ಬೆಂಗಳೂರು: ಪಾಂಡಿಚೇರಿ ಬಾಸ್ಕೆಟ್‌ಬಾಲ್‌ ಅಸೋಸಿಯೇಷನ್‌ನ ಆಶ್ರಯದಲ್ಲಿ ನಡೆಯುತ್ತಿರುವ 67ನೇ ರಾಷ್ಟ್ರೀಯ ಬಾಸ್ಕೆಟ್‌ಬಾಲ್‌ ಚಾಂಪಿಯನ್‌ಷಿಪ್‌ನಲ್ಲಿ ಕರ್ನಾಟಕ ತಂಡ ಪಶ್ಚಿಮ ಬಂಗಾಲದ ವಿರುದ್ಧ ಸೋಲಿಗೆ ಶರಣಾಗಿದೆ. ಚಾಂಪಿಯನ್‌ಷಿಪ್‌ನ ಎರಡನೇ ದಿನ ನಡೆದ ಪಂದ್ಯದಲ್ಲಿ ಕರ್ನಾಟಕ ಪುರುಷರ ತಂಡ 57-71 ಅಂತರದಲ್ಲಿ ಸೋತಿತು. ಉತ್ತಮ ಹೋರಾಟದ ನಡುವೆಯೂ ರಾಜ್ಯ ತಂಡ 15-21, 11-18, 19-11, 12-21 ಅಂತರದಲ್ಲಿ ಸೋಲನುಭವಿಸಿತು. ಮೊದಲ ಪಂದ್ಯದಲ್ಲಿ ಅಚ್ಚರಿಯ ಆಘಾತ ಅನುಭವಿಸಿದ್ದ ತಮಿಳುನಾಡು ತಂಡ ಚಂಡೀಗಢದ ವಿರುದ್ಧ ಉತ್ತಮ ಹೋರಾಟ ನೀಡಿ ಜಯ ಗಳಿಸಿತು. ತಮಿಳುನಾಡು ತಂಡದ ನಾಯಕ ಹರಿರಾಮ್‌ ಅಂಗಣದ ಎರಡೂ ವಿಭಾಗದಲ್ಲಿ ಮಿಂಚಿದುದರ ಪರಿಣಾಮ ತಂಡಕ್ಕೆ 98-79 ಂತರದಲ್ಲಿ ಜಯ ತಂದಿತ್ತರು. ಹರಿರಾಮ್‌ 26 ಅಂಕ ಗಳಿಸಿ ಗಮನ ಸೆಳೆದರು. ದಿನದ ಇನ್ನೊಂದು ಪಂದ್ಯದಲ್ಲಿ ಹರಿಯಾಣ ತಂಡ ಮಧ್ಯಪ್ರದೇಶದ ವಿರುದ್ಧ 96-65ಅಂತರದಲ್ಲಿ ಜಯ ಗಳಿಸಿತು. ಬಾಲಕಿಯರ ವಿಭಾಗದಲ್ಲಿ ಛತ್ತೀಸ್‌ಗಢ 55-44 ಂತರದಲ್ಲಿ ಹರಿಯಾಣ ವಿರುದ್ಧ ಗೆದ್ದಿತು. ತಂಡದ ಪರ ರಿಯಾ ವಿಮಲ್‌ ಹಾಗೂ ವಂದನಾ ಅಂಜಿ ಉತ್ತಮ ಪ್ರದರ್ಶನ ನೀಡಿದರು. ಪಂಜಾಬ್‌ ತಂಡ ಮಧ್ಯಪ್ರದೇಶವನ್ನು 51-49 ಅಂತರದಲ್ಲಿ ಮಣಿಸಿತು. ಕೋಮಲ್‌ಪ್ರೀತ್‌ ಹಾಗೂ ಅಮನ್‌ಪ್ರೀತ್‌ ಜಯದ ರೂವಾರಿ ಎನಿಸಿದರು.
↧
ರಾಷ್ಟ್ರೀಯ ಬಾಸ್ಕೆಟ್‌ಬಾಲ್‌: ಕರ್ನಾಟಕಕ್ಕೆ ಸೋಲು
↧