಯಾಗಿದ್ದು, ಅನುತ್ಪಾದಕ ಸಾಲದ ಬಾಬ್ತು ಭಾರಿ ಮೊತ್ತದ ಹಣವನ್ನು ತೆರೆದಿರಿಸಲಾಗುತ್ತಿದೆ. ಆರ್‌ಬಿಐ ಈ ಬಗ್ಗೆ ಕಟ್ಟುನಿಟ್ಟಿನ ಆದೇಶ ಹೊರಡಿಸಿತ್ತು.

ಒಟ್ಟು 13 ಲಕ್ಷ ಕೋಟಿ ರೂ. ಸಾಲದ ಬಿಕ್ಕಟ್ಟು?

'' ಬ್ಯಾಂಕ್‌ಗಳು ಎನ್‌ಪಿಎ (ಅನುತ್ಪಾದಕ ಸಾಲ) ಸಲುವಾಗಿ ದೊಡ್ಡ ಮೊತ್ತದ ಹಣವನ್ನು ತೆಗೆದಿಡಬೇಕಾದ ಪರಿಸ್ಥಿತಿ ಇದೆ'' ಎನ್ನುತ್ತಾರೆ ಇಂಡಿಯಾ ರೇಟಿಂಗ್ಸ್‌ ಆ್ಯಂಡ್‌ ರೀಸರ್ಚ್‌ನ ನಿರ್ದೇಶಕ ಅಭಿಷೇಕ್‌ ಭಟ್ಟಾಚಾರ್ಯ. ಭಟ್ಟಾಚಾರ್ಯ ಅವರ ಪ್ರಕಾರ ಸುಮಾರು 13 ಲಕ್ಷ ಕೋಟಿ ರೂ. (195 ಶತಕೋಟಿ ಡಾಲರ್‌) ಬ್ಯಾಂಕ್‌ ಸಾಲಗಳು ವಸೂಲಾಗದೆ ಒತ್ತಡದಲ್ಲಿವೆ. ಇದು ನ್ಯೂಜಿಲ್ಯಾಂಡ್‌ನ ಆರ್ಥಿಕತೆಗಿಂತ ದೊಡ್ಡದು.

ಆರ್‌ಬಿಐ ಗವರ್ನರ್‌ ರಘುರಾಮ್‌ ರಾಜನ್‌ ಅವರು, ಬ್ಯಾಂಕ್‌ಗಳಿಗೆ ಬ್ಯಾಲೆನ್ಸ್‌ ಶೀಟ್‌ಗಳನ್ನು ಸ್ವಚ್ಛಗೊಳಿಸಿ ವಸೂಲಾಗದ ಸಾಲದ ಹೊರೆಯನ್ನು ತಗ್ಗಿಸಲು ನಿರ್ದೇಶಿಸಿದ್ದು, ಇದಕ್ಕೆ '' ಭಾರಿ ಶಸ್ತ್ರಕ್ರಿಯೆ''ಯ ಅಗತ್ಯ ಇದೆ ಎಂದಿದ್ದರು.

ಖಾಸಗಿ ವಲಯದ ಬ್ಯಾಂಕ್‌ಗಳೂ ಇದೀಗ ಸಾಲದ ಬಿಕ್ಕಟ್ಟಿನ ಸಮಸ್ಯೆಯ ಸುಳಿಯಲ್ಲಿವೆ. ಎಕ್ಸಿಸ್‌ ಬ್ಯಾಂಕ್‌ 226 ಶತಕೋಟಿ ರೂ. ಸಾಲಗಳ ಮೇಲೆ ನಿಗಾ ವಹಿಸಿದ್ದು, ಇದರಲ್ಲಿ 60 ಪರ್ಸೆಂಟ್‌ ಸಾಲಗಳು ಇನ್ನೆರಡು ವರ್ಷಗಳಲ್ಲಿ ಸುಸ್ತಿ ಸಾಲವಾಗುವ ನಿರೀಕ್ಷೆಯಲ್ಲಿದೆ. ಐಸಿಐಸಿಐ ಬ್ಯಾಂಕ್‌ ಕೂಡ ಉಕ್ಕು ಮತ್ತು ವಿದ್ಯುತ್‌ ವಲಯದಲ್ಲಿ ನೀಡಿರುವ ಸಾಲದ ಬಗ್ಗೆ ನಿಗಾ ವಹಿಸಿದೆ.