ಹೊಸದಿಲ್ಲಿ: ನವೀಕರಿಸಬಹುದಾದ ಇಂಧನ ಮೂಲಗಳನ್ನು ನೆದರ್‌ಲ್ಯಾಂಡ್‌ ಉತ್ತೇಜಿಸುತ್ತಿದ್ದು, ಈ ನಿಟ್ಟಿನಲ್ಲಿ ನಾನಾ ಕ್ರಮಗಳನ್ನು ಜಾರಿಗೊಳಿಸುತ್ತಿದೆ. ಅಂದಹಾಗೇ, ಈ ದೇಶವು 2025ರ ಹೊತ್ತಿಗೆ ಪೆಟ್ರೋಲ್‌, ಡೀಸೆಲ್‌ ಸೇರಿದಂತೆ ವಿದ್ಯುತೇತರ ಎಲ್ಲ ಕಾರ್‌ಗಳನ್ನು ನಿಷೇಧಿಸುವ ನಿಟ್ಟಿನಲ್ಲಿ ಚಿಂತನೆ ನಡೆಸುತ್ತಿದೆ. ಡಚ್ಚರು ಮೊದಲಿನಿಂದಲೂ ನವೀಕರಿಸಬಹುದಾದ ಇಂಧನಗಳನ್ನು ಗರಿಷ್ಠ ಮಟ್ಟದಲ್ಲಿ ಬಳಸುವಲ್ಲಿ ಜನಪ್ರಿಯರು. 2014ರಲ್ಲಿ ವಿಶ್ವದ ಮೊದಲ ಸೌರಬೆಳಕಿನ ರಸ್ತೆಯನ್ನು ನಿರ್ಮಾಣ ಮಾಡಿದ್ದ ನೆದರ್‌ಲ್ಯಾಂಡ್‌ ಪ್ರಶಂಸೆಗೆ ಪಾತ್ರವಾಗಿತ್ತು. ಇದೀಗ ಪೆಟ್ರೋಲ್‌, ಡೀಸೆಲ್‌ ಕಾರ್‌ಗಳನ್ನೇ ನಿಷೇಧಿಸುವಂಥ ಮಹತ್ವದ ವಿಷಯ ಕುರಿತು ಚಿಂತನೆ ನಡೆಸಿದೆ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ. ಲೇಬರ್‌ ಪಕ್ಷವು 2025ರ ಹೊತ್ತಿಗೆ ಪೆಟ್ರೋಲ್‌, ಡೀಸೆಲ್‌ ವಾಹನಗಳ ಮಾರಾಟವನ್ನು ರದ್ದುಗೊಳಿಸುವ ಪ್ರಸ್ತಾವನೆಯನ್ನು ಹೊಂದಿದೆ. ಅಂದರೆ, ವಿದ್ಯುತ್‌ ಅಥವಾ ಹೈಡ್ರೋಜನ್‌ ಆಧರಿತ ಕಾರ್‌ಗಳಿಗಷ್ಟೆ ಅವಕಾಶ ನೀಡುವುದು ಸರಕಾರದ ಉದ್ದೇಶ. ಇದು ಜಾರಿಯಾದರೆ ರಸ್ತೆಯಲ್ಲಿ ಪರಿಸರಸ್ನೇಹಿ ಕಾರ್‌ಗಳಷ್ಟೆ ಉಳಿಯುತ್ತವೆ. ಆದರೆ, ಈ ವಿಷಯವು ಇನ್ನೂ ಚಿಂತನೆಯ ಹಂತದಲ್ಲಿಯೇ ಇದೆ ಎನ್ನಲಾಗಿದೆ. ನೆದರ್‌ಲ್ಯಾಂಡ್‌ ಮತ್ತು ಐರೋಪ್ಯ ಒಕ್ಕೂಟದಲ್ಲಿ ಎಲೆಕ್ಟ್ರಿಕ್‌/ಹೈಬ್ರಿಡ್‌ ಕಾರ್‌ಗಳ ಮಾರಾಟವು ಹೆಚ್ಚುತ್ತಿದೆ ಎಂದು ನಾನಾ ಅಧ್ಯಯನಗಳು ಹೇಳಿವೆ.
↧
ನೆದರ್‌ಲ್ಯಾಂಡ್‌: 2025ಕ್ಕೆ ಪೆಟ್ರೋಲ್‌, ಡೀಸೆಲ್‌ ಕಾರ್‌ಗಳಿಗೆ ನಿಷೇಧ?
↧