ಲಂಡನ್‌: ಇದೇನು ಕಾರಾ ಅಥವಾ ದೋಣಿಯಾ? ಹೌದು, ಮರ್ಸಿಡಿಸ್‌-ಬೆಂಜ್‌ ಕಂಪನಿಯ ಮೊದಲ ಮೋಟಾರ್‌ ಯ್ಯಾಚ್(ದೋಣಿ) 'ಆ್ಯರೊ 460 ಗ್ರ್ಯಾಂನ್‌ಟ್ಯುರಿಸ್ಮೊ' ಬಿಡುಗಡೆಯಾಗಿದ್ದು, ಇದನ್ನು ನೋಡಿದ ಬಹುತೇಕರಿಗೆ ಇಂಥ ಅನುಮಾನ ಸಹಜವಾಗಿ ಮೂಡುತ್ತದೆ. ಜತೆಗೆ ಅಚ್ಚರಿಯೂ ಆಗುತ್ತದೆ. ಪ್ರತಿಷ್ಠಿತ ಮತ್ತು ದುಬಾರಿ ವೆಚ್ಚದ ವೈಭೋಗದ ಕಾರ್‌ಗಳ ತಯಾರಿಕೆಯಲ್ಲಿ ಮುಂಚೂಣಿಯಲ್ಲಿರುವ ಮರ್ಸಿಡಿಸ್‌-ಬೆಂಜ್‌, ಇದೀಗ ಜಾಗತಿಕ ಮೋಟರ್‌ ಯ್ಯಾಚ್ಗಳ ಮಾರುಕಟ್ಟೆಗೆ ಕಾಲಿಟ್ಟಿದೆ. ಮರ್ಸಿಡಿಸ್‌-ಬೆಂಜ್‌ ಶೈಲಿಯಲ್ಲಿಯೇ ಈ ದೋಣಿಯ ಬಿಡುಗಡೆಯು ಸೇಂಟ್‌-ಜೀನ್‌--ಕ್ಯಾಪ್‌-ಫೆರಟ್‌ನ ಕರಾವಳಿ ತೀರದಲ್ಲಿ ನಡೆಯಿತು. ನಯವಾದ ನುಣುಪಿನ ಕಾರ್‌ ಮತ್ತು ದೋಣಿಯನ್ನು ಸೇರ್ಪಡೆ ಮಾಡಿ ಆ್ಯರೊ 460 ಗ್ರ್ಯಾಂನ್‌ಟ್ಯುರಿಸ್ಮೊ ಅನ್ನು ತಯಾರಿಸಿದಂತೆ ಭಾಸವಾಗುತ್ತದೆ. ಮೊದಲ ಆವೃತ್ತಿಯಲ್ಲಿ ಸದ್ಯಕ್ಕೆ ಕೇವಲ 10 ಯ್ಯಾಚ್ಗಳನ್ನಷ್ಟೆ ಕಂಪನಿ ನಿರ್ಮಾಣ ಮಾಡಿದೆ. 'ಸಾಗರದಲ್ಲಿನ ಸಿಲ್ವರ್‌ ಆ್ಯರೊ' ಎಂದೇ ಇದನ್ನು ಗುರ್ತಿಸಲಾಗಿದ್ದು, 2012ರಲ್ಲಿ ಈ ಯೋಜನೆಯನ್ನು ಕಂಪನಿ ಪ್ರಕಟಿಸಿತ್ತು. ಅದು 2016ರಲ್ಲಿ ಜಾರಿಗೆ ಬಂದಿದೆ. ಮರ್ಸಿಡಿಸ್‌-ಬೆಂಜ್‌ನ ರೇಸಿಂಗ್‌ ಕಾರ್‌ಗಳನ್ನು ಪ್ರೇರಣೆಯಾಗಿಟ್ಟುಕೊಂಡು ಇದನ್ನು ನಿರ್ಮಾಣ ಮಾಡಲಾಗಿದೆ ಎಂದು ಎಂಬಿವೈ.ಕಾಂ ಅಭಿಪ್ರಾಯಪಟ್ಟಿದೆ. ಇದರಲ್ಲೇನಿದೆ ವಿಶೇಷ? * ನೂತನ ಯ್ಯಾಚ್ ದರ 12 ಲಕ್ಷ ಪೌಂಡ್‌ಗಳು(ಸುಮಾರು 10 ಕೋಟಿ ರೂ.). * 46 ಅಡಿ ಉದ್ದವಿರುವ ಅದ್ಧೂರಿ ಮತ್ತು ವೈಭೋಗದ ಯ್ಯಾಚ್ * ಯೋಜನೆ ಜಾರಿಗೆ ಮರ್ಸಿಡಿಸ್‌-ಬೆಂಜ್‌ ಮತ್ತು ಬ್ರಿಟನ್‌ ಮೂಲದ ದೋಣಿ ನಿರ್ಮಾಣ ಕಂಪನಿ ಸಿಲ್ವರ್‌ ಆ್ಯರೊ ಮರೀನ್‌ ಸಹಭಾಗಿತ್ವ. * 480 ಹಾರ್ಸ್‌ಪವರ್‌ನ ಡೀಸೆಲ್‌ ಎಂಜಿನ್‌ಗಳು, 30ನಾಟ್‌ ವೇಗ * ಒಳ ವಿನ್ಯಾಸವು ಚರ್ಮ ಮತ್ತು ಮರದ ಪ್ಯಾನೆಲ್‌ಗಳಿಂದ ಆಕರ್ಷಕವಾಗಿದೆ. * ಸೂರ್ಯನ ಬೆಳಕು ಹಿತವಾಗಿ ದೋಣಿಯ ಒಳಗೆ ಬೀಳುವಂತೆ ಕಿಟಕಿಗಳು ಆಟೋಮ್ಯಾಟಿಕ್‌ ಆಗಿ ಹೊಂದಿಕೆಯಾಗುತ್ತವೆ. * ಮದ್ಯಪಾನ, ಸಂಗೀತ ಕೇಳುವುದಕ್ಕೆ ಪೂರಕವಾದ ವಿಭಾಗಗಳು ದೋಣಿಯಲ್ಲಿವೆ.
↧
ಮರ್ಸಿಡಿಸ್‌-ಬೆಂಜ್‌ನ ಯ್ಯಾಚ್ ಬಿಡುಗಡೆ
↧